جاڭا جىلدان باستاپ ارناۋلى الەۋمەتتىك قىزمەتتەردى ليتسەنزيالاۋ ەنگىزىلەدى

بۇل قىزمەت كورسەتۋ ساپاسىن جاقسارتۋعا جاعداي جاسايدى جانە وسى سالاداعى بۇزۋشىلىقتار سانىن ازايتۋعا وڭ ىقپال ەتەدى. الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتى (بۇدان ءارى – كوميتەت) جۇرگىزگەن ليتسەنزيا الدىنداعى تالداۋ ناتيجەلەرى بويىنشا ااق كورسەتەتىن 1007 ۇيىمنىڭ 72,3% - ى تالاپتارعا سايكەس كەلەتىنى انىقتالدى.

ليتسەنزيالاۋدى ەنگىزۋ ارناۋلى الەۋمەتتىك قىزمەتتەر كورسەتۋ جۇيەسىن جاڭعىرتۋ كەزەڭدەرىنىڭ ءبىرى بولىپ تابىلادى جانە ول: كورسەتىلەتىن قىزمەتتەردىڭ ساپاسىن ارتتىرۋعا; كورسەتىلەتىن قىزمەتتى الۋشىلاردىڭ قاۋىپسىزدىگى مەن قۇقىقتارىن قورعاۋعا كەپىلدىك بەرۋگە; ااق ۇسىناتىن ۇيىمدار ءۇشىن بىرىڭعاي ستاندارتتاردى بەلگىلەۋگە باعىتتالعان.

«وسى قىزمەتتەردى كورسەتەتىن ۇيىمداردىڭ مەنشىك نىسانىنا قاراماستان, ااق-نىڭ ءتيىستى ساپاسىن قامتاماسىز ەتۋ قاجەتتىگى كوپتەن بەرى تۋىنداپ كەلەدى. بۇل ورايدا وتكەن جىلى ارناۋلى الەۋمەتتىك قىزمەت كورسەتۋ ورتالىقتارىنىڭ بىرىندە مۇگەدەكتىگى بار بالالاردىڭ تاعامنان ۋلانىپ, ءتىپتى ادام شىعىنى ورىن العان قايعىلى وقيعانى ەسكە تۇسىرسەك جەتكىلىكتى. جۇرگىزىلگەن كەشەندى تەكسەرۋ ناتيجەلەرى بويىنشا وسى ۇيىمدا مۇگەدەكتىگى بار بالالاردىڭ قۇقىقتارى ورەسكەل بۇزىلعانى انىقتالدى: تۇرمىستىق قىزمەتتەر تولىق كولەمدە كورسەتىلمەگەن; توسەك-ورىن, كيىم جانە اياق كيىم بەرۋدىڭ مينيمالدى نورمالارى ساقتالماعان; سكرينينگتىك تەكسەرۋلەر جۇرگىزىلمەگەن; تاماقتانۋ نورمالارى بۇزىلعان.

2024 جىلدىڭ 11 ايىندا جۇرگىزىلگەن 167 تەكسەرۋ ناتيجەسىندە 148 سۋبەكتىگە انىقتالعان بۇزۋشىلىقتاردى جويۋ تۋرالى نۇسقاما بەرىلىپ, جالپى سوماسى 1,75 ملن تەڭگەگە 15 ايىپپۇل سالىندى», دەدى كوميتەت توراعاسى تولەگەن وسپانقۇلوۆ.

ول ااق ساپاسى ەكى نەگىزگى فاكتورعا تىكەلەي بايلانىستى ەكەنىن اتاپ ءوتتى: قىزمەتكەرلەردىڭ كاسىبي بىلىكتىلىك دەڭگەيى جانە قىزمەت كورسەتەتىن ۇيىمداردىڭ بەلگىلەنگەن تالاپتارعا سايكەستىگى.

«بۇگىنگى تاڭدا رەسپۋبليكا بويىنشا حالىقتى الەۋمەتتىك قورعاۋ سالاسىندا قىزمەت ەتەتىن 12,7 مىڭ الەۋمەتتىك قىزمەتكەر بار. ولاردىڭ تەك 12%-نىڭ بەيىندىك ءبىلىمى بار, قالعان 88%-ىندا مەديتسينالىق, پەداگوگيكالىق, ەكونوميكالىق جانە ت. ب. ءبىلىم بار.

كادرلاردىڭ ساپاسىن ارتتىرۋ ءۇشىن بيىل الەۋمەتتىك قىزمەتكەرلەرگە قويىلاتىن تالاپتاردى بەلگىلەيتىن كاسىپتىك ستاندارت ازىرلەندى. بيىل 8,3 مىڭنان استام الەۋمەتتىك قىزمەتكەر بەيىندىك وقىتۋدان ءوتىپ, سەرتيفيكاتتار الدى. 2025 جىلدان باستاپ الەۋمەتتىك قىزمەتكەرلەردىڭ ءتىزىلىمى ەنگىزىلەدى, وندا ولاردىڭ كاسىبي قۇزىرەتىنە قاتىستى بارلىق دەرەكتەر كورسەتىلەدى. سونداي-اق, كەلەسى جىلدان باستاپ الەۋمەتتىك قىزمەتكەرلەر ەڭبەك جانە حالىقتى الەۋمەتتىك قورعاۋ مينيسترلىگىمەن مەموراندۋمدار جاسالعان مامانداندىرىلعان كافەدرالارى بار رەسپۋبليكانىڭ 14 جوعارى وقۋ ورنىنىڭ بازاسىندا قايتا دايارلاۋدان جانە بىلىكتىلىگىن ارتتىرۋدان وتە الادى.

ال ااق كورسەتەتىن ۇيىمداردا ءتيىستى جاعدايلار جاساۋ ماسەلەلەرىن شەشۋ ءۇشىن 2025 جىلدان باستاپ ليتسەنزيالاۋ ەنگىزىلۋدە», دەپ اتاپ ءوتتى كوميتەت توراعاسى.

ليتسەنزيا الۋدىڭ نەگىزگى شارتتارىنىڭ ءبىرى رەتىندە مىنالار انىقتالدى: ااق ۇسىنۋعا جارامدى جانە سانيتارلىق ەرەجەلەرگە, ءورت قاۋىپسىزدىگى ەرەجەلەرىنە سايكەس كەلەتىن عيماراتتىڭ بولۋى; كورسەتىلەتىن قىزمەتتەردىڭ ءتيىستى ساپاسىن قامتاماسىز ەتەتىن قاجەتتى ماتەريالدىق-تەحنيكالىق بازانىڭ بولۋى; قىزمەتكەرلەر قۇرامىنىڭ بولۋى; حالىقتىڭ از قوزعالاتىن توپتارى ءۇشىن عيماراتتاردىڭ قولجەتىمدىلىگىن قامتاماسىز ەتۋ جانە ت. ب.

وسى جىلدىڭ قازان ايىنان باستاپ كوميتەتتىڭ اۋماقتىق دەپارتامەنتتەرى ليتسەنزيالاۋ الدىنداعى تالداۋ جۇرگىزۋدە, ونىڭ بارىسىندا ااق كورسەتەتىن 1007 ۇيىمنىڭ 72,3% ليتسەنزيالاۋ شارتتارىنا تولىق سايكەس كەلەتىندىگى انىقتالدى.

جەرگىلىكتى اتقارۋشى ورگاندار مەملەكەتتىك ارناۋلى قىزمەت كورسەتۋ ورتالىقتارىن بەلگىلەنگەن تالاپتارعا سايكەس كەلتىرۋ بويىنشا جۇمىس جۇرگىزۋدە.

بۇل رەتتە ۇەۇ ۇسىناتىن ۇكىمەتتىك ەمەس سەكتور ۇيىمدارىنىڭ ىشىنەن ءورت قاۋىپسىزدىگى اكتىلەرى جوق 86 وبەكت انىقتالدى, 70-ءنىڭ سەس قورىتىندىلارى جوق, 87 ۇيىمنىڭ عيماراتتارىندا مۇگەدەكتىگى بار ادامدار ءۇشىن قولجەتىمدىلىك قاراستىرىلماعان. 

ء«بىز اكىمدىكتەرمەن جانە ۇەۇ-مەن ليتسەنزيالاۋعا دايىندىق ماسەلەلەرىن پىسىقتاۋدى جالعاستىرامىز, ليتسەنزيالاۋ الدىنداعى باقىلاۋدان ءوتۋ بولىگىندە قاجەتتى كونسۋلتاتسيالار مەن سۇيەمەلدەۋ كورسەتەمىز.  ۇيىمداردى ليتسەنزيالاۋ ءبىرىنشى كەزەكتە كورسەتىلەتىن ااق ساپاسىن قامتاماسىز ەتۋگە مۇمكىندىك بەرەدى, ەكىنشىدەن, مۇگەدەكتىگى بار ادامداردى جانە كورسەتىلەتىن قىزمەتتى الۋشىلاردىڭ وزگە دە ساناتتارىن قوعام ومىرىنە ودان ءارى ىقپالداستىرا وتىرىپ, ولاردى الەۋمەتتىك وڭالتۋدىڭ تيىمدىلىگىن قامتاماسىز ەتەدى», دەپ اتاپ ءوتتى تولەگەن وسپانقۇلوۆ.