ءوندىرىس وشاقتارى كوبەيىپ كەلەدى
وبلىس بيىلعى ەگىنشىلىك كەزەڭىندە ايتارلىقتاي ناتيجەگە قول جەتكىزدى. ءوڭىردىڭ اگرارشىلارى ورتاشا ونىمدىلىكتى 14 تس/گا-دان اسىرىپ, كەيىنگى ونجىلدىقتا بولماعان 6,6 ملن توننادان استام كولەمدە رەكوردتىق استىق جينادى. مۇنىڭ ءبارى قاجىرلى ەڭبەك, مەملەكەتتىك قولداۋ مەن زاماناۋي اگروتەحنولوگيالاردى ۋاقتىلى قولدانۋدىڭ ناتيجەسىندە مۇمكىن بولدى.
جىل سوڭىنا قاراي اۋىل شارۋاشىلىعى ءونىمى كولەمىندە ءبىر ترلن تەڭگەدەن اسا قاراجات كۇتىلىپ وتىر. بۇل وتكەن جىلمەن سالىستىرعاندا, ءبىر جارىم ەسەگە كوپ. مال شارۋاشىلىعى ونىمدەرىنىڭ كولەمى دە ارتىپ كەلەدى. بيىل تسەلينوگراد پەن ارشالى اۋداندارىندا 3 ءسۇت-تاۋار فەرماسى ىسكە قوسىلدى, تاعى ەكەۋى – اياقتالۋ ساتىسىندا. وڭدەۋ سالاسىندا دا وڭ ديناميكا بايقالادى. بۇل باعىتتا وڭىردە جىل باسىنان بەرى 208 ملرد تەڭگەدەن استام سوماعا ازىق-ت ۇلىك وندىرگەن. ەت, ءسۇت, مايلى جانە ءداندى داقىلداردى وڭدەيتىن 67 كاسىپورىن جۇمىس ىستەيدى.
اكىم اگرارشىلاردى مەملەكەتتىك قولداۋ شارالارى تۋرالى دا ايتتى. فەرمەرلەر اراسىندا «كەن دالا 2» كوكتەمگى ەگىس جانە ەگىن جيناۋ جۇمىستارىنا جەڭىلدىكپەن كرەديت بەرۋ باعدارلاماسى ەرەكشە سۇرانىسقا يە. ول اۋىل شارۋاشىلىعى تاۋارىن وندىرۋشىلەرگە جالاقى تولەۋ ءۇشىن اينالىم قاراجاتىن تولىقتىرۋعا, ساپالى تۇقىمداردى, مينەرالدى تىڭايتقىشتاردى, باسقا دا قاجەتتى تاۋارلار مەن قىزمەتتەردى الدىن الا ساتىپ الۋعا كومەكتەسەدى.
ينۆەستيتسيا – ەل ىرىسى
جىل باسىنان بەرى وڭىردە 460 ملرد تەڭگەدەن استام ينۆەستيتسيالىق باستامانى ىسكە اسىرۋ تۋرالى ۋاعدالاستىققا قول جەتتى. ءىرى جوبالاردىڭ ءبىرى – اتباسار اۋدانىندا لوكوموتيۆ وندىرەتىن زاۋىت سالۋ بولدى. ول كەلەشەكتە جىلىنا 360 بىرلىك تەحنيكا شىعاراتىن بولادى. سونداي-اق بۋراباي مەن زەرەندى اۋداندارىندا ەكى بيوگاز زاۋىتتىڭ قۇرىلىسى ورىن تەبەدى.
«مەملەكەت باسشىسىنىڭ تاپسىرماسىن ورىنداۋ اياسىندا ءبىز شەتەلدىك كومپانيامەن استىقتى تەرەڭ وڭدەۋ بويىنشا ءىرى زاۋىت سالۋ تۋرالى كەلىسىمگە قول قويدىق. بۇل جوبا مىڭ جۇمىس ورنىن قۇرىپ قانا قويماي, ەلدىڭ ەكسپورتتىق الەۋەتىن كەڭەيتۋ جولىنداعى ماڭىزدى قادام بولادى. ەلىمىزدىڭ ودان ءارى ەكونوميكالىق ءوسۋى مەن حالىقارالىق ساۋدا مەن ينۆەستيتسيالىق اعىندارعا ينتەگراتسيالانۋى ءۇشىن قۋاتتى سەرپىن بولادى», دەپ اتاپ ءوتتى وبلىس اكىمى.
ءوڭىردىڭ ينۆەستيتسيالىق احۋالىن جاقسارتۋ ماقساتىندا رەسپۋبليكالىق ماڭىزى بار «Aqmola» يندۋستريالىق ايماعى قۇرىلدى. ينۆەستورلار پۋلى وسى اۋماقتا ءوندىرىستى ورنالاستىرۋعا مۇددەلى, دەرەكتەردى وڭدەۋ ورتالىعىن, كولىك-لوگيستيكالىق ورتالىقتى, اۋىل شارۋاشىلىعى اگرەگاتتارىن ءوندىرۋ زاۋىتىن, ت.ب. سالۋ جوسپارلانىپ جاتىر. وعان قوسا, ەلوردادا «Aqmola Invest» ينۆەستيتسيالار تارتۋ ورتالىعى اشىلدى. ورتالىق بازاسىندا 50 كومپانيامەن, ونىڭ قاتارىندا ماجارستان, رەسەي, تۇركيا, تاجىكستان, اۋستراليا, گەرمانيا, ت.ب. شەتەلدىك كومپانيالارمەن كەزدەسۋلەر وتكىزىلدى.
اۋىزسۋ جوباسى جۇزەگە استى
وبلىستا حالىقتى ساپالى اۋىزسۋمەن قامتاماسىز ەتۋ ماسەلەلەرى بەلسەندى تۇردە شەشىلىپ جاتىر. «2024 جىلى سۋمەن جابدىقتاۋ, سۋ بۇرۋ جەلىلەرىن سالۋ مەن رەكونسترۋكتسيالاۋدىڭ 68 جوباسىن ىسكە اسىرۋعا 34 ملرد تەڭگەدەن اسا قاراجات ءبولىندى. 30 جوبا بيىل اياقتالادى. ال قالعان 38 جوبانى 2025 جىلى ىسكە اسىرۋ جۇمىستارى جالعاسادى», دەدى م.احمەتجانوۆ.
ءوڭىردىڭ باستى جەتىستىكتەرىنىڭ ءبىرى – ەگىندىكول اۋدانىنداعى نۇرا توپتىق سۋ قۇبىرىن قايتا جاڭارتۋدى اياقتاۋ. سونىڭ ارقاسىندا قارعالى, جانتەكە, قۇمكول, ەگىندىكول, توعاناس ەلدى مەكەندەرىنىڭ تۇرعىندارى تازا اۋىزسۋعا قول جەتكىزدى. جوبا اياسىندا 70 كم سۋ قۇبىرى جەلىسى سالىندى. ۇكىمەت رەزەرۆىنەن ەگىندىكول جانە قورعالجىن اۋداندارىنداعى باستى سۋ جيناعىشتاردى قايتا جاڭارتۋعا قوسىمشا قاراجات ءبولىندى. بۇل جوبالار جەرگىلىكتى تۇرعىنداردىڭ ءومىر ءسۇرۋ ساپاسىن ەداۋىر جاقسارتىپ, اۋىزسۋعا ۇزدىكسىز قولجەتىمدىلىگىن قامتاماسىز ەتەدى.
ايتا كەتۋ كەرەك, جىل سوڭىنا قاراي وبلىس قالالارىندا سۋمەن قامتۋ دەڭگەيى 99 %-عا, ال اۋىلدىق ەلدى مەكەندەردە 96,1%-عا جەتەدى. قوسىمشا 10,5 مىڭ ادام اۋىزسۋمەن قامتاماسىز ەتىلەدى. بۇل قابىلدانىپ جاتقان شارالاردىڭ تيىمدىلىگى مەن وسى باعىتتاعى جۇمىستىڭ ماڭىزدىلىعىن راستايدى.
جول ينفراقۇرىلىمىن دامىتۋدىڭ جاڭا كەزەڭى
كولىك جانە ينجەنەرلىك ينفراقۇرىلىمدى دامىتۋ وبلىستاعى نەگىزگى باعىتتاردىڭ ءبىرى بولىپ قالا بەرەدى. «رەسپۋبليكالىق جانە جەرگىلىكتى ماڭىزى بار اۆتوجولداردى سالۋ مەن جوندەۋ بويىنشا 130-دان استام جوبانى ىسكە اسىرۋ ءۇشىن 104 ملرد تەڭگە قارجى ءبولىندى. 800 شاقىرىمعا جۋىق جالپىعا ورتاق پايدالانىلاتىن اۆتوجولدار مەن ەلدى مەكەندەردىڭ كوشە-جول جەلىسى سالىندى جانە جوندەلدى», دەدى وبلىس اكىمى.
بيىل ەلدى مەكەندەردەگى جولداردى جوندەۋگە ەرەكشە نازار اۋدارىلدى. سونىڭ قاتارىندا استاناعا ىرگەلەس ەلدى مەكەندەردە بار. ءىرى جوبالاردى جۇزەگە اسىرۋ قوسشى قالاسىندا, تالاپكەر, قاراوتكەل, قوياندى, جىبەك جولى, بوزايعىر, باسقا دا كوپتەگەن اۋىلدا جالعاستى. كوكشەتاۋدا قوپا كولى بويىنداعى اۋماقتى اباتتاندىرۋ بويىنشا اۋقىمدى جۇمىس جۇرگىزىلدى. دەمەۋشى قاراجاتى ەسەبىنەن جارىقتاندىرىلعان جوعارى دەڭگەيلى اۆتوجول سالىندى. ول قالا اۋداندارى اراسىنداعى كولىك بايلانىسىن جاقسارتىپ قانا قويماي, ورتالىق كوشەلەردەگى جۇكتەمەنى جەڭىلدەتەدى.
جول قۇرىلىسىنان باسقا, گازبەن جابدىقتاۋ جوبالارىنا ەرەكشە نازار اۋدارىلادى. مەملەكەت باسشىسىنىڭ جولداۋىنداعى مىندەتتەردى ىسكە اسىرۋ شەڭبەرىندە ەلوردالىق ەلدى مەكەندەردى, اتاپ ايتقاندا, تسەلينوگراد پەن ارشالى اۋداندارىن گازبەن جابدىقتاۋ بويىنشا جۇمىس جۇرگىزىلىپ جاتىر. قازىردىڭ وزىندە 407 كم گاز جەلىلەرى سالىندى, جىبەك جولى اۋىلىندا قۇرىلىس اياقتالدى. سونداي-اق «نۇرلى» وك, قوياندى مەن شۇبار ەلدى مەكەندەرىندە جۇمىس جالعاسىپ وتىر.
ورتالىق گازبەن جابدىقتاۋعا ءوڭىردىڭ 23 مىڭ تۇرعىنى قول جەتكىزە الادى. 2025 جىلى 68 مىڭ ادامدى قامتيتىن 6 ەلدى مەكەن گازبەن قامتىلادى. وسى جوبالاردى ىسكە اسىرۋ حالىقتىڭ ءومىر ءسۇرۋ ساپاسىن جاقسارتۋعا جانە زاماناۋي ينفراقۇرىلىمدى قۇرۋعا ىقپال ەتەدى.
باسپانا – باستى ماسەلە
وڭىردەگى الەۋمەتتىك ساياساتتىڭ باسىم باعىتىنىڭ ءبىرى – تۇرعىن ءۇي قۇرىلىسى. جالپى, بيىل وبلىستا 530 مىڭ شارشى مەتر تۇرعىن ءۇي پايدالانۋعا بەرىلدى. بۇل 5 مىڭنان اسا اقمولالىقتىڭ تۇرعىن ءۇي جاعدايىن جاقسارتتى. بيۋدجەت قاراجاتى ەسەبىنەن 9 كوپپاتەرلى تۇرعىن ءۇي تۇرعىزىلدى. جىل سوڭىنا دەيىن تاعى 16 تۇرعىن ءۇي پايدالانۋعا بەرىلەدى.
«مەملەكەت باسشىسىنىڭ تاپسىرماسىن ورىنداۋ شەڭبەرىندە حالىقتىڭ الەۋمەتتىك وسال توپتارى دايىن پاتەرلەردى ساتىپ الۋ ارقىلى باسپانامەن قامتاماسىز ەتىلەدى. تاڭداۋ تالاپتارى كۇشەيتىلدى. بەلگىلى ءبىر جايلىلىق كلاسى مەن قاجەتتى ينفراقۇرىلىمى بار تۇرعىن ءۇي ساتىپ الۋعا مۇمكىندىك بار. بۇل تەتىك كوپبالالى وتباسىلارعا, جەتىم بالالارعا جانە ازاماتتاردىڭ باسقا دا ساناتتارىنا ارنالعان تۇرعىن ءۇي ماسەلەلەرىن جەدەل شەشۋگە مۇمكىندىك بەرەدى. بارلىق شارا كەشەنى 2 مىڭعا جۋىق وتباسىنىڭ تۇرعىن ءۇي جاعدايىن جاقسارتادى. ەڭ باستىسى – تۇرعىن ۇيگە كەزەكتى قىسقارتۋعا مۇمكىندىك بەرەدى», دەدى م.احمەتجانوۆ.
بيىل ءحاوت ساناتىنداعى ازاماتتار ءۇشىن 736 جايلى پاتەر ساتىپ الىندى. جىل سوڭىنا دەيىن اتباسار, استراحان, بۋراباي مەن قورعالجىن اۋداندارىندا تاعى 104 پاتەر ساتىپ الىنادى. ايتارلىعى, بولاشاقتا بۇل ۇيلەر جەكەشەلەندىرۋگە جاتادى. بۇل مەحانيزم العاش رەت اقمولادان باستاۋ الدى. سونداي-اق بيىل كوكشەتاۋدا تۇرعىن ءۇي قورىن جاڭارتۋ باعدارلاماسى باستالدى. وبلىس ورتالىعىندا ەسكى ۇيلەر سىرىلىپ, ورنىنا 11 زاماناۋي تۇرعىن ءۇي كەشەنى سالىنادى.
