قوستاناي. 2 اقپان. رۋدنىي يندۋستريالىق ينستيتۋتىندا «ستۋدەنتتەر مەن كاسىپكەرلەر اليانسى» دەگەن پيلوتتىق جوبانىڭ اشىلۋ سالتاناتى بولدى. بۇل تۋرالى egemen.kz ءتىلشىسى حابارلادى.
ستۋدەنتتەر مەن كاسىپكەرلەر اليانسىنىڭ سالتاناتتى اشىلۋ ءراسىمى اياسىندا قاراماعىنداعى بيزنەس-مەكتەپتىڭ العاشقى وتىرىسى ءوتتى. وعان ستۋدەنتتەرمەن قاتار رۋدنىيلىق كاسىپكەرلەر پالاتاسى, كاسىپكەرلىكتى قولداۋ ورتالىعى مەن شاعىن جانە ورتا بيزنەس وكىلدەرى قاتىستى.
«قازاقستان-2050» ستراتەگياسىندا كاسىپكەرلىكتى ۇلتتىق ەكونوميكانىڭ جەتەكشى كۇشى رەتىندە جان-جاقتى قولداۋ ءارى شاعىن جانە ورتا بيزنەستىڭ ەكونوميكاداعى ۇلەسىن 2030 جىلعا قاراي ەكى ەسەگە ارتتىرۋ مىندەتى قويىلدى. الايدا, جاستار اراسىندا كاسىپكەرلىكتىڭ بۇگىنگى جاعدايى تۋرالى ايتقاندا, شەشىمىن تاپپاعان كوپتەگەن ماسەلەلەر ويعا ورالاتىنى انىق. سونىڭ ىشىندە كوللەدج نەمەسە ۋنيۆەرسيتەت قابىرعاسىندا جۇرگەن جاستارعا كاسىپكەرلىكتىڭ قىر-سىرىن مەڭگەرتۋ – ەلباسى قويىپ وتىرعان ماڭىزدى تاپسىرمالاردىڭ ءبىرى. وسى پيلوتتىق جوبانىڭ اۆتورى, ينستيتۋتتىڭ تاربيە ءىسى جونىندەگى پرورەكتورى جاسۇلان الپىسباەۆ ءبىلىم ورداسىنىڭ تۇلەكتەرى بولاشاقتا ءوز ءىسىن اشاتىن تابىستى كاسىپكەرلەردىڭ قاتارىنا قوسىلۋ ءۇشىن بارلىق جاعدايدى جاسايتىنىن ايتادى.
ستۋدەنتتەر مەن كاسىپكەرلەر اليانسىنىڭ توراعاسى جالۇلان الپىسباەۆ: «بيزنەس-مەكتەپتە ستۋدەنتتەرىمىز ەكونوميكانىڭ ناقتى سەكتورىندا جۇمىس ىستەپ جۇرگەن كاسىپكەرلەردەن تەوريالىق جانە پراكتيكالىق ءبىلىم الادى. ەڭ باستىسى, وقىتۋ تەگىن جانە مەكتەپتى ءساتتى تامامداعان تۇلەككە ارنايى سەرتيفيكات بەرىلەدى» دەدى.
كەزدەسۋدە قوستاناي وبلىستىق كاسىپكەرلەر پالاتاسى رۋدنىي فيليالىنىڭ ديرەكتورى سەرىكباي ابىلعازيەۆ پەن كاسىپكەرلىكتى قولداۋ ورتالىعىنىڭ مەنەدجەرى ولگا پريادكو يگى باستاماعا تابىس تىلەپ, ءوز تاراپىنان ستۋدەنتتەرگە اقپاراتتىق جانە كونسۋلتاتسيالىق كومەك كورسەتۋگە ءاردايىم دايىن ەكەندىكتەرىن جەتكىزدى.
كەزدەسۋ سوڭىندا بيزنەس-مەكتەپتىڭ ءبىر توپ تىڭداۋشىلارى كوكەيدەگى ساۋالدارىنا كاسىپكەرلەر جاۋاپ بەردى, پىكىر الماستى.
ءنازيرا جارىمبەتوۆا.
دەرەك, سۋرەت egemen.kz.
