مەترو 5 جەلىدەن تۇرادى. ۇزىندىعى 176 شاقىرىم. قازىرگى كەزدە ءۇش جەلى جۇمىس ىستەپ تۇر. ال قالعاندارى كەلەسى جىلدىڭ قاڭتار ايىندا اشىلادى دەپ جوسپارلانعان. مەترو كۇنىنە 3,6 ميلليون جولاۋشىنى تاسىمالداي الادى. سونىڭ ارقاسىندا جەڭىل كولىك قوزعالىسى سيرەپ, كومىرقىشقىل گازىنىڭ شىعارىلۋى جىلىنا 12,5 ميلليون تونناعا ازايادى دەگەن ءۇمىت بار. ۆاگوندار وتباسىلارعا, جەكە جولاۋشىلارعا, مۇمكىندىگى شەكتەۋلى ادامدارعا دەپ ءۇش ساناتقا بولىنگەن. اۆتوماتتاندىرىلعان جۇيە پويىزداردىڭ قاۋىپسىزدىگى مەن بىرقالىپتى قوزعالىسىن قامتاماسىز ەتەدى.
كۋرەرلەرگە ارنالعان كوزىلدىرىك
«Amazon» كۋرەرلەرگە ارنالعان «اقىلدى كوزىلدىرىك» جاساپ جاتىر.
«Amelia» دەپ اتالاتىن قۇرىلعى دىتتەگەن مەكەنجايعا اپاراتىن جولدى كورسەتىپ, سالەمدەمە جەتكىزۋ جۇمىسىن جەڭىلدەتەدى. سونداي-اق كوزىلدىرىك عيماراتقا كىرگەننەن كەيىن ءۇيدى اداسپاي تابۋعا كومەكتەسىپ, سوڭىنا دەيىن باعدار بەرەدى. سالەمدەمەنىڭ جەتكەنىن راستاۋ ءۇشىن كوزاينەككە بەينەباقىلاۋ جۇيەسى ورناتىلادى. «Amazon» كومپانياسىنىڭ دەرەگىنشە, «Hands-free» تەحنولوگياسى ارقىلى جۇمىستى وڭتايلاندىرىپ, فيزيكالىق جۇكتەمەنى ازايتۋ دا جوسپاردا بار. جوبا 2026 جىلعا قاراي تولىق ىسكە اسادى.
پويىزداعى 5G
قىتاي زەرتتەۋشىلەرى ۆاكۋمدىق پويىزداردا تۇراقتى بايلانىستى قامتاماسىز ەتەتىن تەحنولوگيا ازىرلەدى.
ۆاكۋمدىق پويىزدار ساعاتىنا 1000 شاقىرىم جىلدامدىقپەن قوزعالادى. ول ماگنيت لەۆيتاتسياسىنىڭ ارقاسىندا ۇشاقتان دا تەز جۇرەدى. بۇل جوبانى ەڭ العاش يلون ماسك ۇسىنعان بولاتىن. الايدا ول ءالى ىسكە اسقان جوق. قىتايلار ونىڭ الدىن وراپ, «Hyperloop» جەلىسى 2035 جىلى ىسكە قوسىلاتىنىن مالىمدەدى. ءتىپتى ولار پويىزدى ينتەرنەتپەن قامتاماسىز ەتەتىن تەحنولوگيا دا جاساپ شىققان. بايلانىستى تۇراقتى ۇستاۋ ءۇشىن زەرتتەۋشىلەر قۇبىردىڭ ىشىنە ەكى پاراللەل كابىل جۇرگىزۋدى ۇسىنىپ وتىر. كابىلدەر سيگنال تاراتىپ, ينتەرنەتپەن تۇراقتى قامتاماسىز ەتەدى.
