قوش, اعا, ءباسپاسوزدىڭ قارت قىرانى

قازاق ءباسپاسوزىنىڭ ارداگەرى, قارت قالامگەر, بەلگىلى جۋرناليست سالامات حايدار ۇلى 96 جاسقا قاراعان شاعىن­دا دۇنيەدەن وزدى. قازاق قوعامى ­باستان كەشكەن قيلى زاماننىڭ كۋاگەرى بولعان, كۇردەلى تاعدىر يەسى سالامات حايدار ۇلى ءوزىنىڭ بار سانالى عۇمىرىن ادىلەت ءسوزىن ايتىپ, اقيقاتتىڭ ءۇنىن جەتكىزۋگە ارنادى. سوعىس جىلدا­ر­ىندا قازاقستان جازۋشىلار وداعىنىڭ باتىس وبلىستارداعى وكىلى بولدى. 10 جىل بويى رەسپۋبليكالىق «سوتسياليستىك قازاقستان» گازەتىنىڭ ماڭعىستاۋ وبلىسىنداعى مەنشىكتى ءتىلشىسى قىزمەتىن ابىرويمەن اتقاردى. جىر الىبى جامبىلمەن كەزدەسۋ باقىتىن ەنشىلەگەن, قازاق ادەبيەتىنىڭ نار تۇل­عالارى ءسابيت مۇقانوۆ, اسقار توقماعامبەتوۆتارمەن قىزمەت بابىندا تىعىز بايلانىسقان. سولاردىڭ اسەرىمەن ءوزى دە اڭگىمە, حيكاياتتار جازعان. ءار كەزەڭنىڭ سۋرەتىن سيپاتتايتىن پۋبليتسيستيكالىق شىعارمالارى مەن ادەبي تۋىندىلارى سالامات اعانىڭ 2 تومدىق شىعارمالار جي­نا­عىندا توپتاستىرىلدى. ونىڭ ادەبيەتىمىز پەن جۋرنا­ليستيكامىزدىڭ ۇلكەن تۇلعا­لارى زەينوللا قابدولوۆ, تاۋ­مان اماندوسوۆتارعا ۇستازدىق ەتۋىنىڭ ءوزى ءبىر ونەگە ىسپەتتەس. ەل گازەتى «ەگەمەنمەن» تۇيدەي قۇرداس سالامات اعا ءومىرىنىڭ سوڭعى كۇندەرىنە دەيىن كەزىندە ءوزى قىزمەت ەتكەن سۇيىكتى باسىلىمىمەن بايلانىسىن ۇزگەن جوق. قاشاندا گازەتتىڭ جارىق كورگەن ءار سانىن مۇقيات وقىپ, حابارلاسىپ تۇراتىن. الدىڭعى بۋىن وكىلى رەتىندە اقىلى مەن ۇسىنىسىن, شىنايى كوڭىلى مەن اق باتاسىن كەيىنگى ۇرپاقتان اياماي, قالام ۇستاعان جاستاردىڭ ساناسىندا ابىرويلى اقساقال رەتىندە قالا ءبىلدى. گازەتىمىزدىڭ 90 جىلدىق مەرەيتويىندا اتالى ءسوز ارناپ, قۇرمەتتى توردەن باتاسىن بەرگەن ابىز ارداگەرىمىز ەدى. «ەگەمەن قازاقستاننىڭ» 95 جىلدىعىنا دەنساۋلىعىنا بايلانىستى قاتىسا الماسا دا, بالاشا قۋانىپ, اق تىلەگىن ارناعان-دى. ەندى مىنە, قارت ءجۋرناليستىڭ جۇرەگى سوعۋىن توقتاتسا دا, قازاق ءباسپاسوزىنىڭ شەجىرەسىندە ونىڭ وزىندىك ورنەكتى ءىزى قالدى. ەلجىرەپ «ەگەمەنگە» جۇرەگىڭىز, ىشىندە قاراشاڭىراق تۇلەدىڭىز. وقىتسا اماندوسوۆ بارشامىزدى, تاۋمانعا ساباق بەرگەن ءسىز ەدىڭىز. قوش, اعا, ءباسپاسوزدىڭ قارت قىرانى, كورمەگەن قىلدان تايىپ سەرتتى ءلامى. قۇرداسى ەل گازەتى «ەگەمەننىڭ», جۇرەگى – ىزگىلىكتىڭ اق بۇلاعى. رەداكتسيا  ۇجىمى مارقۇم ­سا­لامات حايدار ۇلىنىڭ قازا­سىنا كوڭىل ايتىپ, ارتىنداعى ۇرپا­عىنا باياندى ءومىر تىلەيدى. ار­داگەر اقساقالدىڭ رۋحىنا قي­ماستىقپەن سوڭعى «قوش-قوشى­مىزدى» ايتامىز.  «ەگەمەنقازاقستاندىقتار».