سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
حرومتاۋدىڭ تىنىس-تىرشىلىگى
پرەزيدەنتتىڭ جۇمىس ساپارى حرومتاۋ قالاسىنداعى «بولاشاق» شاحتاسىن ارالاپ كورۋدەن باستالدى. شاحتانىڭ قۋاتى جىلىنا 7,5 ملن توننا حروم رۋداسىن وندىرۋگە جەتەدى.
مەملەكەت باسشىسىنا جاڭا نىساندا 1 800 جۇمىس ورنى قۇرىلاتىنى جونىندە مالىمەت بەرىلدى. تارتىلاتىن ينۆەستيتسيا كولەمى 1 ترلن تەڭگەدەن اسادى.
Eurasian Resources Group ديرەكتورلار كەڭەسىنىڭ توراعاسى شۋحرات يبراگيموۆ «بولاشاق» شاحتاسى ERG كومپانيالار توبىنىڭ ءىرى ينۆەستيتسيالىق جوبالارىنىڭ ءبىرى سانالاتىنىن اتاپ ءوتتى.
كاسىپورىن «ميلليوننوە» جانە «الماس-جەمچۋجينا» كەن ورىندارىن يگەرۋمەن اينالىسادى. كەن قازۋ ىسىنە اۆتوماتتى رەجىمدە بۇرعىلايتىن ينتەللەكتۋالدى بۇرعىلاۋ قوندىرعىسى, قاشىقتان جەر ۇستىندە باسقارۋ جۇيەسى, سونداي-اق تولىقتاي اۆتوماتتاندىرىلعان جۇك كوتەرۋ ماشينالارى سەكىلدى وزىق تەحنولوگيالار مەن زاماناۋي قۇرال-جابدىقتار قولدانىلادى. كومپانيا باسشىسىنىڭ ايتۋىنشا, ءدوڭ تاۋ-كەن بايىتۋ كومبيناتىنا قاراستى «بولاشاق» شاحتاسىن ىسكە قوسۋ ەلىمىزدىڭ تاۋ-كەن ونەركاسىبىندەگى تاريحي وقيعا بولماق.
بۇدان كەيىن قاسىم-جومارت توقاەۆ حرومتاۋ جوعارى تاۋ-كەن تەحنيكالىق كوللەدجىنە باردى. پرەزيدەنتكە بۇل ءبىلىم وشاعى ەلىمىزدىڭ باتىس وڭىرىندەگى تاۋ-كەن سالاسىنا ماماندار دايارلايتىن جالعىز كاسىپتىك وقۋ ورنى ەكەنى باياندالدى. 1979 جىلى نەگىزى قالانعان كوللەدجدە 1 157 ستۋدەنت كەنشى, ۇڭعىلاۋشى, كەن بايىتۋشى, سلەسار, تاۋ-كەن ەلەكتر مەحانيگى, ەلەكتر مونتەرى جانە باسقا دا ماماندىقتار بويىنشا ءبىلىم الىپ جاتىر.
وقۋ ورنىنىڭ ديرەكتورى باعداشجان مولداشەۆا مەملەكەت باسشىسىنا ءبىلىم بەرۋ ۇدەرىسىندە قولدانىلاتىن وزىق تەحنولوگيالار جونىندە مالىمەت بەردى. اتاپ ايتقاندا, كوللەدجدە تەوريالىق ءبىلىمدى تاجىريبەمەن ۇشتاستىراتىن دۋالدى وقىتۋ جۇيەسى ەنگىزىلگەن. ستۋدەنتتەر كوللەدج اۋماعىنداعى وقۋ-شاحتا پوليگونىندا وندىرىستىك تاجىريبەدەن ءوتىپ, تەحنيكامەن جۇمىس ىستەۋدىڭ كۇردەلى ءادىس-تاسىلدەرىن مەڭگەرەدى. سونداي-اق جاتتىقتىرۋشى-سيمۋلياتورلار ارقىلى شاحتاداعى جاعدايعا بارىنشا ۇقساس ورتادا جۇمىس داعدىلارىن ۇيرەنەدى.
قاسىم-جومارت توقاەۆ كوللەدج جۇمىسىمەن تانىسقاننان سوڭ ستۋدەنتتەرمەن جانە تۇلەكتەرمەن كەزدەستى. اڭگىمەلەسۋ بارىسىندا مەملەكەت باسشىسى دۋالدى وقىتۋ جۇيەسىنىڭ اسا قاجەت ەكەنىن جەتكىزىپ, اتالعان كوللەدجدەگى تەوريا مەن ءوندىرىستى ۇشتاستىرۋ ارقىلى جۇرگىزىلىپ كەلە جاتقان ءبىلىم بەرۋ ىسىنە جوعارى باعا بەردى.
پرەزيدەنت تاۋ-كەن سالاسى ەل ەكونوميكاسىنىڭ ماڭىزدى بولىگى ەكەنىنە توقتالدى. قاسىم-جومارت توقاەۆتىڭ ايتۋىنشا, «جۇمىسشى ماماندىقتارى جىلى» بولىپ جاريالانعان 2025 جىلى وتاندىق ونەركاسىپتى قولداۋعا باسا نازار اۋدارىلادى.
مەملەكەت باسشىسى ارالاپ كورگەن كەلەسى جەر – №1 حرومتاۋ ورتا مەكتەبى. قاسىم-جومارت توقاەۆ مەكتەپتىڭ ءبىلىم بەرۋ ىسىندەگى ەرەكشەلىكتەرىمەن جانە وقۋشىلاردىڭ زەرتحانالىق جۇمىستارىمەن تانىستى.
پرەزيدەنتكە بۇل وقۋ ورداسى «اقتوبە وبلىسىنىڭ شاعىن جيناقتى اۋىل مەكتەپتەرىنىڭ الەۋەتىن تسيفرلىق تەحنولوگيالاردى قولدانا وتىرىپ دامىتۋ» قاناتقاقتى جوباسىنا ەنگىزىلگەنى جونىندە اقپارات بەرىلدى.
قاناتقاقتى جوبا شاعىن جيناقتى مەكتەپتەردە تسيفرلىق تەحنولوگيالاردى قولدانۋ ارقىلى ءبىلىم بەرۋدىڭ ساپاسى مەن وقىتۋدىڭ تيىمدىلىگىن ارتتىرۋعا باعىتتالعان. جوبا اياسىندا مۇعالىمدەر قاشىقتان تاجىريبە الماسادى.
مەملەكەت باسشىسى اتالعان ءبىلىم وشاعىنداعى جانە باسقا دا اۋىل مەكتەپتەرىندەگى وقۋشىلاردىڭ اشىق ساباعىنا ونلاين-رەجىمدە قاتىستى.
بۇدان كەيىن قاسىم-جومارت توقاەۆ شالعاي ەلدى مەكەندەردە تۇراتىن بالالاردىڭ ءبىلىم الۋىنا قولايلى جاعداي جاساۋ ءۇشىن مەكتەپكە اۆتوبۋس سىيعا تارتتى.
ايماق ەكونوميكاسىنىڭ بيىلعى ءوسىمى – 6 پايىز
سونىمەن قاتار مەملەكەت باسشىسى اقتوبە قالاسىنداعى بولات قۇبىرلارىن شىعاراتىن زاۋىتتىڭ جۇمىسىمەن تانىستى. كاسىپورىن جىلىنا 20 مىڭ توننا ءونىم وندىرەدى. قۇنى 3,5 ملرد تەڭگە بولاتىن نىسان بيىل شىلدە ايىندا پايدالانۋعا بەرىلگەن. زاۋىت قۇرىلتايشىسى ميرعالي بۋرباەۆتىڭ ايتۋىنشا, قازىر ءوندىرىس ورنىندا قۇبىرلاردى, مەتالل ازىرلەمەلەرىن دايىندايتىن قوندىرعىلار ىسكە قوسىلعان.
پرەزيدەنتكە زاۋىتتى دامىتۋدىڭ ۇزاقمەرزىمدى جوسپارى باياندالدى. كاسىپورىن الداعى ۋاقىتتا شىعارىلاتىن ءونىم تۇرلەرىن كوبەيتىپ, تسەحتاردىڭ قۋاتىن ارتتىرۋدى كوزدەپ وتىر.
سونىمەن قاتار قاسىم-جومارت توقاەۆ جەرگىلىكتى تاۋار وندىرۋشىلەردىڭ كورمەسىن ارالادى. كورمەگە ءوندىرىس جانە تەمىرجول سالاسىنا ارنالعان جابدىقتار, سونداي-اق مەديتسينالىق قوندىرعىلار مەن ءدارى-دارمەكتەر, ارنايى كيىمدەر, تۇرمىستىق حيميا, سانتەحنيكا بۇيىمدارىن شىعاراتىن كاسىپورىنداردىڭ ونىمدەرى قويىلعان.
بۇدان كەيىن پرەزيدەنتكە اقتوبە وبلىسىنىڭ اكىمى اسحات شاحاروۆ ءوڭىردىڭ الەۋمەتتىك-ەكونوميكالىق دامۋى تۋرالى باياندادى.
وبلىس باسشىسىنىڭ ايتۋىنشا, بيىلعى 11 ايدا ايماق ەكونوميكاسىنىڭ ءوسىمى 6 پايىزدى قۇراعان. ال ونەركاسىپ ءوندىرىسى 4 پايىزعا ارتىپ, وسى جىلدىڭ التى ايىندا شەتەلدەن تارتىلعان تىكەلەي ينۆەستيتسيا كولەمى 175 ملن دوللارعا جەتكەن.
پرەزيدەنتكە اقتوبە قالاسىنىڭ اۋەجايىن مۋلتيمودالدى حاب رەتىندە دامىتۋ ءۇشىن مۇندا ارنايى ەكونوميكالىق ايماق قۇرىلاتىنى جونىندە مالىمەت بەرىلدى. بۇل جوباعا 1,2 ترلن تەڭگەدەن اسا ينۆەستيتسيا تارتىپ, 5 مىڭ جۇمىس ورنىن اشۋ جوسپارلانعان.
وبلىس اكىمى مەملەكەت باسشىسىنا وڭىردە جۇزەگە اسىرىلىپ جاتقان جانە 2025–2027 جىلدارعا جوسپارلانعان ينۆەستيتسيالىق جوبالار تۋرالى دا ايتتى.
سونىمەن قاتار قاسىم-جومارت توقاەۆقا اقتوبە قالاسىندا سالىناتىن جاڭا قۇرىلىس نىساندارىنىڭ ماكەتى تانىستىرىلدى. پرەزيدەنت تاپسىرماسىنا ساي, شاھاردا 700 ورىندىق دراما تەاترى جانە 35 مىڭ كورەرمەنگە ارنالعان كوپفۋنكتسيونالدى ستاديون بوي كوتەرمەك.
مەملەكەت باسشىسى كەلەسى كەزەكتە اقتوبە قالالىق پوليتسيا دەپارتامەنتىنىڭ جەدەل باسقارۋ ورتالىعىنىڭ عيماراتىن ارالاپ كوردى.
نىسان وڭىردەگى 15 مىڭعا جۋىق بەينەكامەرا ارقىلى جەرگىلىكتى جەردەگى احۋالدى ناقتى ۋاقىت رەجىمىندە تاۋلىك بويى باقىلاۋعا مۇمكىندىك بەرەدى. ورتالىقتىڭ جەدەل زالىندا 32 ينسپەكتور مەن «102» شۇعىل جەلىسىنىڭ 3 وپەراتورى جۇمىس ىستەيدى.
قاسىم-جومارت توقاەۆقا ىشكى ىستەر ءمينيسترىنىڭ ورىنباسارى ساكەن سارسەنوۆ پوليتسيا قىزمەتىندە قولدانىلىپ جاتقان تسيفرلىق جوبالار تۋرالى باياندادى.
قازىر اقتوبە وبلىسىندا 5 جەدەل باسقارۋ ورتالىعى جۇمىس ىستەپ تۇر. وسى ورتالىقتار ارقىلى وڭىردە 1,8 مىڭ قىلمىستىق قۇقىق بۇزۋشىلىق اشىلىپ, 187 مىڭ جول ءجۇرۋ ەرەجەسىن بۇزۋ فاكتىسى انىقتالعان.
سونىمەن قاتار پرەزيدەنتكە ىشكى ىستەر ورگاندارى قىزمەتىنىڭ تيىمدىلىگىن ارتتىرۋ ءۇشىن جاساندى ينتەللەكت تەحنولوگياسى قولدانىلا باستاعانى تۋرالى مالىمەت بەرىلدى. اتالعان تەحنولوگيا باقىلاۋ كامەرالارىنداعى بەينەگە تالداۋ جۇرگىزىپ, جوعالىپ كەتكەن ازاماتتاردى تابۋعا كومەكتەسەدى. سونداي-اق ارنايى پلاتفورماعا جۇكتەلگەن فوتوسۋرەتتەر ارقىلى كۇدىكتىلەردىڭ بەت-بەينەسىن تانىپ, قاجەتتى مالىمەتتەردى دە ۇسىنادى. بۇدان بولەك جول ءجۇرۋ ەرەجەسىن بۇزۋ فاكتىلەرىن تىركەپ, كولىك قوزعالىسىن قاداعالاۋعا جاردەمدەسەدى.
مەملەكەت باسشىسى وسى باعىتتاعى جۇمىستى جالعاستىرۋ قاجەت ەكەنىن ايتىپ, قوعامدا زاڭ مەن ءتارتىپتىڭ ۇستەمدىگىن قامتاماسىز ەتۋدىڭ ماڭىزىنا نازار اۋداردى.
سونىمەن قاتار پرەزيدەنت اقتوبە وبلىستىق پەريناتالدىق ورتالىعىنىڭ قىزمەتىمەن تانىستى.
مەديتسينالىق نىساندا جىلىنا 8 200 نارەستە دۇنيەگە كەلىپ, 13 مىڭنان اسا ادام ەم الادى. سونىمەن قاتار «اڭساعان ءسابي» جوباسى اياسىندا جىلىنا 130 ەكۇ جاسالادى. ال ەرتە ارالاسۋ ورتالىعىندا 200 بالا وڭالتۋ شارالارىمەن قامتىلادى.
پرەزيدەنتكە ورتالىقتا تۋا بىتكەن سىرقاتى بار نارەستەلەرگە 50 كارديوحيرۋرگيالىق جانە وفتالمولوگيالىق وتا جاسالعانى تۋرالى مالىمەت بەرىلدى. ورتالىق اشىلعانعا دەيىن مۇنداي دياگنوزى بار سابيلەر استانا قالاسىندا ەمدەلگەن.
قاسىم-جومارت توقاەۆقا مەكەمەدە جىل باسىنان بەرى جۇزەگە اسىرىلىپ جاتقان ء«بىر كۇندىك كلينيكا» جوباسى تانىستىرىلدى. اتالعان باستاما قانمەن بەرىلەتىن اۋرۋلاردى ەرتە باستان انىقتاۋعا كومەكتەسەدى. وسى جوبا اياسىندا بۇگىنگە دەيىن 6 مىڭ ايەل مەديتسينالىق تەكسەرۋدەن وتكەن.
مەملەكەت باسشىسى مەكەمە قىزمەتكەرلەرىمەن اڭگىمەلەسىپ, ولاردىڭ جۇمىسىنا تابىس تىلەدى.
بۇعان قوسا پرەزيدەنت اقتوبە قالاسىنداعى «حيميك» ستاديونىنىڭ بازاسىندا اشىلعان بالالار فۋتبول اكادەمياسىنا باردى.
زاماناۋي ۇلگىدە جابدىقتالعان نىساندا جىل بويى سپورتپەن اينالىسۋعا جاعداي جاسالعان. اكادەميادا قازىر 780 بالا ۇزدىك حالىقارالىق تاجىريبە بويىنشا جاتتىعادى. وندا سپورت زالدارى, اكىمشىلىك, وڭالتۋ, ەم-دوم جانە باسقا دا قىزمەت كورسەتۋ كابينەتتەرى ورنالاسقان.
مەملەكەت باسشىسى اكادەميانى ارالاپ كورىپ, جاسوسپىرىمدەرمەن جانە جاتتىقتىرۋشىلارمەن اڭگىمەلەستى. قاسىم-جومارت توقاەۆ بالالاردى زياندى ارەكەتتەردەن ساقتاۋ ءۇشىن ولاردى سپورتقا كوپتەپ تارتۋدىڭ ماڭىزى زور ەكەنىن ايتتى.
