كەڭەس وتىرىسىندا ساۋدا-ەكونوميكالىق كووپەراتسيانى نىعايتۋ, كولىك دالىزدەرىن دامىتۋ جانە جەتكىزىلىم كولەمىن ۇلعايتۋ, قورشاعان ورتانى ساقتاۋ, مادەني-گۋمانيتارلىق بايلانىستاردى ارتتىرۋ جانە عىلىمي الەۋەتتى ىسكە اسىرۋ ماسەلەلەرى قارالدى.
ساۋدا-ەكونوميكالىق بايلانىستاردى كەڭەيتۋ دوستاستىققا مۇشە مەملەكەتتەر ءۇشىن باسىم مىندەت بولىپ قالا بەرەدى. كەڭەس وتىرىسىندا ءسوز سويلەگەن ۇكىمەت باسشىسى ەلىمىزدىڭ سىرتقى ساۋداسىنىڭ تورتتەن ءبىر بولىگى تمد ەلدەرى نارىعىنا تيەسىلى ەكەنىنە توقتالدى. وسىعان بايلانىستى كەدەرگىلەردى جۇيەلى تۇردە انىقتاۋ جانە جويۋ قاجەتتىلىگى تۋىنداپ وتىر. و.بەكتەنوۆ پرەزيدەنت قاسىم-جومارت توقاەۆتىڭ باستاماسىمەن قولعا الىنعان «دوستاستىق جارمەڭكەسى» مەملەكەتارالىق باعدارلاماسىن قۇرۋ تمد ەلدەرى اراسىنداعى ەكونوميكالىق بايلانىستاردى نىعايتۋعا ىقپال ەتەتىنىن اتاپ ءوتتى.
كولىك دالىزدەرىن كەڭەيتۋ ساۋدا-ەكونوميكالىق كووپەراتسيانى دامىتۋدىڭ ماڭىزدى فاكتورى سانالادى. ۇكىمەت باسشىسى تمد-عا ترانسقۇرلىقتىق كولىك اعىندارىندا, اتاپ ايتقاندا, «باتىس – شىعىس» جانە «سولتۇستىك – وڭتۇستىك» باعىتتارىندا الاتىن ورنى ەرەكشە ەكەنىنە توقتالدى. قازاقستان تاراپى ازىرلەگەن تمد-عا مۇشە مەملەكەتتەردىڭ اۋماعى ارقىلى وتەتىن كۇرە جولداردى ءوزارا ۇشتاستىرۋ تۇجىرىمداماسى 2024 جىلعى قازاندا تمد-نىڭ اتقارۋ كوميتەتىنە جولداندى. اتالعان جوبا دوستاستىق ەلدەرىنىڭ كولىك وتكىزۋ مۇمكىندىگىن ارتتىرۋعا سەرپىن بەرەدى.
و.بەكتەنوۆ ەكولوگيا سالاسىنداعى ىنتىماقتاستىقتى نىعايتۋ ماسەلەسىنە ەرەكشە نازار اۋداردى. كليماتتىق سىن-قاتەرلەردىڭ الدىن الۋ جانە ولاردىڭ سالدارىن جويۋ ايماقتىق جانە جاھاندىق تۇراقتى دامۋعا ىقپال ەتەدى.
«التاي» ترانسشەكارالىق بيوسفەرالىق رەزەرۆاتى بىرەگەي تابيعي ەكوجۇيەلەردى ساقتاۋ بويىنشا وڭىرلىك تابىستى كووپەراتسيانىڭ مىسالى بولا الادى. ول «قاتونقاراعاي ۇلتتىق تابيعي پاركى» جانە «كاتۋن بيوسفەرالىق قورىعى» بازاسىندا قازاقستان مەن رەسەيدىڭ بىرلەسكەن كۇش-جىگەرىنىڭ ارقاسىندا قۇرىلدى. 2017 جىلى ول ازياداعى العاشقى بىرلەسكەن رەزەرۆات بولىپ, يۋنەسكو-نىڭ بۇكىلالەمدىك بيوسفەرالىق رەزەرۆاتتار جەلىسىنە قوسىلدى. بۇگىنگى تاڭدا وسى بىرەگەي جوبا نەگىزىندە عىلىمي زەرتتەۋ جۇمىستارى جۇرگىزىلىپ, كونفەرەنتسيالار وتكىزىلۋدە, بىرىگىپ ىستەۋ جانە تاجىريبە الماسۋ جولعا قويىلعان. وسىلايشا, التايدا ەرەكشە قورعالاتىن اۋماقتار بازاسىندا تابيعي قۇندىلىقتاردى ساقتاۋ سالاسىنداعى ترانسشەكارالىق ىنتىماقتاستىقتىڭ بىرەگەي مودەلى پىسىقتالدى», دەپ اتاپ ءوتتى و.بەكتەنوۆ.
تاۋەلسىز مەملەكەتتەر دوستاستىعى ەلدەرىنىڭ ۇكىمەتتەرى باسشىلارى كەڭەسى وتىرىسىنىڭ قورىتىندىسى بويىنشا بىرقاتار قۇجاتقا, ونىڭ ىشىندە ازاماتتىق كەمە جاساۋ مەن كەمە جيناقتاۋشى جابدىقتارىن ءوندىرۋدى دامىتۋداعى, كولىك كەشەنىن تسيفرلىق ترانسفورماتسيالاۋ سالاسىنداعى ىنتىماقتاستىق تۋرالى جانە باسقا دا قۇجاتتارعا قول قويىلدى.
سونىمەن قاتار دەلەگاتسيا باسشىلارى ستۋدەنتتەردىڭ جوبالارىمەن تانىستى. «كۆانتۋم پاركى» عىلىمي زەرتتەۋ كلاستەرى كۆانتتىق, فوتوندىق جانە فليۋيدتىك تەحنولوگيالاردىڭ تۇيىسكەن جەرىندە پراكتيكالىق ماسەلەلەردى شەشۋ ماقساتىندا ارنايى جوبالانىپ, سالىنعان. ۇسىنىلعان جوبالاردىڭ اۆتورلارى تمد ەلدەرىنىڭ ستۋدەنتتەرى مەن اسپيرانتتارىنىڭ «شەكاراسىز ۋنيۆەرسيتەت: اركىمنىڭ يدەياسى – بارشانىڭ بولاشاعى» ستراتەگيالىق سەسسياسىنىڭ فيناليستەرى بولدى. باۋمان اتىنداعى ممتۋ ستۋدەنتى, ورىنباسار جانتورەەۆ تانىستىرعان «كاسپي وربيتاسى» جوباسى الەمدەگى ەڭ ءىرى جابىق سۋ ايدىنىنىڭ تايازدانۋ پروبلەمالارىن شەشۋ ءۇشىن عارىشتىق مونيتورينگ جانە ۇتىمدى ترانسشەكارالىق سۋ پايدالانۋ تەحنولوگيالارىن ەنگىزۋدى كوزدەيدى. «جاسىل كيبەرفەرما» ازىرلەمەسىن ماسكەۋ اۆياتسيا ينستيتۋتىنىڭ ستۋدەنتى ءامينا جەكسەمباەۆا تانىستىردى. جوبا تۇراقتى, جوعارى ءتيىمدى اۋىل شارۋاشىلىعىنا ارنالعان جاڭارتىلاتىن ەنەرگەتيكالىق روبوتتىق پلاتفورمانى ۇسىنادى.
تمد ۇكىمەتتەرى باسشىلارى كەڭەسىنىڭ كەلەسى وتىرىسى 2025 جىلدىڭ مامىر ايىندا دۋشانبە قالاسىندا وتەدى.
