بۇل قۇجات جۇمىسشىلاردىڭ قۇقىن قورعايدى

كەشە پرەمەر-ءمينيستردىڭ ورىنباسارى بەردىبەك ساپارباەۆتىڭ جامبىل وبلىسىنا جۇمىس ساپارى بارىسىندا جۇمىسشىلاردىڭ ەڭبەك قۇقىعى مەن كەپىلدىگىن قامتاماسىز ەتۋ ماسەلەسىنە قاتىستى جيىن ءوتىپ, 17 مەموراندۋمعا قول قويىلدى. ءىرى كاسىپورىندار باسشىلارى مەن كاسىپوداق كوميتەتىنىڭ وكىلدەرى قاتىسقان بۇل باسقوسۋدا جۇمىسشىلاردىڭ الەۋمەتتىك جانە ەڭبەك قۇقىقتارىن قامتاماسىز ەتۋ جولدارى  تالقىلاندى. سونداي-اق, وبلىس اكىمدىگى, كاسىپورىن باسشىلارى, كاسىپوداق كوميتەتتەرى مەن ۇلتتىق كومپانيالار ءوزارا ىنتىماقتاستىق تۋرالى ەكى باعىتتاعى بىرنەشە كەلىسىمگە قول جەتكىزدى. بۇل قۇجاتتاردىڭ باستى ماق­ساتى – جۇمىسشىلاردىڭ ەڭبەك قۇقىق­تارى مەن كەپىلدىگىن قامتا­ماسىز ەتۋ باعىتىنداعى ىنتى­ماق­تاستىق جانە ەكىنشى ءوندىرىس بارىسىندا جەرگىلىكتى جانە قازاق­ستاندىق ۇلەستى قامتاماسىز ەتۋ. 17 مەموراندۋم وڭىردەگى 6 ءىرى كاسىپورىن جۇمىسشىلارىنىڭ ەڭبەك قۇقىقتارىن قامتاماسىز ەتۋگە بايلانىستى قۇجات. اتالعان كاسىپورىنداردا بارلىعى 20 مىڭنان استام جۇمىسشى ەڭبەك ەتەدى. سونداي-اق, الداعى ۋاقىتتا جۇمىسشىلار مەن كاسىپوداق اراسىنداعى بايلانىستى نىعايتۋ, جۇمىسشىلاردىڭ ەڭبەك قۇقىقتارىن قامتاماسىز ەتۋگە بايلانىستى وڭىردەگى 79 كاسىپورىنمەن مەموراندۋمعا قول قويۋ جوسپارلانۋدا. بۇگىنگى تاڭدا جامبىل وبلىسىندا 5699 كاسىپورىن بولسا, ونىڭ 2812-سىمەن ۇجىمدىق كەلىسىمشارت جاسالعان. بۇل 49,3 پايىزدى قۇرايدى. – ەلىمىزدە جۇمىسپەن قامتۋدىڭ «جول كارتاسى-2020», «اگروبيزنەس» جانە تاعى دا باسقا بىرقاتار مەملەكەتتىك باعدارلامالارى جۇزەگە اسىپ جاتىر. بۇل باعدار­لاما­لاردىڭ ءبارى دىتتەگەن ماقسا­تىنا جەتۋى ءتيىس. اسىرەسە, يندۋس­تريالىق-يننوۆاتسيالىق باعدار­لاماعا كوپ كۇش سالىنىپ جاتىر. وسى باعدارلاما بويىنشا جۇمىس ىستەپ جاتقان كاسىپورىندار, باسقا دا جوبا يەلەرى ءوز ونىمدەرىن شىعارىپ, سالىق تولەپ, جاڭا جۇمىس ورىندارىن اشۋى كەرەك. ەڭ باستى ماسەلە – جالاقىعا قارىز بولماۋى ءتيىس, – دەدى پرەمەر-ءمينيستردىڭ ورىنباسارى ب.ساپارباەۆ. «قازفوسفات» – وڭىردەگى ەڭ ءىرى ءوندىرىس ورنى. حيميا ءوندىرىسىنىڭ الىبى اتانعان بۇل كاسىپورىن بۇگىندە الەمنىڭ 33 مەملەكەتىنە ءوزىنىڭ 20 ءتۇرلى ءونىمىن شىعارىپ وتىر. زاۋىتتىڭ بۇگىنگى تاڭداعى ەڭ باستى تۇتىنۋشىسى – ەۋروپا وداعى مەملەكەتتەرى, ونان سوڭ تمد-عا مۇشە مەملەكەتتەر. وتكەن جىلمەن سالىستىرعاندا, زاۋىت ونىمدىلىگى بيىل ايتارلىقتاي ارتتى. الايدا الەمدىك نارىقتاعى كەيبىر قيىندىقتارعا بايلانىس­تى ءونىمدى وتكەرۋدىڭ ماسەلەسى دە جوق ەمەس. سوعان قاراماستان, كاسىپورىن الداعى جىلى ەكستراكتسيا­لى فوسفور قىشقىلىن شىعاراتىن جاڭا ءوندىرىستىڭ العاشقى كەزەڭىن اياقتاۋدى جوسپارلاپ وتىر. ياعني, 2016 جىلدان باستاپ فوسفور تىڭايتقىشتارى ءۇش ەسەگە كوپ شىعارىلادى. ال, ەكىنشى كەزەڭى 2020 جىلى ءبىتىپ, كومپانيا 1 ميلليون تونناعا جۋىق تىڭايتقىش شىعاراتىن بولادى. – مەموراندۋم جۇكتەيتىن تاعى ءبىر نەگىزگى ماسەلە – ساتىپ الۋ ىسىندە وتاندىق ۇلەستى ارتتىرۋ. وتكەن جىلدىڭ 9 ايىندا وڭىردەگى ەڭ ءىرى دەگەن ءوندىرىس ورىندارى 107 ميلليون تەڭگەدەن استام قارجىعا كەرەك-جاراعىن ساتىپ العان. ونىڭ 42 پايىزدايى – وتاندىق ءونىم. بۇل جولى ءوندىرىس ورىندارى 11 ميليارد تەڭگەنىڭ كولەمىندە ءوزارا الىس-بەرىس جاساۋعا ۋاعدالاستى, – دەدى جامبىل وبلىسىنىڭ اكىمى كارىم كوكىرەكباەۆ. ورالحان ءداۋىت, «ەگەمەن قازاقستان». جامبىل وبلىسى.