فوتو: ۆەدومستۆو
ساراپشى 2003 جىلى قابىلدانعان, كليماتتىق وزگەرىستەر بولىپ جاتقان قازىرگى زامان سۇرانىسىنا سايكەس كەلمەيتىن قولدانىستاعى سۋ كودەكسىنە 20 جىلدا 272 وزگەرىس ەنگىزىلگەنىن ايتتى. ونىڭ ايتۋىنشا, قازىرگى كودەكستىڭ لوگيكالىق تۇرعىدا سايكەس كەلمەيتىن تۇستارى دا بار.
«جاڭا رەداكتسيادا كودەكس نورمالارى جۇيەلەنىپ, سۋ رەسۋرستارىن ۇنەمدەۋگە جانە ونى قورعاۋعا باسىمدىق بەرىلەدى. ماسەلەن, باسسەيندىك ينسپەكتسيالارعا مەملەكەتتىك باقىلاۋ فۋنكتسيالارىمەن قاتار تەرگەۋ فۋنكتسيالارى دا بەرىلىپ وتىر. بۇل سۋدى زاڭسىز پايدالانۋشىلارمەن كۇرەستى كۇشەيتۋگە مۇمكىندىك بەرەدى», دەدى ينجەنەر-گيدروتەحنيك ءامىرحان كەنشىموۆ.
سۋ رەسۋرستارى جانە يرريگاتسيا مينيسترلىگى ءمالىم ەتكەندەي, اتالعان ۆەدومستۆو ازىرلەگەن جاڭا سۋ كودەكسىنىڭ جوباسىن ءماجىلىس دەپۋتاتتارى ءبىرىنشى وقىلىمدا ءبىراۋىزدان ماقۇلدادى. قۇجات كليماتتىڭ وزگەرۋىنە بەيىمدەلۋگە جانە سۋ ۇنەمدەۋ پرينتسيپتەرىن ەنگىزۋگە ايرىقشا نازار اۋدارادى. العاش رەت سۋ نىساندارىن سارقىلۋدان جانە باسقا دا جاعىمسىز سالداردان قورعايتىن «ەكولوگيالىق اعىن» ۇعىمى ەنگىزىلەدى. سونداي-اق شاعىن كولدەردى, وزەندەردى, توعانداردى, مۇزدىقتاردى, سۋلى-باتپاقتى ايماقتاردى قورعاۋ جونىندە نورمالار ەنگىزىلدى.
مەملەكەت باسشىسىنىڭ تاپسىرماسى بويىنشا كودەكس جوباسىنا ەلدى مەكەندەر مەن نىسانداردى تاسقىن جانە ەرىگەن قار سۋىنان قورعاۋ ءىس-شارالارى ەنگىزىلدى. سۋ رەسۋرستارىن باسقارۋداعى ۇيلەستىرۋدى جاقسارتۋ ءۇشىن مەملەكەتتىك جانە جەرگىلىكتى اتقارۋشى ورگانداردىڭ, جەرگىلىكتى ۋاكىلەتتى ورگانداردىڭ قۇزىرەتتەرى ايقىندالدى.
