پابلو پيكاسسونىڭ مىنا كارتيناسىن كورىپ, قىر قازاعى قاراپتان-قاراپ «اۋىرىپ» قالۋى بەك مۇمكىن. ءىشى قاتقان جىلقى ما, ىندەت شالعان جىلقى ما, ايتەۋىر دىمكاس جانۋار دەگەن ماعىناداعى سۋرەت. وسىنىڭ الدىندا سالۆادور دالي سالعان جىلقىلاردى كورىپ, «جانۋاردى وسىنشاما قورلاۋعا بولا ما ەكەن؟ جىلقىعا كۇنى تۇسە بەرمەيتىن جاقتىڭ بالاسى بولعاسىن ءوستيدى عوي», دەپ قويعانبىز. مۇمكىن ءبىر شىعارمانىڭ جەلىسىمەن اسقان قاسىرەتتى نەمەسە بولمىستىڭ ازعىنداۋىن كورسەتكىسى كەلگەن شىعار, كىم ءبىلىپتى.
ال پيكاسسونىڭ مىنا كارتيناسى سوناۋ ءبىر جىلدارى جۇتتان قاۋساپ قالعان جىلقىلاردى ەسكە سالدى. قايبىر جىلدارى ەلىمىزدىڭ باتىس ايماعىنداعى كوتەرەم جىلقىلاردىڭ سۋرەتى مەن بەينەسى جەلىنى الىپ كەتىپ ەدى. سوندا ءبىر قانجىلاعانبىز. پيكاسسو ءتىپتى كوتەرەم قىلعانى ءوز الدىنا, ىشەك-قارنىن اقتارىپ تاستاپتى. بالا كۇنىمدە جىلقىدا ءجۇرىپ جاماناۋىز (قاسقىر) جارىپ كەتكەن بيەنىڭ ۇستىنەن ءتۇسىپ, وندايعا دا دۋشار بولعانىم بار, جانىم جابىرقاپ, سولىق قىسقان. سوندا ۇلكەن كوك بيەنىڭ ءىشىن جارىپ, جىلى-جۇمساعىن جەپ كەتىپتى. جاباعىسىنىڭ سان ەتىنىڭ جارىمى سالاقتاپ ءجۇر. جىلقىنى ىڭىرتتەپ اۋىلدىڭ تۇسىنا ايداپ اكەلدىم. ەرتەسىنە يت-قۇس جاباعىسىن دا جايراتىپ كەتكەن ەكەن. سوندا يت-قۇس العاش شاپقاندا, بيە ق ۇلىنىن قورعاشتاپ, ءوزىن جازىم ەتكەن بولىپ تۇر عوي. ولىمگە ءوزىن قيىپ, بالاسىن امان الىپ قالعان. مەنىڭ جىلقىنى ۇيگە ايداپ اكەلمەگەن شالالىعىمنان كەلەسى ءتۇنى قۇلىندى جاۋكەمدەپتى. ونىڭ دا دەنەسى تۇتاس قالىپتى دا, ءىشىن اقتارىپ جەپتى.
پابلونىڭ تۋىندىسىنداعى مىنا جانۋاردىڭ كوتەرەم بولىپ, ىشەك-قارنى سۇيرەتىلگەنى ءوز الدىنا, الدىعا قاراي ءسال ەتپەتتەسە, جەردەن شىعىپ تۇرعان ۇشكىر تەمىرگە جارىلىپ قالارداي. اۆتور قانداي دا ءبىر قاسىرەتتى, تىعىرىققا تىرەلگەندى سالعانىن اڭعارامىز. جىلقى ەمەس, شىرقىراعان شىبىن جان دەپ قاراعان ءجون شىعار. قاشىپ قۇتىلار جول جوق, جالعىز-اق كوكتەن كومەك تۇسپەسە. تاناۋىن اسپانعا تىگىپ قويعانى بەكەر ەمەس اۆتوردىڭ. جانى مۇرنىنىڭ ۇشىنا كەلدى دەيدى قازاق. جان القىمعا كەلگەندە, جىلقى دا قۇدايدان ءۇمىتتى. بالكىم, ادامزاتقا سونى ەمەۋرىن ەتكىسى كەلگەن بولار.
