قازىرگى ۋاقىتتا ەلىمىزدە تازا ەنەرگياعا دەگەن كوزقاراس وزگەردى. ونىڭ ءبىر دالەلى بيىلعى قازان ايىندا وتكەن بەيبىت اتوم ەلەكتر ستانساسىن سالۋعا قاتىستى وتكەن جالپى حالىقتىق رەفەرەندۋمدا كورىنىس تاپتى. ال تاياۋدا استانا قالاسى اكىمدىگى «ورتالىقتاندىرىلعان كىتاپحانالار جۇيەسىنە» قاراستى ورتالىق بالالار جانە جاسوسپىرىمدەر كىتاپحاناسىندا «قازاقستاندىق اتوم ەلەكتر ستانسالارى» جشس-مەن بىرلەسىپ, تازا ەنەرگيا تاقىرىبىنا ارنالعان كىتاپتاردان ارنايى كىتاپ كورمەسى ءوتتى.
ۇيىمداستىرۋشىلاردىڭ ايتۋىنشا, بۇل اعارتۋشى ءىس-شارا ءبىر كۇندىك قانا ەمەس. انىعىندا كورمە ءبىر اي بويى كىتاپحانا وقىرماندارىنا قولجەتىمدى بولادى. سونداي-اق كىتاپحانا وقىرماندارىنا «اەس: تۇراقتى ەنەرگيا» اتتى ارنايى دايىندالعان 20 مينۋتتىق فيلم كورسەتىلدى.
ونداعى ماقسات – اتوم ەلەكتر ستانساسىنىڭ الداعى جۇمىسى تۋرالى كوپشىلىك نازارىنا تولىققاندى اقپارات ۇسىنۋ. حالىق اراسىندا تازا ەنەرگيا ءوندىرۋ جولى اەس-كە قاتىستى ءۇستىرتىن اڭگىمەلەر ايتىلعانمەن, عالىمدار دالەلدەگەن, عىلىمي ەڭبەكتەر مەن دەرەكتى فيلمدەر ايتارلىقتاي كوپ ەمەس. سوندىقتان عىلىمي تۇرعىدا دۇرىس تۇسىنىك قالىپتاستىرۋ ماقساتىمەن وسى دەرەكتى فيلم كورسەتىلدى.
ىزگىلىكتى ءىس-شاراعا «قاەس» جشس جەتەكشى ينجەنەرى اسۋان سيابەكوۆ قاتىسىپ, ەلىمىزدىڭ تازا ەنەرگيا كوزىنە دەگەن مەملەكەتتىك ۇستانىمىن, سونداي-اق جاھاندىق جىلىنۋعا قاتىستى حالىقارالىق كەلىسىمدەر مەن شارتتار جونىندە تۇسىنىك بەردى. ءسويتىپ, جينالعان اۋديتورياعا تازا ەنەرگيانىڭ ەل ومىرىندەگى ءرولى مەن بۇگىنى جانە بولاشاعى تۋرالى كەڭىنەن تارقاتىپ اڭگىمەلەدى.
«اتوم ەلەكتر ستانساسى – بىلە بىلگەنگە, ەل ءۇشىن ۇزاق مەرزىمدى پايدا كوزى. ونەركاسىپ پەن ەل ەكونوميكاسى ءۇشىن ماڭىزدى ءارى قاجەتتى پەرسپەكتيۆالىق جوبا. قازىر ەلىمىزدە قاۋىپسىزدىك دەڭگەيى جوعارى جاڭا بۋىندى اەس سالۋ مۇمكىندىگى قاراستىرىلىپ جاتىر. سونىمەن قاتار نىساندى سالۋ جانە پايدالانۋعا قاتىستى بارلىق ۇدەرىس بۇكىل وركەنيەتتى الەمدە قولدانىلاتىن حالىقارالىق قاۋىمداستىق ازىرلەگەن ەرەجەلەر مەن تالاپتارعا سايكەس جۇزەگە اسىرىلادى», دەدى ينجەنەر.
ونىڭ ايتقانىنا قۇلاق قويساق, بۇل جوباعا اتوم ەنەرگياسى جونىندەگى حالىقارالىق اگەنتتىك تە (ماگاتە) ارالاساتىن بولادى. قازىر يادرولىق رەاكتورلار الەمنىڭ 31 ەلىندە جۇمىس ىستەپ تۇر. ولاردىڭ قاتارىندا اقش پەن فرانتسيا دا بار. بۇگىندە قىتاي, وڭتۇستىك كورەيا, ءۇندىستان, تۇركيا, ۇلىبريتانيا جانە رەسەي ەلدەرىندە اەس سالىنىپ جاتىر.
ءىس-شارانى ۇيىمداستىرۋشىلار ەلىمىزدىڭ ەنەرگەتيكالىق قاۋىپسىزدىگى مەن وسى سالانىڭ قىزىعۋشىلارىن جانە تازا ەنەرگياعا قاتىستى تانىم-تۇسىنىگىن كەڭەيتەمىن دەگەن ءاربىر استانالىقتى اتالعان كورمەگە شاقىردى. كورمە ءبىر اي بويى جالعاسادى.
