قازاقستان پرەزيدەنتى ءپۋتيندى ەلورداداعى رەزيدەنتسياسىندا قابىلداۋ كەزىندە قازاقستان جاھاندىق كۇردەلى كەزەڭدە رەسەيدىڭ سەنىمدى ستراتەگيالىق سەرىكتەسى ءارى وداقتاسى ەكەنىن, الداعى ۋاقىتتا دا بۇل باعىتتان اينىمايتىنىن اتاپ ءوتتى.
مەملەكەت باسشىسى ەكىجاقتى قارىم-قاتىناستار ستراتەگيالىق سەرىكتەستىكتىڭ بەرىك ىرگەتاسى نەگىزىندە نىعايىپ كەلە جاتقانىن مالىمدەدى.
قاۋىپسىزدىك ماسەلەلەرىن تالقىلاماق
رەسەي پرەزيدەنتى ۆلاديمير پۋتين ورتالىق ازياداعى وداقتاسىمەن قارىم-قاتىناستى نىعايتۋعا باعىتتالعان ەكى كۇندىك ساپارمەن قازاقستانعا باردى.
سونداي-اق بۇل ساپاردا ۇقشۇ ۇيىمىنا مۇشە قازاقستانمەن قاۋىپسىزدىك ماسەلەلەرىن تالقىلاماق.
ءپۋتيننىڭ ساپارى قارساڭىندا رەسەيلىك «يزۆەستيا» گازەتىندە جاريالانعان ماقالاسىندا قاسىم-جومارت توقاەۆ قازاقستان مەن رەسەي كوپپوليارلى الەم, بەيبىت ديالوگ, بارلىق مەملەكەتتىڭ ەگەمەندىگىن قۇرمەتتەۋ سياقتى يدەيالاردى دارىپتەپ, حالىقارالىق ارەنادا ءوزارا تابىستى قارىم-قاتىناس جاساپ وتىرعانىن اتاپ ءوتتى.
عارىشتى بىرلەسىپ زەرتتەيدى
جاڭا جاھاندىق ءتارتىپ جاعدايىندا ستراتەگيالىق ارىپتەستىكتى تەرەڭدەتۋ تۋرالى قوس ەل پرەزيدەنتتەرىنىڭ بىرلەسكەن مالىمدەمەسىندە تاراپتار 70 جىلدىق مەرەيتويى كەلەسى جىلى كەڭىنەن اتاپ وتىلەتىن «بايقوڭىر» عارىش ايلاعىنىڭ تاريحي ماڭىزى تۋرالى ورتاق ۇستانىمدارىن راستادى.
«بايقوڭىر» عارىش ايلاعى – جالپىادامزاتتىڭ ورتاق يگىلىگى», دەدى قاسىم-جومارت توقاەۆ پەن ۆلاديمير پۋتين بىرلەسكەن مالىمدەمەدە. ولار عارىشتى بىرلەسىپ زەرتتەۋدى ودان ءارى جالعاستىرۋعا ۋاعدالاستى.
وداقتاستىق بارلىق سالادا دامىپ كەلەدى
قازاقستان مەن رەسەيدىڭ ىنتىماقتاستىعى شىن مانىندە وداقتاستىق سيپاتتا جانە بارلىق سالادا بەلسەندى تۇردە دامىپ كەلەدى. بۇل تۋرالى «كازاحستانسكايا پراۆدا» گازەتىندە جاريالانعان رەسەي پرەزيدەنتى ۆلاديمير ءپۋتيننىڭ ماقالاسىندا ايتىلعان.
رەسەي پرەزيدەنتى قازاقستانعا كەزەكتى مەملەكەتتىك ساپارى قارساڭىندا جارىق كورگەن ماقالاسىندا ەكى ەل اراسىنداعى قارىم-قاتىناستاردىڭ قازىرگى جاعدايى مەن بولاشاعى تۋرالى ءوز كوزقاراسىمەن ءبولىستى. ول رەسەي قازاقستاننىڭ ءىرى ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.
دوستىقتى تەرەڭدەتۋگە دايىن
ۆ.پۋتين قازاقستان گازەتىندە جاريالانعان ماقالاسىندا قازاقستاننىڭ مادەني, رۋحاني-ادامگەرشىلىك قۇندىلىقتارىنا دەگەن ىنتاسىن جوعارى باعالاپ, استانامەن دوستىق جانە وداقتاستىق قارىم-قاتىناستاردى ودان ءارى دامىتۋعا دايىن ەكەنىن ايتتى.
سارسەنبىدە رەسەيدىڭ مەملەكەتتىك باق-تارى ءپۋتيننىڭ ۇشاعى ەلورداعا قونعان ءساتىنىڭ ءتۇسىرىلىمىن كورسەتتى. پۋتين دامىپ كەلە جاتقان ەكونوميكالىق اليانستى كەڭەيتۋدىڭ دە ورتاق كەلىسىمدەرى تۋرالى ماسەلە قوزعادى.
بىرلەسكەن جوبالاردى پىسىقتادى
رەسەي پرەزيدەنتى ۆلاديمير پۋتين قازاقستان پرەزيدەنتى قاسىم-جومارت توقاەۆتىڭ شاقىرۋىمەن استاناعا مەملەكەتتىك ساپارمەن كەلدى.
قازاقستان رەسەيدىڭ ەجەلدەن اسكەري جانە ەكونوميكالىق سەرىكتەسى جانە الپاۋىت كورشىمەن 7 500 شاقىرىم (4 650 ميل) شەكارانى بولىسەدى.
ەكى ەل باسشىلارى كەلىسسوزدەر بارىسىندا ساۋدا-ەنەرگەتيكالىق بايلانىستاردى دا تالقىلاپ, بىرقاتار بىرلەسكەن جوبانى ەگجەي-تەگجەي پىسىقتادى. سونداي-اق ەكى ەل پرەزيدەنتتەرى بىرنەشە قۇجاتقا قول قويىپ, باق وكىلدەرىنە ارنالعان مالىمدەمە جاسادى.
