سۋرەتتە: مەرەكەدەن كورىنىستەر
الماتى وبلىسىنىڭ اكىمى مارات سۇلتانعازيەۆ سالتاناتى شارادا ءوڭىردىڭ اگروونەركاسىپ كەشەنىنىڭ جەتىستىكتەرىن اتاپ ءوتىپ, اۋىل شارۋاشىلىعىنىڭ ەلدىڭ ازىق-ت ۇلىك قاۋىپسىزدىگىن قامتاماسىز ەتۋدەگى ءرولىن ەرەكشە كورسەتتى. ول ايماقتاعى ەگىن جانە مال شارۋاشىلىعى سالاسىندا دا ىلگەرىلەۋ بار ەكەنىن ايتتى.
بيىلعى جىلى ءوڭىردىڭ اۋىل شارۋاشىلىعى سالاسىندا 573 ملرد تەڭگەنىڭ ءونىمى وندىرىلگەن. اگروونەركاسىپتىك كەشەندى دامىتۋعا باعىتتالعان مەملەكەتتىك باعدارلامالار اياسىندا شارۋالارعا 26 ملرد تەڭگەدەن اسا سۋبسيديا بەرىلگەن. اگرارالى ايماق رەسپۋبليكادا ەت ءوندىرۋ بويىنشا 1-ورىنعا شىعىپ, ءوندىرىس كولەمى 214 مىڭ تونناعا جەتكەن.
سونداي-اق, سالاعا سەرپىن بەرەر تەحنيكالار دا جاڭارا تۇسكەن. وسى جىلدىڭ 10 ايىندا وڭىردە جالپى قۇنى 4,6 ملرد تەڭگە بولاتىن 365 دانا اۋىل شارۋاشىلىعى تەحنيكاسى ساتىپ الىنعان. شارۋالار سۋ ۇنەمدەۋ ادىسىنە دە بىرتىندەپ اۋىسىپ جاتقانى باياندالدى. وڭىردە جاڭادان 8 جوبا ىسكە قوسىلعان.
«سۋ ۇنەمدەۋ تەحنيكالارىن پايدالاناتىن القاپتاردى 2 ەسەگە ۇلعايتتىق. بىلتىر 20 مىڭ گەكتار بولسا, قازىر 43 مىڭ گەكتار بولدى. كورمەدەگى ءبىر عانا تراكتور زاۋىتى كوكشەتاۋداعى 90 تەحنيكانى وسى جەردە ساتتى. بىلتىرعا قاراعاندا ءبىز تەحنيكا جاڭارتۋىن 1,5-2 ەسەگە ۇلعايتتىق», دەدى ءوڭىر باسشىسى.
مامانداردىڭ كاسىبي مەرەكەسىنە وراي اۋىل شارۋاشىلىعى سالاسىنداعى ۇزدىك مەكەمەلەر مەن شارۋا قوجالىقتارى ماراپاتتالدى. اراسىندا بەلسەندى قىزمەتكەرلەر مەن ۇيىم وكىلدەرى دە بار. ولارعا ءتۇرلى مەملەكەتتىك ناگرادالار مەن قارجىلاي سىياقىلار تابىستالدى.
سولاردىڭ ءبىرى «پاراسات» وردەنىنىڭ يەگەرى ەرىك ايدارباەۆ:
«جاقىندا مەملەكەت باسشىسى قاسىم-جومارت توقاەۆتىڭ قاتىسۋىمەن اۋىل شارۋاشىلىعى ەڭبەككەرلەرىنىڭ ءبىرىنشى فورۋمى وتكەن. بۇل جيىندا كەلەلى اڭگىمەلەر ايتىلىپ, وزەكتى ماسەلەلەر كوتەرىلدى. بۇگىن مىنە, وبلىستىڭ شارۋالارى باس قوسىپ جاتىرمىز. مۇنداي قولداۋ بىزگە سالانى ودان ارى دامىتۋعا, ءوندىرىستى ۇلعايتۋعا سەپتىگىن تيگىزەدى», دەدى.
سالتاناتتى شاراعا جينالعاندار اۋىل شارۋاشىلىعى دامىماي, ەكونوميكا وركەندەمەيتىنىن باسا ايتتى. الماتى وبلىسىنىڭ بۇل سالادا الەۋەتى جوعارى. ءوڭىردىڭ اۋىلشارۋاشىلىق ماماندارى قازىر اگروونەركاسىپتىك كەشەنىن عىلىممەن ۇشتاستىرا وتىرىپ, وركەندەتۋدى قولعا العان. سەبەبى ءوڭىردىڭ 70 پايىز جەرى وسى سالاعا وتە قولايلى.
مەرەكە بارىسىندا ماراپاتتالعان ۇزدىك اۋىل شارۋاشىلىعى تاۋار وندىرۋشىلەرى قاتارىندا «ادال» اوك جشس, «داۋلەت بەكەت» جشس مەن «كوك تەڭىز» جشس-تەرى بار. سونىمەن قاتار «ولجاس», «BeeQueen», «يسلام» شارۋا قوجالىقتارى دا قارجىلاي سىياقىنى قانجىعالادى.
ال اۋىل شارۋاشىلىعى جارمەڭكەلەرىن ۇيىمداستىرۋداعى بەلسەندىلىگى ءۇشىن كەگەن, ەڭبەكشىقازاق, قاراساي اۋداندارى الدىڭعى ۇشتىككە ىلىنسە, اۋىلدىق وكرۋگتەر اراسىندا بالقاش اۋدانىنىڭ قۇيعان, جامبىل اۋدانىنىڭ ايدارلى جانە تالعار اۋدانىنىڭ پانفيلوۆ اۋىلدىق وكرۋگتەرى ۇزدىكتەر قاتارىنان كورىنىپ, قارجىلاي سىيلىققا قول جەتكىزدى.
ايتۋلى مەرەكەدە زاڭدى تۇلعالار دا نازاردان تىس قالمادى. اتاپ ايتساق, «ۆلاديمير» جشس-نە YTO 804-8 تراكتورى بەرىلسە, «اگروفيرما «كەرۋەن» جشس 900 مىڭ تەڭگە, ال «فيرما التاي» جشس 600 مىڭ تەڭگەگە يە بولدى.
الماتى وبلىسى
