سۋرەت: gov.kz
«Mercer CFA» ينستيتۋتى جاھاندىق زەينەتاقى يندەكسىن 50-دەن استام ينديكاتوردى قامتيتىن ءۇش قوسالقى يندەكس ارقىلى باعالاعان. وسى ينديكاتورلار ارقىلى زەينەتاقى جۇيەلەرىن وبەكتيۆتى باعالاۋعا ەىدۇ, دۇنيەجۇزىلىك بانك, حالىقارالىق ەڭبەك ۇيىمى, Economist Group زەرتتەۋ جانە تالداۋ بولىمشەسى سياقتى بىرنەشە ۇيىمنىڭ دەرەگىن قامتيتىن اشىق حالىقارالىق كوزدەردەن الىنعان مالىمەتتەر پايدالانىلعان. ينديكاتور بويىنشا 64 بالل جيناعان ەلىمىز بيىل زەينەتاقى جۇيەلەرىنىڭ رەيتينگىندە اقش, يسپانيا, جاپونيا, وڭتۇستىك كورەيا, قىتاي, ساۋد ارابياسى, باسقا دا ەلدەردەن وزىپ, «س+» دەگەن باعا الىپتى. Mercer CFA ينستيتۋتى ەلىمىزدەگى زەينەتاقى جۇيەسىن ودان ءارى جەتىلدىرۋگە قاتىستى بىرنەشە ۇسىنىس جاساپتى. ونىڭ ىشىندە كەدەي زەينەتكەرلەردى قولداۋدىڭ ەڭ تومەنگى دەڭگەيىن ارتتىرۋ, زەينەتاقى جيناقتارىنا قول جەتكىزۋدى شەكتەۋ ارقىلى زەينەتكە شىعار الدىنداعى كەزەڭدە جيناقتاردىڭ شىعىس اعىنىن قىسقارتۋ, ءومىر ءسۇرۋ ۇزاقتىعى ۇلعايعان سايىن ەگدە جاستاعى ادامداردىڭ جۇمىس كۇشىنە قاتىسۋ دەڭگەيىن ارتتىرۋ, زەينەتاقى جۇيەسىنە قاتىسۋشىلاردىڭ جىلدىق ءۇزىندى كوشىرمەلەرىندە بولجامدى زەينەتاقى تولەمدەرىن كورسەتۋ جونىندە تالاپتار ەنگىزۋ سىندى ۇسىنىستار بار.
جاھاندىق زەينەتاقى يندەكسىندە بالا تۋدىڭ تومەندەۋىنە, ءومىر ءسۇرۋ ۇزاقتىعىنىڭ ۇلعايۋىنا قاتىستى جالعاسىپ جاتقان ۇردىستەردى ەسكەرە وتىرىپ, زەينەتاقى جۇيەلەرىن جەتىلدىرۋ كەزەك كۇتتىرمەيتىن ماسەلە ەكەنى اشىپ ايتىلعان. سەبەبى ادامزات تاريحىندا العاش رەت 65 جاستاعى جانە ودان ەگدە ادامدار سانى 5 جانە ودان كىشى جاستاعى بالالارعا قاراعاندا كوبىرەك تىركەلگەن.
ەسكە سالار بولساق, بىلتىر ەلىمىزدىڭ زەينەتاقى جۇيەسى العاش رەت Mercer CFA ينستيتۋتىنىڭ جاھاندىق زەينەتاقى يندەكسىنە ەنگىزىلىپ, بىردەن 64,9 بالل جيناعان ەدى. بيىلعى زەرتتەۋلەردىڭ قورىتىندىسى بويىنشا ەلىمىز ءتىزىمنىڭ بەل ورتاسىنداعى ورىندى يەلەنىپ وتىر. بۇل قاتاردا ءبىرىنشى ورىندى نيدەرلاندتىڭ زەينەتاقى جۇيەسى ساقتاپ, 84,8 بالل جينادى. بۇل ەل 2028 جىلعا قاراي بارلىق زەينەتاقى جوسپارىن جيناقتاۋشى جۇيەگە (DC) تولىق كوشىرۋدى جوسپارلاپ وتىر.
