دوڭگەلەك ۇستەل جۇمىسىنا ۇلتتىق عىلىم اكادەمياسىنىڭ باسشىلىعىندا بولعان عالىمدار, دەربەس عىلىم اكادەميالارىنىڭ باسشىلارى جانە عالىمدار قاتىستى.
ەل ەكونوميكاسىنىڭ دامۋىنا, قوعامداعى ماڭىزدى ماسەلەلەردى شەشۋگە عالىمداردى جۇمىلدىرا وتىرىپ, ۇعا الداعى باسىمدىقتارىن انىقتاپ, قازىرگى كەزدە عىلىمي جانە تالدامالىق زەرتتەۋلەردى ىسكە اسىرىپ كەلەدى.
باستاۋىندا اكادەميك قانىش ساتباەۆ تۇرعان ۇعا جاڭا تەحنولوگيالار, يننوۆاتسيالىق مۇمكىندىكتەرمەن ۇشتاستىرا وتىرىپ تىڭ جوبالاردى قولعا الدى. قازىرگى كەزدە پىكىرتالاس الاڭدارىندا كەلەلى ماسەلەلەردى تالقىلاپ, شەشۋ جولدارىن قاراستىرىپ جاتىر.
القالى جيىندا پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى, اكادەميك اقىلبەك كۇرىشباەۆ اۋقىمدى بايانداما جاساپ, عىلىمنىڭ دامۋى مەن عىلىمي ىقپالداستىق, جاس عالىمداردى ۇيلەستىرۋ سالاسىنداعى ماڭىزدى ىستەرگە توقتالىپ, اتقارىلعان جۇمىستارمەن تانىستىردى.
«قازىرگى كەزدە مەملەكەت باسشىسىنىڭ تاپسىرماسىنا سايكەس, الەمدەگى 20 جەتەكشى اكادەميا تاجىريبەسىن تالداي وتىرىپ, ءوز باعدارى مەن الداعى 10 جىلدا دامۋ ستراتەگياسىن ناقتى ينديكاتورلارمەن ايقىنداعان ۇعا حالىقارالىق تاجىريبە نەگىزىندە اكادەميا جۇمىسىنىڭ ناقتىلى مودەلىن جاسادى. قولدا بار رەسۋرستاردى قولدانىپ, تيىمدىلىگىن ارتتىرا وتىرىپ, قورىتىندىسىندا قانداي ناتيجەلەرگە قول جەتكىزۋگە بولاتىنىن زەرتتەپ, شەتەل اكادەميالارىنىڭ تاجىريبەسىنە نازار اۋدارىپ وتىر. اكادەميا عىلىم سالاسىنداعى ورىن العان بارلىق ولقىلىقتاردى انىقتاپ, عىلىمنىڭ باسىمدىقتارىنا كوڭىل ءبولىپ كەلەدى», دەپ اتاپ ءوتتى ا.كۇرىشباەۆ.
بايانداما بارىسىندا ۇعا باسشىسى سونىمەن قاتار العاش رەت عىلىمدى دامىتۋعا نەگىزدەلگەن فورسايت-زەرتتەۋلەر, وتاندىق عىلىمنىڭ ناقتى جاي-كۇيىن باعالايتىن تالداۋ ورتالىعىنىڭ جۇمىس ناتيجەلەرى تۋرالى ايتىپ ءوتتى. 2025-2027 جىلدارعا ارنالعان عىلىمي-تەحنيكالىق تاپسىرىس بارىسىنا ساراپتاما جاسالدى. مينيسترلىكتەرگە سالالىق عىلىمدى دامىتۋ بويىنشا ناقتى كەڭەستەر بەرىلىپ, تۇيتكىلدى ماسەلەلەرى بويىنشا اكادەميا پرەزيديۋمى كوشپەلى وتىرىستار وتكىزدى. مۇنداعى ماقسات ايماقتار بويىنشا جەرگىلىكتى بيلىك تاراپىنان دا عىلىمدى قولداۋ ىسىندە جارقىن باستامالاردىڭ بولعانى ماڭىزدى. وسى جۇمىستاردىڭ ناتيجەسىندە اناليتيكالىق جازبالار, جول كارتاسى دايىندالدى.
بيىل تاۋەلسىزدىك جىلدارىندا العاش رەت اكادەميا جانىنان جاس عالىمدار كەڭەسى قۇرىلعانى بەلگىلى. قازىر كەڭەس قۇرامىندا 20-دان استام جەتەكشى جاس عالىم بار. كەڭەس قۇرامىنداعى ومبۋدسمەن جاس عالىمداردىڭ ماسەلەلەرىنە ۇسىنىستار بەرىپ وتىراتىن بولادى.
جيىندا ەلىمىزگە بەلگىلى عالىمدار سەرىكبەك داۋكەەۆ, ءابدىراسىل جارمەنوۆ, كارىمبەك قۇرماناليەۆ, اسقاربەك قۇسايىنوۆ, باقىتجان جۇماعۇلوۆ, راحمان الشانوۆ, ۆياچەسلاۆ لوكشين, نۇرلان رىسپانوۆ, تاعى دا باسقا عالىمدار اكادەميا پرەزيدەنتىنىڭ بايانداماسىنا قاتىستى ويلارىن ءبىلدىرىپ, اكادەميا مىندەتتەرىنە قاتىستى جان-جاقتى پىكىر ءبىلدىردى. جاس عالىمداردى قولداۋ, ولارعا الەۋمەتتىك جاعداي جاساۋ, زەرتحانالاردى زاماناۋي جابدىقتاۋ, ورتا ءبىلىمنىڭ ساپاسىن ارتتىرۋ سياقتى ءبىر-بىرىنەن بولە جارىپ قاراۋعا بولمايتىن كەلەلى ماسەلەلەردى اعا عالىمدار ناقتى دالەلدەر كەلتىرە وتىرىپ العا تارتتى. بۇل باعىتتا حالىقارالىق بىرلەسكەن جوبالاردىڭ دا ماڭىزىنا يەك ارتقان ابزال.
بۇگىندە قىتاي, امەريكا, تۇركيا, رەسەي, تمد ەلدەرىنىڭ جەتەكشى عىلىم اكادەميالارىمەن ىنتىماقتاستىق تۋرالى كەلىسىمدەرگە قول قويعان ۇعا-دا گەرمانيا, وڭتۇستىك كورەيا, قىتايمەن بىرلەسكەن 3 حالىقارالىق ورتالىق قۇرىلدى. جەتەكشى 8 اكادەميانىڭ تاجىريبەسى نەگىزىندە عىلىمي ەتيكا كودەكسى – عىلىمي زەرتتەۋلەردى جۇرگىزۋ ستاندارتى دايىندالدى. فالسيفيكاتسيانى, پلاگياتتى, مۇددەلەر قاقتىعىسىن جانە جالعان بىرلەسكەن اۆتورلىقتى انىقتاۋدىڭ قاعيداتتارى بەكىتىلدى.
ەندىگى كەزەكتە عىلىمي بىرلەستىكتەر ۇلتتىق عىلىم اكادەمياسىمەن بىرلەستىكتە جۇمىس ىستەۋگە دايار. جاس عالىمدارعا كەڭەس بەرىپ, ولاردى عىلىم كوشىنەن قالماۋدا قولداۋ كورسەتەتىن بولادى. عالىمدار عىلىمي تەحنولوگيالىق دامۋدا قول قويىلعان مەموراندۋمدارعا سايكەس جول كارتاسى اياسىندا جۇمىستاردى جالعاستىراتىن بولادى.
الماتى
