1978 جىلى قۇرىلعان ونەر ۇجىمىنىڭ استارلى ءازىلىن, ۋىتتى قويىلىمدارىن تاماشالاۋعا كەلگەندەردىڭ قاتارى قالىڭ بولدى. تاماشا اكتەرلەرى قوعامداعى ءتۇرلى كەلەڭسىز جاعدايلاردى ازىلگە اينالدىرىپ, جينالعانداردىڭ ەزۋىنە كۇلكى ءۇيىردى. كورەرمەن دە سان جىلدار بويى ساعىنعان اكتەرلەرىن كورىپ, ۇزاق شاپالاق سوعىپ قۇرمەت كورسەتتى.
ساحنا شىمىلدىعىن تۇڭعىشباي جامانقۇلوۆ پەن ليديا كادەنوۆا اشتى. گۇلباۋشان تىلەۋبەكوۆا, داناگۇل تەمىرسۇلتانوۆا, اسىلبەك بورانباي, مارات كوككوزوۆ, نۇرجان تۇتوۆ كورەرمەندەرگە ءازىل-قالجىڭىن ايتىپ, كوڭىلدەرىن ءبىر جەلپىندىرىپ تاستادى. ءبىر كەزدەرى ويناعان قويىلىمدارىن قايتا قويىپ كورەرمەندى وتكەن جىلدارعا جەتەلەپ, كۇلكىگە قارق ەتتى.
«تاماشا بولادى دەگەندى ەستي سالا, بيلەت الدىق. كەش كەرەمەت ءوتتى. بۇگىن رەسپۋبليكا سارايىنا جينالعان قاۋىم ەرەكشە نوستالگياعا بولەندى دەپ ويلايمىن. اكتەرلەردىڭ ونەرىن تاماشالاپ وتىرىپ, بۇرىنعى كەزدەر كوز الدىما ەلەستەدى. ساعىنىپ قالىپپىز», دەيدى الماتىلىق كورەرمەن ءرازيا قىدىربايقىزى.
جۇزدەگەن تالانتىڭ جۇلدىزىن جاققان «تاماشا» ءازىل-سىقاق تەاترىنىڭ مەرەيتويىنا ارنالعان كەشتە روزا رىمباەۆا, ايجان نۇرماعامبەتوۆا, ۇلىقپان جولداسوۆ, تامارا اسار, تولقىن زابيروۆا سىندى انشىلەر مەن «دوس-مۇقاسان», «ۇركەر» توبىنىڭ ورىنداۋىنداعى اندەر كەشتىڭ اجارىن اشا ءتۇستى.
«قازىر جاس ءازىل-سىقاق تەاترى كوپ. بىراق «تاماشانىڭ» ورنى بولەك. بۇگىن ءبىزدىڭ سۇيىكتى تەاترىمىز قايتا ورالدى. «تاماشانىڭ» ساحاناسىن ساعىندىق. «تاماشا» جاساي بەرسىن», دەدى روزا رىمباەۆا.
استارلى ءازىل, وي سالارلىق قالجىڭىمەن كورەرمەننىڭ جۇرەگىنەن جول تاۋىپ, كوپشىلىكتىڭ سۇيىسپەنشىلىگىنە بولەنگەن تەاتردىڭ كەشىنە كەلگەن ونەر سۇيەر قاۋىم قيماستىق كوڭىلمەن تارقاستى.
دۋماندى كەشتىڭ تەلەۆيزيالىق نۇسقاسىن 31 جەلتوقسان كۇنى «Jibek Joly» ارناسىنان كورۋگە بولادى.
ەسكە سالايىق, 30 قاراشادان باستاپ Jibek Joly تەلەارناسىنان اتى اڭىزعا اينالعان «تاماشا» تۋرالى سەريال كورسەتىلە باستادى.
