تەمىرجول وزىنشە ءبىر الەم. مۇندا اتاكاسىپ پەن انا ءىسى ەرەكشە باعالانادى. جۇيەنىڭ قۇرىلىمى بۇرىنعىدان دا, بۇگىنگىدەن دە بولەك. سالاداعى ەڭبەك ءوتىلى سانالعاندا تۇتاس اۋلەتتىڭ ەڭبەك جولى ەسەپكە الىنادى. تەمىرجولشى اۋلەتى وسىلاي قالىپتاسادى.
بۇرىنعى تسەلينوگراد قالاسىندا 1974 جىلى تۋىپ, استانادا ازامات بولىپ قالىپتاسقان ارمان 1990–1993 جىلدارى تەمىرجول ۋچيليشەسىنىڭ ەلەكترومونتەر, بايلانىس بولىمىندە ءبىلىم الدى. ەڭبەك جولىن 1992–1993 جىلدارى تەمىرجول سالاسىندا تاجىريبەدەن وتۋدەن باستادى.
«مەن ءوز ەركىممەن جۇك تسەحىندا تاجىريبەدەن وتۋىمە رۇقسات سۇرادىم. ول كەزدە انام كۇلاش ابدۋللينا ءبىز بارعان ديستانتسيانىڭ كوممەرتسيالىق باقىلاۋ پۋنكتىنىڭ بريگاديرى ەدى. البەتتە, ارناۋلى ءبىلىم وشاعىندا ءدارىس بەرگەن ۇستازدارىمنىڭ سىڭىرگەن ءبىلىمى مەن ەڭبەگىنىڭ ورنى بولەك. دەگەنمەن تەمىرجول بويىنداعى باستى ۇستازىم تۋعان انام بولدى دەپ ماقتانىشپەن ايتا الامىن. ول كىسى قازىر زەينەت دەمالىسىندا. ەلدەگى ەڭ مارتەبەلى اتاقتىڭ ءبىرى – «قۇرمەتتى تەمىرجولشى», دەدى ارمان تىلەۋلەم ۇلى.
ارماننىڭ ايتۋىنشا, اتاسى اسقار ابدۋللا ۇلى ەكىنشى دۇنيەجۇزىلىك سوعىس جىلدارى جۇك پويىزدارىندا جولسەرىك بولسا, ناعاشى اتاسى قابدراش ازناباي ۇلى ءدال سول كەزەڭدە شويىن جول ماگيسترالى ۇستىندە تەمىرجولشى قىزمەتىن اتقارعان. ابدۋلليندەر اۋلەتىنىڭ شويىن جولداعى جالپى ەڭبەك ءوتىلى 100 جىلدان ءارى اسىپ جىعىلادى. سەبەبى ارماننىڭ تۋعان قارىنداسى مەن ءىنىسى دە اتاكاسىپتى ۇستاعاندار. ايتسە دە, بەرتىندە زامانا اعىمىنا قاراي تىرشىلىك كوزىن وزگەرتىپ, جەكە كاسىپتەرىن اشىپ, بيزنەسپەن شۇعىلدانىپ كەتكەن.
ارمان ۋچيليششەنى ويداعىداي تامامداعان سوڭ, ماماندىعى بويىنشا بەلگى بەرۋ جانە بايلانىس ديستانتسياسىندا ءبىر جىلعا جۋىق جۇمىس ىستەدى. ودان كەيىن قايتادان جۇك تسەحىنا سۇراندى. سول جەردە قاراپايىم پويىز قابىلداۋشى قىزمەتىن اتقاردى. بىرنەشە جىلدان كەيىن قوزعالىس تسەحىنا جۇمىسقا اۋىسىپ, وندا دا قالىپتى ەڭبەك ەتتى. دەسە دە ءوزى قالاعان پويىز قۇراستىرۋشى قىزمەتىنە قولى جەتە قويمادى. سەبەبى ول ورىن مول تاجىريبەمەن قاتار, كاسىبي جوعارى بىلىكتىلىكتى دە تالاپ ەتەتىن ەدى.
ءسوز باسىندا ايتقانىمىزداي, ناعىز تەمىرجولشى بولۋ ءۇشىن سالانىڭ ءبىر-بىرىمەن ساباقتاسقان سان سالالى ماماندىعىن شەبەر مەڭگەرىپ, شارۋاسىن ىلكىمدى ۇيلەستىرىپ, ءبارىنىڭ ۇدەسىنەن شىعا الاتىنداي ونقول ازامات بولۋ كەرەك. وسى ورايدا ارمان: ء«وزىم قالاعان قىزمەتكە قول جەتكىزۋىم ءۇشىن تەمىرجولداعى داستۇرگە اينالعان تارتىپپەن بەس-التى سالادا جۇمىس ىستەپ, اربىرىنەن ءتيىستى دەڭگەيدە تاجىريبە جيناقتاۋىم كەرەك بولدى. سونى دۇرىس اتقارعان شىعارمىن, جان قۇمارىم مەن كاسىپتىك ماقساتىم بولعان قىزمەت باسپالداعىنا اياق قويىپ, پويىز قۇراستىرۋشىنىڭ ورىنباسارلىعىنا دەيىن ەركىن كوتەرىلدىم», دەيدى.
بىراق سوندا دا قالاۋىنا ءبىر قادام قالعاندا قايتا شەگىنىس جاساپ, تەمىرجول وپەراتورى بولىپ جۇمىس ىستەۋىنە تۋرا كەلدى. ودان كەيىن 1-, 2-, 3-پوزيتسيادا الما-كەزەك ەڭبەك ەتتى. وعان قوسا سۇرىپتاۋ ستانساسىندا قىزمەتىن جالعاستىرىپ, ونىنشى اۋداندا جاۋاپتى كەزەكشى بولدى. مۇنىڭ ءبارى كاسىبيلىگىن بەكەمدەپ, بىلىكتىلىگىن ارتتىرۋعا سەپتىگىن تيگىزدى. سونىڭ ارقاسىندا قازىردە پويىز قۇراستىرۋشى قىزمەتىن قينالماي اتقارىپ كەلەدى. بۇل قىزمەتكە كىرىسكەنىنە دە 10 جىلدان اسىپتى. ەڭبەگىن جوعارى باعالاعان كومپانيا باسشىلىعى العىسحاتپەن, قۇرمەت گراموتاسىمەن ماراپاتتادى.
شويىن جول ۇستىندەگى ەڭبەك ءوتىلى 30 جىلدان اسقان ارمان جان جارى ەلەنا ميحايلوۆنامەن مەكتەپ جاسىنداعى ءۇش پەرزەنتىن تاربيەلەپ وتىر. جۇمىستان قولى بوساعاندا وتباسىن تۇگەل كولىككە وتىرعىزىپ الىپ, ۋ-شۋى كوپ, اۋاسى تىمىرسىق استانادان الىستاۋ جەرگە, تابيعات اياسىنا شىعىپ كەتكەندى جانى قالايدى. كەڭ دالاعا شىققاندا كەۋدەسى كوك تۇنباعا تولىپ ولەڭ وقيدى. ودان كەيىن كول جاعالاپ بالىق اۋلاعاندى جاقسى كورەدى. ول ويى جۇزەگە اسپاي قالسا, ويلى كورشىلەرىن شاقىرىپ, شاحمات تاقتاسىن جايادى.
