سۋرەتتى تۇسىرگەن – ەرلان ومار, «EQ»
كۇزدىڭ زەرلى شاپانىن سىپىرىپ تاستاپ, اق تونىن كيگەن ايماق سىرباز سۇلۋلىعىمەن كوز قارىقتىرادى. تازا اۋادا شىنى مۇزدىڭ ناق ورتاسىنداعى جۇمباقتاستىڭ جۇمباق سىرى قالىڭداي تۇسكەندەي. يت تۇمسىعى وتپەيتىن ورمان-توعاي, قۇزار جارتاس كوركەم كەيىپكە ەنگەن. بۋراباي مەن زەرەندىنىڭ كۋرورتتى ايماعى قىسقى دەمالىستى ۇناتاتىن قىرۋار حالىقتى قۇشاق جايىپ قارسى الماق, قۇر اتقا مىنگەندەي شىنىقتىرىپ, كوكىرەگىنە رۋحاني ءنار سىيلاپ اتتاندىرماق. كۇمىس كولدەر شىڭىلتىر مۇزبەن كومكەرىلىپ, جالاۋلى جاسىل دۇنيە جازدىڭ جانعا راحات ءساتى سايابىرلاعانىمەن, اۋاسى شاڭ-توزاڭنان ارىلىپ, سۇزگىدەن وتكەندەي تازارا تۇسكەن. كۋرورتتى ايماقتاعى مەكەمەلەر ەكوتۋريزمدى دامىتپاق. سان ءتۇرلى سپورتتىق شارالار ۇيىمداستىرىلماق. ەڭ باستىسى, ادام اعزاسىنا تىڭ كۇش, سونى سەرپىن بەرەتىن ساۋىقتىرۋ باعدارلامالارى كوپ-اق. كىرپياز مەيمانداردى قاباق شىتتىرماي قارسى الىپ, بار جاعدايىن جاساماق. «وقجەتپەس», «الماز», «ششۋچينسكي», «تەرراسسا پارك», «سامال», «ديسكاۆەري بوروۆوە», «گراند پريكس», «زەرەن» ءتارىزدى ساناتوريلەر قىزمەت ەتپەك.
ءبىر ايتا كەتەرلىگى, ۋاقىت وتكەن سايىن ءتۋريزمدى تەگەۋرىندى دامىتۋعا مەيلىنشە ءمان بەرىلىپ وتىر. ونىڭ ىشىندە قايىڭدى, قاراعايلى ورماندى الاڭسىز ارالاپ, قولتىعىڭىز سوگىلىپ شاڭعى تەبۋىڭىزگە ابدەن بولادى. كيەلى جەردىڭ اڭىزبەن اجارلانعان القاپتارىنا, شوقىلار مەن ىلديلاردى بويلاپ, شاڭعى جولى سالىنعان. تۋريستەردىڭ قاۋىپسىزدىگى دە قاتاڭ ەسكەرىلگەن. كونكي تەۋىپ, شانامەن سىرعانايمىن دەسەڭىز, قالاۋىڭىز ءبىلسىن. كاسىبي شاڭعى سپورتىمەن اينالىساتىندارعا دا بار مۇمكىندىك تۋدىرىلعان. مۇنداي شاڭعى جولى بۋراباي باۋرايىندا دا, زەرلى زەرەندىدە دە بار. ءتىپتى قاۋىپ-قاتەرگە تولى شىتىرمان جول, شىرعالاڭى مول كەزەڭدەر دە تۋريستەردى توسىپ تۇر. بۇل جول ادامنىڭ بويىنداعى, الپىس ەكى تامىرىنداعى قاندى ويناتىپ, ەستەن كەتپەس قىزىق سىيلاماق.
جىل سايىنعى جاتتاندى كورىنىستەن ادا, جاڭا زاماننىڭ تالابىنا تولىق جاۋاپ بەرەتىن «بۋراباي لەند» ويىن-ساۋىق پاركى جەلتوقسان ايىنىڭ ورتا شەنىندە شارتاراپتان كەلەتىن تۋريستەرگە ەسىگىن ايقارا اشپاق. جىلدىڭ باستى جاڭالىعى دا وسى. بۇل جەردە يت شانالارمەن اقشا قاردىڭ ۇستىندە سىرعاناپ, قۇتتى قيانداعى ءسىبىردىڭ ءبىر شەتىندە جۇرگەندەي اسەر الاسىز. اتقا ءمىنىپ, قىدىرۋعا دا بولادى. ءار جاستىڭ ەرەكشەلىگى ەسكەرىلگەن. بالالاردىڭ بويىنا, ويىنا لايىقتالعان الاڭدارى بار. ال ەرەسەكتەردىڭ ءار بەلەسى, ءار توبەسى اڭىزعا تۇنعان كۋرورتتى ايماقتىڭ كورگەن كوزدى سۇيسىندىرەتىن القاپتارىن ارالاپ, باعزى زاماننىڭ ەل جادىندا جاتتالىپ قالعان ەستەلىگىمەن تانىسۋىنا تولىق مۇمكىندىك بار. ايتپاقشى, قيالقۇمار كىشكەنتايلارعا ارنالعان سانتانىڭ رەزيدەنتسياسى جۇمىس ىستەيدى.
وسىنداي كوركەم دۇنيە قىزىقتىرماي قويا ما؟ كورىكتى كوكشەنىڭ قىسىن تاماشالاۋعا, تىلسىم تابيعات اياسىندا دەمالۋعا كەلەتىندەر سانى جىل سايىن وسە ءتۇسىپ وتىر. ءبىر عانا مىسال كەلتىرەلىك, «بۋراباي لەند» پاركى ءاربىر قىسقى ماۋسىمدا ەلۋ مىڭنان استام تۋريستكە قىزمەت ەتەدى. تاعى ءبىر ايتا كەتەرلىگى, دۇمەپ كەلەتىن قوناقتار جولدا بەينەت كورمەسىن دەپ جەلتوقساننىڭ 10-ىنان باستاپ «استانا-بۋراباي» جاڭا جىلدىق ۆاگونى قاتىنايتىن بولادى. بۇل دا جاعىمدى جاڭالىق ساناتىندا.
ششۋچە قالاسىنداعى وليمپيادالىق ويىندارعا دايىندىق ورتالىعىندا حالىقارالىق جارىستار ۇيىمداستىرىلادى. كاسىبي شاڭعىشىلار بايراقتى باسەكەگە تۇسەتىن ءىرى جارىستاردىڭ جيىرماعا جۋىعى وتكىزىلەدى دەپ جوسپارلانىپ وتىر. جۇلدىزشا اققان ەرجۇرەك شاڭعىشىلاردىڭ ءمىنسىز سۋرەتتەي شالت قيمىلى مەن قارشىعاشا قۇلديلايتىن كورىنىسىن تاماشالاعىسى كەلگەندەر وكىنبەسى انىق. ەلىمىزدىڭ شاڭعى ءتۋريزمى اشىق چەمپيوناتى مەن تۋريستىك كوپسايىس جارىسى وتكىزىلەدى. جالعىز تابيعاتتى عانا ەمەس, سپورتتى سەرىك ەتكەن اعايىنعا بۇل دا قىزىق بولۋعا ءتيىس.
قاراپ وتىرساڭىز, قىزىعى مول قىسقى ءتۋريزمنىڭ ءجونى بولەك. ەندەشە, كورىكتى ولكەنىڭ قىسقى دەمىمەن, قىزىقتى لەبىمەن تانىسقىڭىز كەلسە, ات باسىن بۇرا كەتىڭىز!
اقمولا وبلىسى
