فوتو: تاسس
مەملەكەت باسشىسىنىڭ تاپسىرماسىن ورىنداۋ شەڭبەرىندە 2025 جىلعى كوكتەمگى ەگىس جانە ەگىن جيناۋ جۇمىستارىنا 700 ملرد تەڭگەگە دەيىن باعىتتالادى, ونىڭ 560 ملرد تەڭگەسى كاپيتالدىڭ نارىقتىق كوزدەرىنەن تارتىلاتىن بولادى.
بۇگىننەن باستاپ «اگرارلىق نەسيە كورپوراتسياسى» اق جىلدىق 5% دەڭگەيىندە جەڭىلدىكتى سىياقى مولشەرلەمەسىمەن «كەڭ دالا 2» باعدارلاماسى بويىنشا قارجىلاندىرۋ تەتىگى ىسكە قوسىلدى.
«684 اۋىل شارۋاشىلىعى تاۋارىن وندىرۋشىلەردەن شامامەن 82 ملرد تەڭگە سوماعا وتىنىمدەردىڭ جالپى پۋلى قالىپتاستىرىلدى, ونىڭ ىشىندە 176 ءوتىنىم جۇمىسقا قابىلداندى. تاعى 509 ءوتىنىش بويىنشا 59,9 ملرد تەڭگەگە قۇجاتتار جينالادى. وتىنىمدەردىڭ باسىم كوپشىلىگى سولتۇستىك قازاقستان جانە قوستاناي وبلىستارىنىڭ فەرمەرلەرىنەن كەلىپ ءتۇستى», دەلىنگەن حابارلامادا.
قارجىلاندىرۋ العاش رەت كوكتەمگى ەگىس جانە ەگىن جيناۋ جۇمىستارىن جۇرگىزۋدەن بۇرىن باستالعانىن اتاپ ءوتۋ ماڭىزدى, بۇل فەرمەرلەرگە تۇقىمدى, تىڭايتقىشتى الدىن-الا ساتىپ الۋعا, تەحنيكانى دايىنداۋعا جانە بارلىق قاجەتتى جۇمىستى ساپالى جۇرگىزۋگە مۇمكىندىك بەرەدى.
ۇكىمەت قابىلداعان شارالاردىڭ ارقاسىندا شارۋالار وزدەرىنە بارىنشا قولايلى جاعدايلار بويىنشا جەدەل قارجىلىق قولداۋ الادى. بۇدان باسقا, قارىزداردى رەسىمدەۋ ءۇشىن دە, ولاردى كەيىننەن وتەۋ ءۇشىن دە جۇگىنۋگە بولاتىن قارجى ينستيتۋتتارىنىڭ سانى ۇلعايدى. قاراجاتقا ەكىنشى دەڭگەيلى بانكتەر, نەسيەلىك سەرىكتەستىكتەر, الەۋمەتتىك-كاسىپكەرلىك كورپوراتسيالار جانە اگرارلىق نەسيە كورپوراتسياسى ارقىلى قول جەتكىزۋگە بولادى.
سونداي-اق كاسىپكەرلەر ءجيى كوتەرەتىن كەپىلمەن قامتاماسىز ەتۋدىڭ جەتىسپەۋشىلىگى ماسەلەلەرىن شەشۋ ءۇشىن «كەڭ دالا 2» باعدارلاماسى بويىنشا قارىز سوماسىنىڭ 85%-ىن «دامۋ» كاسىپكەرلىكتى دامىتۋ قورى كەپىلدىك بەرەدى.
كونسۋلتاتسيا الۋ جانە وتىنىمدەر بەرۋ ءۇشىن «اگرارلىق نەسيە كورپوراتسياسى» اق-نىڭ جاقىن ماڭداعى وڭىرلىك فيليالدارىنا جۇگىنۋ قاجەت.
