قازاقستاننىڭ مادەنيەت جانە اقپارات ءمينيسترى ايدا بالاەۆا پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«حالقىمىزدىڭ ءبىرتۋار پەرزەنتى احمەت جۇبانوۆتىڭ باستاماسىمەن اشىلعان ءبىلىم ورداسى بۇگىندە دارىندى بالالاردى تاربيەلەۋدىڭ وزىندىك ءداستۇرىن قالىپتاستىرعان ىرگەلى وقۋ ورنىنا اينالدى. سىزدەرگە قازاقتىڭ مۋزىكا ونەرىن دامىتۋ جولىنداعى ەسەلى ەڭبەكتەرىڭىز ءۇشىن زور ريزاشىلىعىمدى بىلدىرەمىن. الداعى ۋاقىتتا دا دارىندى ءارى سانالى ۇرپاق ءوسىرىپ, ەل يگىلىگىنە ايانباي قىزمەت ەتە بەرەسىزدەر دەپ سەنەمىن», – دەلىنگەن مەملەكەت باسشىسىنىڭ حاتىندا.
سونداي-اق, قاسىم-جومارت توقاەۆ ءتۇرلى بايقاۋلاردا توپ جارىپ, حالقىمىزدىڭ مەرەيىن اسىرعان مەكتەپ شاكىرتتەرىن بۇكىل ەلىمىز ماقتان تۇتاتىنىن اتاپ ءوتتى.
مەرەيتويعا وراي مەكتەپتىڭ بىرقاتار ۇستازدارىنا مەملەكەتتىك ماراپاتتار تابىستالدى.
مەكتەپ-ينتەرناتتان 60 جىل ىشىندە مىڭعا جۋىق مۋزىكانت تۇلەپ ۇشقان.
وقۋ ورنىندا ءبىلىم العان 800-دەن استام ونەرپاز حالىقارالىق جانە رەسپۋبليكالىق كونكۋرستار مەن فەستيۆالدەردىڭ لاۋرەاتى اتانعان. قازىرگى تاڭدا مەكتەپتە 500-گە جۋىق دارىندى بالا ءبىلىم الۋدا.
وقۋ ورنى «تەوريا جانە كومپوزيتسيا», «سكريپكا جانە الت», «ۆيولونچەل جانە كونتراباس», «ارنايى فورتەپيانو», «ۇرمەلى جانە ۇرمالى اسپاپتار», «حالىق اسپاپتارى», «مىندەتتى فورتەپيانو», «حور ديريجەرلىعى» جانە «كونتسەرتمەيستەرلىك شەبەرلىك» سەكىلدى 10 باعىت بويىنشا كاسىبي مۋزىكانتتاردى دايىندايدى.
