فوتو: senate.parlam.kz
ءار كەزەڭنىڭ جۇگىن ارقالاپ, حالىق ساناسىنداعى سۇرانىستى ءدوپ باسىپ وتىرعان باسىلىمنىڭ جاڭا ۇردىستەر فونىندا توقىراماۋى ءماندى ءماتىن, سىرلى ءسوز, تەرەڭ تانىم, بايىپتى بايلام جاساۋىمەن بايلانىسىپ جاتقانى اقيقات.
«توي تويلايتىن ەمەس, وي ويلايتىن» كەزەڭدە گازەتىمىز 105 جىلدىق تورقالى تويىن مادەني-ينتەللەكتۋالدىق فورماتتا اتاپ ءوتتى. مادەني جيىنعا ءار جىلدارى باسىلىمدى باسقارعان ازاماتتار, حالىق قالاۋلىلارى مەن قوعام قايراتكەرلەرى, گازەت ارداگەرلەرى قاتىستى. ۇلت مۇددەسىن ءار كەز ۇمىت قالدىرماعان ۇجىمدى مارتەبەلى مەرەيتويمەن قۇتتىقتاۋشىلار لەگى وراسان بولدى. وسى قاتاردا سەنات جانە ءماجىلىس توراعالارى دا بار.
سەنات سپيكەرى ءوز قۇتتىقتاۋ حاتىندا داۋىرلەر دۇبىرىندە «Egemen Qazaqstan» سان سالانى دامىتۋعا مول ۇلەس قوسقانىن ەرەكشە ەكشەگەن.
«تاۋەلسىزدىكتى نىعايتۋ, حالىقتىڭ الەۋەتىن ارتتىرۋ جانە ۇلتتىق رۋحانياتتى دارىپتەۋ جولىندا «Egemen» مەن ەگەمەندىكتەردىڭ الار ورنى ەرەكشە. قازىرگى تاڭدا باس باسىلىم قازاقتىڭ دۇنيەتانىمىن كەڭەيتۋگە, تاريحى مەن قۇندىلىقتارىن دارىپتەۋگە, ادەبيەتى مەن مادەنيەتىن, ءبىلىمى مەن عىلىمىن دامىتۋعا جانە ەلدىڭ بەرەكە-بىرلىگىن ساقتاۋعا ۇلكەن ۇلەس قوسىپ كەلەدى», دەدى ماۋلەن اشىمباەۆ قۇتتىقتاۋىندا.
ءماجىلىس توراعاسى ەرلان قوشانوۆ مەرەيتويعا ارنالعان قۇتتىقتاۋ حاتىندا قازاق رۋحانياتىنىڭ قاراشاڭىراعىنا اينالعان باسىلىمنىڭ تالاي تولقىن قالامگەر, ءجۋرناليستىڭ كاسىبي تولىسۋىنا سەپ بولعان شەبەرحانا ەكەنىنە نازار اۋدارعان.
«گازەت قابىرعاسىندا قازاقتىڭ قانشاما بۋىن تالانتتى جۋرناليستەرى ەڭبەك ەتىپ, قالىپتاستى. قالامدارىن ۇشتاپ, شەبەرلىكتەرىن شىڭدادى. ءداۋىردىڭ تىنىسىن, قوعامنىڭ ءۇنىن حالىققا شىنايى جەتكىزدى», دەلىنگەن ەرلان قوشانوۆتىڭ قۇتتىقتاۋ لەبىزىندە.
گازەتتىڭ وسى بيىكتەن تابىلۋىنا ءار جىلدارى قازاقتىڭ قايماقتارى بىلەك تۇرە ەڭبەك ەتتى. س.سادۋاقاسوۆ, ج.ايماۋىتوۆ, م.اۋەزوۆ, ب.مايلين, س.سەيفۋللين, ت. رىسقۇلوۆ, و.جاندوسوۆ, ع.مۇسىرەپوۆ سىندى ءبىرتۋار تۇلعالار قولىنىڭ تابى تيگەن «Egemen Qazaqstan» گازەتى بيىل 105 جىلدىق مەرەيتويعا سول ابىروي بيىگىندە جەتىپ وتىر. بۇل تۋرالى ۇكىمەت باسشىسى ولجاس بەكتەنوۆ گازەت ۇجىمىن قۇتتىقتاۋ حاتىندا ايرىقشا اتاپ وتكەن.
«عاسىردان استام ۋاقىت بويى الاش جۇرتىمەن بىرگە جاساپ, ابىز باسىلىمعا اينالعان «ەگەمەننىڭ» ورنى ءاردايىم بيىك تۇرادى. ءبۇتىن بىرنەشە ءداۋىردىڭ شەجىرەسىن بويىنا بۇككەن ەل گازەتى وتاندىق ءباسپاسوزدى جاڭا ساپالىق دەڭگەيگە كوتەرىپ قانا قويماي, تۇتاس ۇلت تاعدىرى تالقىعا تۇسكەن سىندارلى ساتتەردە مەملەكەت مۇددەسىن قورعاۋعا قىزمەت ەتتى. سوندىقتان قاي تۇرعىدا الىپ قاراساقتا «Egemen Qazaqstan» قازاق ءباسپاسوزىنىڭ قاراشاڭىراعى, ەگەمەندىكتىڭ ەتالونى دەۋگە ابدەن لايىقتى» ەكەنىن ايتىپ ولجاس بەكتەنوۆ «رۋحانياتىمىزدىڭ ابىرويىن اسقاقتاتقان ۇلاعاتتى ىستەرىڭىز ورگە باسسىن», دەپ پرەمەر-مينيستر ىزگى نيەتىن بىلدىرگەن.
«Egemen Qazaqstan» گازەتىنىڭ العاشقى سانىنان مۇرات ەتكەن مۇددەسى - ەلدىك جول. سول جولدان تايماي تاباندى ەڭبەك ەتىپ كەلە جاتقان ۇجىمعا مادەنيەت جانە اقپارات ءمينيسترى ايدا بالاۆا دا ارنايى قۇتتىقتاۋ حاتىن جولدادى.
«گازەت ۇجىمى وقىرماندارىنا جاڭالىقتى جەدەل, ساپالى ءارى شىنايى تۇردە جەتكىزىپ, جۇرتشىلىق اراسىندا بايىپتى ناسيحاتتاۋدا. مەملەكەتتىك مۇددە مەن جۋرناليستىك بيىك تالاپتى تەڭ ۇستايتىن باسىلىمنىڭ كاسىبي دەڭگەيى, ۇستانعان باعىتى ەشقاشان وزگەرگەن ەمەس جانە الداعى ۋاقىتتا دا حالقىمىزدىڭ مۇرات-ماقساتى مەن قوعام دامۋىنا لايىقتى ۇلەستەرىڭىزدى قوسا بەرەسىزدەر دەپ سەنەمىن», دەلىنگەن ايدا بالاەۆانىڭ قۇتتىقتاۋىندا.
