فوتو: تجم
استانا قالالىق تجد قىزمەتكەرلەرى جەرگىلىكتى اتقارۋشى ورگاندارىنىڭ وكىلدەرىمەن بىرلەسىپ «نۇرا» اۋدانى كىشى تالدىكول كولىنىڭ قار پوليگونى مەن بوگەتىنە اەروۆيزۋالدى تەكسەرۋ جۇرگىزدى.
قار پوليگونىنان ەرىگەن سۋدى اعىزۋ ءۇشىن ارنانى قازۋ ورىندارى, سونداي-اق ونى ودان ءارى نىعايتۋ ءۇشىن بوگەت بويىنداعى قيىندىق تۋدىراتىن جەرلەر انىقتالدى.
ماماندار تەكسەرۋ قورىتىندىسى بويىنشا جاۋاپتى مەملەكەتتىك ورگاندارعا ۇسىنىستار دايىندادى. ولاردىڭ شەشىمى ەلوردا اۋماعىنداعى سۋ تاسقىنى كەزەڭىنىڭ قاۋىپسىز ءوتۋىن قامتاماسىز ەتۋى ءتيىس.
ال شقو-دا گلۋبوكوە, التاي, ۇلكەن نارىن جانە قاتونقاراعاي اۋدانىنداعى سۋ تاسقىنى قاۋپى بار جەرلەرگە دە اەروۆيزۋالدى تەكسەرۋ جۇرگىزىلدى.
اۋەدەن بارلاۋ ناتيجەسىندە بۇقتىرما وزەنىنىڭ بويىندا, سونىمەن قاتار گلۋبوكوە اۋدانىندا ورنالاسقان ەلدى مەكەندەردىڭ جاعدايىنا مونيتورينگ جاسالعان.
«وڭىردە سۋ تاسقىنى قۇبىلىستارىنىڭ تۋىنداۋىنا جول بەرمەۋ ماقساتىندا 2025 جىلى ينجەنەرلىك جۇمىستار جوسپارى بەكىتىلدى. جوسپارعا سايكەس وبلىس اۋماعىندا وبلىستىڭ 13 اۋدانىندا سۋ تاسقىنىنا قارسى 55 ءىس-شارا ىسكە اسىرىلىپ جاتىر», دەدى شىعىس قازاقستان وبلىسى تجد باستىعى راشيد بليالوۆ.
