بىلتىرعى جىلدىڭ جەتىستىگى جەتەرلىك

استانا. 2 اقپان. دزيۋدو – جەر جۇزىنە ەڭ تانىمال سپورت ءتۇرىنىڭ ءبىرى. بۇگىندە سپورتتىڭ بۇل تۇرىنەن دۇنيەجۇزىنىڭ كوپتەگەن ەلدەرىندە ۇلتتىق فەدەراتسيالار جۇمىس ىستەپ, كۇنشىعىس ەلىنىڭ ءتول كۇرەسىن دامىتىپ جاتىر. ءبىزدىڭ ەلدە دە دزيۋدو كۇرەسىمەن اينالىساتىن جاستاردىڭ قاتارى جىل سايىن كوبەيىپ كەلەدى. وسى ورايدا دزيۋدو فەدەراتسياسىنىڭ جاستاردى سپورتقا تارتىپ, كۇرەستىڭ بۇل ءتۇرىن دامىتۋدا جاساپ جاتقان جۇمىسىن ايتا كەتكەنىمىز ءجون. جاقىندا ءبىز «دزيۋدو فەدەراتسياسى» رەسپۋبليكالىق قوعامدىق بىرلەستىگىنىڭ ءبىرىنشى ۆيتسە-پرەزيدەنتى ماراتبەك مىقتىبەكوۆپەن كەزدەسكەنىمىزدە ول وتكەن جىلدا دەيۋدونى دامىتۋدا قانداي جۇمىستاردىڭ جاسالعانى تۋرالى ايتىپ بەردى. بۇل تۋرالى egemen.kz ءتىلشىسى حابارلادى. -بىلتىر ۇلتتىق قۇرامانى كەشەندى جارىستارعا دايىنداۋ ماقساتىندا قانداي جۇمىس جۇرگىزىلدى؟ - الدىمەن ۇلتتىق قۇرامانىڭ دايىندىعىنا بايلانىستى ايتارىم, ءبىز كەڭەسشى-جاتتىقتىرۋشى رەتىندە بەلگيالىق بەلگىلى باپكەر الەكساندر ياتسكەۆيچتى شاقىردىق. ول كەزىندە 10-نان استام وليمپيا ويىندارىنىڭ جانە الەم بىرىنشىلىكتەرىن جۇلدەگەرلەرىن جانە 50-گە جۋىق ەۋروپا چەمپيوندارى مەن جۇلدەگەرلەرىن دايىنداعان جاتتىقتىرۋشى. ءوزى وليمپيا ويىندارىنىڭ جانە الەم بىرىنشىلىكتەرىنىڭ جۇلدەگەرى, ءۇش دۇركىن ەۋروپا چەمپيونى. قازىر  ەۋروپا دزيۋدو وداعىنىڭ سپورت ديرەكتورى قىزمەتىن اتقارادى. وسى بىلىكتى مامانمەن اقىلداسا كەلە, ەرلەر ۇلتتىق قۇراماسىنىڭ 2014 جانە 2015 جىلدارعا ارنالعان جاتتىعۋ جوسپارى جاسالدى. -جالپى العاندا بىلتىر ەلىمىزدە قانشا جارىس وتكىزىلدى؟ -بىلتىر ءار ءتۇرلى جاستاعى سپورتشىلار اراسىندا 4 ەل بىرىنىشلىگى وتكىزىلدى. ەرەسەكتەر اراسىندا باسقا مەملەكەتتەردەن كەلگەن سپورتشىلاردىڭ قاتىسۋىمەن 5 تۋرنير, جاستار جانە جاسوسىپىرىمدەر اراسىندا 6 جارىس, ونىڭ ىشىندە قاراعاندى قالاسىندا وتكىزىلگەن جاسوسپىرىمدەر اراسىنداعى ازيا اشىق كۋبوگىن اتاپ وتكەن ءجون. ارينە, ەڭ ۇلكەن جارىسىمىز استانادا بىلتىر وتكىزىلگەن گران پري. وعان 40 – قا جۋىق مەملەكەتتەن 300-گە تارتا سپورقاتىستى. وسى تۋرنيردە ءبىزدىڭ دزيۋدوشىلار 2 التىن, 2 كۇمىس جانە 3 قولا مەدال يەگەرى اتاندى. جارىستىڭ ۇيىمداستىرىلۋ دارەجەسى حالىقارالىق دزيۋدو فەدەراتسياسى تاراپىنان جوعارى باعالاندى. -وڭىرلەردەگى سپورت مەكتەپتەرىنە فەدەراتسيا تاراپىنان قانداي دا ءبىر كومەك كورسەتىلە مە؟ -دزيۋدو فەدەراتسياسى وبلىستارداعى سپورت مەكتەپتەرىنىڭ ماتەريالدىق-تەحنيكالىق بازالارىن نىعايتۋ جولىندا دا جۇمىس جاساۋدا. ەكى جىل ىشىندە دزيۋدو بولىمشەلەرى مەن ءتۇرلى مەكتەپتەرگە 13 كومپلەكت تاتامي مەن 178 كومپلەكت كيمونو بەرىلدى. -جاتتىقتىرۋشىلار  مەن تورەشىلەردىڭ بىلىكتىلىگىن ارتتىرۋ ماقساتىندا قانداي جۇمىس جۇرگىزىلۋدە؟ -فەدەراتسيا سپورتشىلار مەن تورەشىلەردىڭ جانە باپكەرلەردىڭ بىلىكتىلىگىن ارتتىرۋ ءۇشىن ەرەكشە كوڭىل بولۋدە. حالىقارالىق سەمينارلار مەن بىلىكتىلىگىن ارتتىرۋ كۋرستارىندا 30-عا تارتا جاتتىقتىرۋشى مەن تورەشى وقىپ كەلدى. وڭىرلەردە وتاندىق جانە شەتەلدىك بىلىكتى مامانداردى تارتىپ, سەمينارلار وتكىزۋ ارقىلى كادرلاردى وقىتۋعا ۇلكەن كوڭىل بولىنۋدە. وسى باعىتتا 2014 جىلى ەلىمىزدە 7 سەمينار وتكىزىلدى. ۇلتتىق قۇراما ساپىنداعى سپورتشىلاردى وقىتۋعا ءجىتى كوڭىل بولىنۋدە. بارلىعى ءتۇرلى جوعارى جانە باسقا دا وقۋ ورىندارىندا وقيدى, بىرقاتارى ءبىلىم وشاقتارىن ءبىتىرىپ ۇلگەرگەن. -سپورتشىلارعا قانداي مەديتسينالىق كومەك كورسەتىلۋدە؟ فەدەراتسيا جۇمىسىنىڭ نەگىزگى باعىتتارىنىڭ ءبىرى - سپورتشىلاردىڭ اۋرۋلارىنىڭ الدىن الۋ, ءتۇرلى جاراقاتتان كەيىن ولاردى ەلىمىزدىڭ جانە شەتەلدىك ەمحانالاردا ەمدەتۋ. كونفەدەراتسيانىڭ كومەگىنىڭ ارقاسىندا بيىل يسلام بوزباەۆ پەن ليم سەرگەي شەتەلدەن ساپالى مەديتسينالىق كومەك الىپ, بەيىمدەلۋ ۇستىندە. دوپينگكە قارسى ورتالىقپەن بىرلەسە تىيىم سالىنعان پرەپاراتتاردى قولدانباۋ جونىندە تۇسىندىرمە جۇمىستارى جۇرگىزىلۋدە. بىرنەشە كەلەڭسىز جاعدايدىڭ ورىن الۋىن, سپورتشىلار مەن باپكەرلەردىڭ تىيىم سالىنعان پرەپاراتتار مەن سۋسىنداردىڭ جانە تاعامعا قوساتىن زاتتاردىڭ ءتىزىمىن تولىق بىلمەۋىنەن بولدى. -قازاقستاندى دزيۋدو كۇرەسىن جاستار اراسىندا ناسيحاتتاۋدا قانداي جۇمىستار جۇرگىزىلىپ جاتىر؟ - ەلىمىزدە دزيۋدونى ناسيحاتتاۋ باعىتىندا اۋقىمدى جۇمىس جاسالۋدا. فەدەراتسيانىڭ رەسمي سايتى جۇمىس ىستەۋدە. جاقىندا الەم بىرىنشىلىگىنىڭ سايتىن ىسكە قوستىق, وتكىزىلەتىن شارالاردىڭ بارلىعى اقپارات قۇرالدارىندا جاريالانىپ وتىرادى. فەدەراتسيانىڭ «كازسپورت» تەلەارناسىمەن تىعىز جۇمىسىن ەرەكشە اتاپ ءوتۋ كەرەك. وسى ارنا ارقىلى جانكۇيەرلەرىمىزگە جارىستار مەن دزيۋدوشىلار تۋرالى ماتەريالداردى كورۋگە مۇمكىندىك بار. -دزيۋدونىڭ دامۋىندا سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ ءرولى قانداي؟ -كونفەدەراتسيا قۇرالعاننان بەرى ماتەريالدىق جانە قارجىلىق ماسەلەلەر تولىققاندى شەشىلدى. وقى-جاتتىعۋ وتكىزەتىن سپورتتىق بازالار سانى كوبەيىپ, ولاردى جابدىقتاۋ جاعى دا جوعارى دەڭگەيگە كوتەرىلدى. -بيىل قانداي نەگىزگى شارالار جوسپارلانىپ وتىر؟ -قازاقستان ءۇشىن حالىقارالىق دزيۋدو فەدەراتسياسىنىڭ استانا قالاسىندا دزيۋدو كۇرەسىنەن الەم بىرىنشىلىگىن وتكىزۋ قۇقىعى بەرىلگەندىگىنىڭ ءوزى ءبىز ءۇشىن ماڭىزدى. بۇل دزيۋدونىڭ ەلىمىزدە ءارى قاراي ناسيحاتتالۋىنا مۇمكىندىك بەرمەك. 2013 جىلدىڭ قىركۇيەگىندە حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر, قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆ جانە الماتى قالاسىنىڭ اكىمى احمەتجان ەسىموۆ دزيۋدو ورتالىعىنىڭ قۇرىلىسىنا ساتتىلىك تىلەپ, العاشقى كىرپىشىن قالاعان ەدى. ەندى وسى سپورت ورداسىنىڭ قۇرىلىسىن 2015 جىلى اياقتاۋ جوسپارلانىپ وتىر. -جاڭا جىلدا ءوز ارىپتەستەرىڭىزبەن جانكۇيەرلەرگە قانداي تىلەگىڭىز بار ؟ – ەڭ الدىمەن وبلىستىق سپورت باسقارمالارىنا جانە فەدەراتسيا پرەزيدەنتتەرىنە دزيۋدوشىلارىمىزدى قولداعاندارى ءۇشىن العىسىمدى بىلدىرەم. بارلىق باپكەرلەر مەن سپورتشىلارعا, جانكۇيەرلەرگە ساتتىلىك, كوتەرىڭىكى كوڭىل كۇي جانە وتباسىلارىنا بەرەكە تىلەيمىن! -اڭگىمەڭىزگە راحمەت! اڭگىمەلەسكەن داستان كەنجالين. دەرەك: egemen.kz سۋرەت: سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى.