بۇگىندە بەلسەندى الماتىلىقتار مەگاپوليستىڭ كورنەكتى ورىندارىنىڭ ءبىرى – باۋم توعايىندا جينالدى. ەكولوگيالىق اكتسياعا 80-نەن استام ادام قاتىستى. ولار ساياباق ايماعىن قوقىستان تازارتىپ قانا قويماي, قورشاعان ورتاعا قامقورلىق تانىتۋدىڭ ۇلگىسىن كورسەتتى. اكتسيا بارىسىندا 300 قاپ قوقىس جينالدى.
«مەملەكەت باسشىسىنىڭ باستاماسىمەن قولعا الىنعان «تازا قازاقستان» ەكولوگيالىق اكتسياسى تابيعاتقا تۇتىنۋشىلىق كوزقاراسقا قارسى ازاماتتاردى بىرىكتىرەدى. بۇل باستاما قورشاعان ورتانى ساقتاۋ ماسەلەسىنە نازار اۋدارۋعا, تۋعان جەرگە ۇقىپتى قاراۋ مادەنيەتىن قالىپتاستىرۋعا باعىتتالعان», دەدى «مەدەۋ» تابيعي پاركى ديرەكتورىنىڭ مىندەتىن اتقارۋشى ۇزاق جامبىل ۇلى.
بۇل ءىس-شارا قوعام ەكولوگيالىق ماسەلەلەردى شەشۋ ءۇشىن بىرىگە الاتىنىن كورسەتتى. اكتسياعا قاتىسۋشىلار اراسىندا بەلگىلى مادەنيەت قايراتكەرلەرى دە بولدى. ولار قالا تۇرعىندارىن قوعامدىق ورىنداردىڭ تازالىعىن ساقتاۋعا جانە تابيعاتقا قامقورلىق جاساۋعا شاقىردى.
«تازا قازاقستان» تۇجىرىمداماسى – ەلىمىزدىڭ ەكولوگيالىق مادەنيەتىن قالىپتاستىرۋ مەن قاۋىپسىز بولاشاعىنا جاسالعان ماڭىزدى قادام. ءار تۇرعىن بۇل ىسكە ۇلەس قوسۋى كەرەك. بۇل ءوزىمىز, تابيعاتىمىز جانە كەلەشەك ۇرپاق ءۇشىن قاجەت. ءبىز ءوز ۇلگىمىزبەن تابيعاتتى ساقتاۋ مەن تازالىقتى قورعاۋ ماسەلەسىنە نازار اۋدارتقىمىز كەلەدى. تابيعاتقا ۇقىپتى قاراڭىزدار, - دەدى «الاتاۋ» ءداستۇرلى ونەر تەاترىنىڭ اكتريساسى الما امانجولوۆا.
الماتىلىقتار مەن قالا قوناقتارى قالانىڭ كوشەلەرى مەن ساياباقتارىنىڭ ايتارلىقتاي تازا بولعانىن اتاپ ءوتتى. ارينە, تازارتۋدى قاجەت ەتەتىن جەكە ۋچاسكەلەر بار, بىراق جالپى العاندا قالالىق قىزمەتتىڭ جۇمىسى كورىنىپ-اق تۇر.
«مەن وسى ماڭدا تۇرامىن, سۇيىكتى ورنىمىزدىڭ ءاردايىم تازارتىلاتىنىن كورەمىن. ءار جاستاعى تۇرعىنداردىڭ بەي-جاي قاراماي, پايدالى اكتسيالارعا قاتىساتىنى قۋانتادى. قالاعا قامقورلىق جاسالىپ جاتىر, كوشەلەر مەن اۋلالار تازا, جيناقى بولىپ قالعان. ارينە, ءبارى بىردەن ءمىنسىز بولمايدى, ويتكەنى بۇل ءىرى قالا. وكىنىشكە قاراي, تۇرعىنداردىڭ وزدەرى ءجيى قوقىس تاستايدى. ەڭ باستىسى, قالا اكىمى الماتىنى تازا جانە جيناقى ەتۋ ماقساتىن قويدى, بۇل ىستە ءبارىمىزدىڭ قاتىسۋىمىز قاجەت», دەپ جەرگىلىكتى تۇرعىن الماگۇل ويىن ايتتى.
ەسكە سالايىق, تازالىق اپتالىعى اياسىندا قالانىڭ كوممۋنالدىق قىزمەتى سۋىق پەن قاردىڭ جاۋىنا دايىندىقتى اياقتادى. قىسقى ۋاقىتتا قالاعا قىزمەت كورسەتۋ ءۇشىن 841 بىرلىك تەحنيكا مەن 1400 جۇمىسشى جۇمىلدىرىلدى. «الماتى تازالىق» مكك اۆتوپاركى جۇمىستى ءتيىمدى جۇرگىزۋ ءۇشىن 32 زاماناۋي ماشينامەن تولىقتى. جالپى اۋماعى 25,1 ملن شارشى مەتر, ۇزىندىعى 2 777 كم بولاتىن 2 318 كوشە تازارتىلدى. كوشە-جول جەلىسىن جيناۋعا 10 مەردىگەر ۇيىم جاۋاپتى.
ارىق جەلىسىنىڭ ۇزىندىعى 1 525 كم بولاتىن بولىگى تازارتۋعا ەرەكشە نازار اۋدارىلدى. كۇنىنە شامامەن 160 تەكشە مەتر پلاستيك پەن جاپىراقتار سياقتى قوقىس شىعارىلادى.
توو «Eco Almaty» الماتى قالاسى اۋماعىندا ۇزىندىعى 19,2 كم بولاتىن سۋ ارنالارىنىڭ تازارتۋ جۇمىستارىن جۇرگىزدى. ونىڭ ىشىندە, ۇلكەن الماتى وزەنىنىڭ ءال-فارابي داڭعىلىنان ساتباەۆ كوشەسىنە دەيىنگى بولىگى, ەسەنتاي وزەنىنىڭ ءال-فارابي داڭعىلىنان شەۆچەنكو كوشەسىنە دەيىنگى بولىگى جانە د.قوناەۆ اتىنداعى ۇاك ارنالارى تازارتىلدى.
سونىمەن قاتار «تازا قازاقستان» تۇجىرىمداماسى اياسىندا جاڭا ەرەجەلەرگە سايكەس 2 مىڭعا جۋىق كاسىپكەر اباتتاندىرۋ پاسپورتتارىنا قول قويدى. بۇل شارالار الماتىلىقتار مەن قالا قوناقتارى ءۇشىن قولايلى, قاۋىپسىز جانە ەكولوگيالىق تازا ورتا قۇرۋ ستراتەگياسىنىڭ ءبىر بولىگى ەكەنىن كورسەتەدى.
