نەگىزى وسى جارىستىڭ باستى جەكپە-جەگىندە شاۆكات راحمونوۆ مۇحامماد بەلالمەن جارتىلاي ورتا سالماقتىڭ چەمپيوندىق ءتاجى ءۇشىن ايقاسۋعا ءتيىس ەدى. الايدا اقش سپورتشىسى دەنساۋلىعىنىڭ سىر بەرگەنىن العا تارتىپ, وكتاگونعا شىعۋدان باس تارتتى. ونسىز دا ءبىراز ۋاقىت جانكۇيەرلەر نازارىنان تىس قالعان قانداسىمىزعا دەرەۋ ارادا قارسىلاس تابۋ قاجەت بولدى. UFC باسشىلارى ءبىراز مىقتىعا ۇسىنىس جاساپ كورگەن ەدى, ولار كەلىسپەدى. باس تارتقانداردىڭ قاتارىندا كولبي كوۆينگتون, كامارۋ ۋسمان سىندى اتاقتارى الىسقا جايىلعان اپايتوستەر دە بار. سول «ىعاي مەن سىعايلار» اراسىنان تەك يەن گەرري ەسىمدى فايتەر عانا قازاقتىڭ قايسار ۇلىمەن ايقاسۋعا ءوز كەلىسىمىن بەردى.
27 جاستاعى يرلانديانىڭ وكىلى دە «كولدەنەڭ كوك اتتىلاردىڭ» ءبىرى ەمەس. سپورتتىڭ وسى تۇرىندەگى مانسابىن وسىدان بەس جىل بۇرىن باستاعان يەن سول ۋاقىت ارالىعىندا 15 كەزدەسۋ وتكىزىپ, بارلىعىندا جەڭىسكە جەتتى. سونىڭ سەگىزىندە قارسىلاستارىن نوكاۋتقا جىبەرسە, بىرەۋىندە «قىلقىندىرۋ» ءتاسىلىن قولداندى. تاعى جەتى باسەكەنىڭ شەشىمىن تورەشىلەر شىعاردى.
بۇعان دەيىنگى قارسىلاستارىنان جەڭىلمەگەن قوس ساڭلاقتىڭ جولى جەكسەنبى كۇنى لاس-ۆەگاستا قيىستى. گەرري شاۆكاتپەن قايمىقپاي ايقاستى. باسەكە باستالعان بەتتە قانداسىمىز كۇرەستىڭ ادىسىنە سالۋعا ۇمتىلدى. ونى جىعىپ الىپ, ءبىراز «ۋماجداعىسى» كەلدى. بىراق قارسىلاسى راحمونوۆتىڭ ىرقىنا كونبەدى. ول گرەپپلينگ تاسىلدەرىنەن ساۋاتتى قورعانىپ, ءاربىر قاۋىپتىڭ بەتىن وڭاي قايتارىپ وتىردى. ال سوققىلاردىڭ دالدىگى جاعىنان باسىمدىق «نوماد» جاعىندا بولعانى ءسوزسىز. ءبىر مەزەتتە وڭ قولمەن قۇلاق شەكەدەن سوعىپ, بىردە اينالىپ (بەكفيست) ۇرىپ يەندى تالتىرەكتەتىپ جىبەردى.
بەسىنشى راۋندتا راحمونوۆ قيىن جاعدايعا تاپ بولدى. سول كەزدە بارشا جانكۇيەردىڭ جۇرەگى اۋزىنا تىعىلدى. ەكەۋى الىسىپ جاتقاندا يرلانديالىق ەبىن تاۋىپ, قازاقتى جىعىپ الدى دا, تۋسىرتىنا شىقتى. گەرري شاۆكاتتى قوس قولىمەن موينىنان مىقتاپ ۇستاپ, «قىلقىندىرۋ» ءادىسىن قولدانۋعا تالپىندى. الايدا بۇل كورىنىس ۇزاققا سوزىلمادى. شاۆكات بۇل قاۋىپتەن قۇتىلدى.
باسەكە اياقتالعاننان سوڭ, بارلىق تورەشى شاۆكات راحمونوۆتىڭ مىقتىلىعىن ءبىراۋىزدان مويىندادى. ءسويتىپ, ول وكتاگونداعى 19 جەڭىسىنە قول جەتكىزدى. ءبىر وكىنىشتىسى, «نوماد» ءوز كارەراسىندا تۇڭعىش رەت باسەكەنى مەرزىمىنەن بۇرىن اياقتاي المادى. دەسەك تە بۇل «شاۆكات وسالدىق تانىتتى» دەگەن ءسوز ەمەس. كەرىسىنشە, قارسىلاسى وتە جاقسى دايىندىقپەن كەلگەن ەكەن. وعان تىپتەن UFC-ءدىڭ كەزىندەگى چەمپيونى چارلز وليۆەيرانىڭ ءوزى سەكۋندانت بولدى. بىراق ءبارىبىر قازاققا ءالى جەتپەدى. وسىلايشا, كۇللى يرلانديا ءۇمىت ارتقان ارلان العاش رەت جەڭىلىستىڭ كەرمەك ءدامىن تاتتى.
