فوتو: اشىق دەرەكوز
«بيىلعى ەگىنشىلىك كەزەڭىندە ءبىز ايتارلىقتاي ناتيجەلەرگە قول جەتكىزدىك. ءوڭىردىڭ اگرارشىلارى ورتاشا ونىمدىلىكتى 14 تس/گا-دان اسىرىپ, سوڭعى ونجىلدىقتا بولماعان 6,6 ملن توننادان استام كولەمدە رەكوردتىق استىق جينادى, بۇل - قاجىرلى ەڭبەك, مەملەكەتتىك قولداۋ جانە زاماناۋي اگروتەحنولوگيالاردى ۋاقتىلى قولدانۋدىڭ ناتيجەسى», دەدى وبلىس اكىمى مارات احمەتجانوۆ ورتالىق كوممۋنيكاتسيالار قىزمەتىندە وتكەن بريفينگ بارىسىندا.
اۋىل شارۋاشىلىعى سالاسىندا ءوڭىردىڭ جالپى ءونىمى جوعارى ناتيجەلەرگە قول جەتكىزدى, جىل سوڭىنا قاراي اۋىل شارۋاشىلىعى ءونىمى كولەمىندە ءبىر تريلليون تەڭگەدەن استام قاراجات كۇتىلەدى, بۇل وتكەن جىلمەن سالىستىرعاندا ءبىر جارىم ەسەگە كوپ.
سونىمەن قاتار مال شارۋاشىلىعى ونىمدەرىنىڭ كولەمى دە ارتىپ كەلەدى. بيىل تسەلينوگراد جانە ارشالى اۋداندارىندا 3 ءسۇت-تاۋار فەرماسى ىسكە قوسىلدى, تاعى ەكەۋى اياقتالۋ ساتىسىندا تۇر.
وڭدەۋ سالاسىندا دا وڭ ديناميكا بايقالادى. بۇل باعىتتا وڭىردە جىل باسىنان بەرى 208 ملرد تەڭگەدەن استام سوماعا ازىق-ت ۇلىك وندىرگەن ەت, ءسۇت, مايلى جانە ءداندى داقىلداردى وڭدەيتىن 67 كاسىپورىن جۇمىس ىستەيدى.
مارات احمەتجانوۆ اگرارشىلاردى مەملەكەتتىك قولداۋ شارالارى تۋرالى دا ايتتى. فەرمەرلەر اراسىندا «كەڭ دالا 2» كوكتەمگى ەگىس جانە ەگىن جيناۋ جۇمىستارىنا جەڭىلدىكپەن كرەديت بەرۋ باعدارلاماسى ەرەكشە سۇرانىسقا يە, ول اۋىل شارۋاشىلىعى تاۋارىن وندىرۋشىلەرگە جالاقى تولەۋ ءۇشىن اينالىم قاراجاتىن تولىقتىرۋعا, ساپالى تۇقىمداردى, مينەرالدى تىڭايتقىشتاردى جانە باسقا دا قاجەتتى تاۋارلار مەن قىزمەتتەردى الدىن الا ساتىپ الۋعا كومەكتەسەدى.
