سۋرەت: 7-su.kz
قازىرگى كۇنى الەمدىك گەوساياسي احۋال – الاڭداتارلىق جاعدايدا. جان-جاعىمىزدا ءتۇرلى قاقتىعىس بولىپ جاتىر. ساياسي تۇراقسىزدىق, ترانسۇلتتىق قىلمىستار, تەرروريستىك قاۋىپ-قاتەر, ەسىرتكى اينالىمى سەكىلدى كەز كەلگەن مەملەكەتتىڭ شاڭىراعىن شايقالتۋى مۇمكىن كەلەڭسىزدىك كوپ. مۇنداي كەزدە جالعىز جورتقاننىڭ شاڭى شىقپايتىنى بەلگىلى. سوندىقتان كورشىلەس, تاعدىرلاس, تاريحي تامىرلاس ەلدەر تىزە قوسىپ, ارەكەت قىلسا, الىنبايتىن قامال جوق.
قازاق ەلى ءوز تاۋەلسىزدىگى مەن ەگەمەندىگىن ساقتاۋ جولىندا «الىستاعى اعايىننان جانىڭداعى كورشىڭ ارتىق» دەگەن اتا-بابا وسيەتىن بەرىك ۇستانىپ, ۇقشۇ, تمد, شىۇ سەكىلدى حالىقارالىق ۇيىمدارعا بەلسەندى قاتىسىپ كەلەدى. ۇقشۇ ۇجىمدىق قاۋىپسىزدىك كەڭەسىنىڭ توراعاسى رەتىندە پرەزيدەنت قاسىم-جومارت توقاەۆ تا اينالامىزدا بولىپ جاتقان احۋالدى ءجىتى قاداعالاپ, قاۋىپسىزدىك ماسەلەسىن ۇنەمى كوتەرىپ, كوزدەن تاسا قىلماي ءجۇر. بۇگىنگى ەلوردامىزدا وتكەن باسقوسۋ دا ەل ىرگەسىن بەكىتۋگە باعىتتالعان ۇلكەن قادام بولدى.
تاعى ءبىر ايتا كەتەر جايت, قازاق ەلى الەمدەگى ورتا دەرجاۆالاردىڭ قاتارىنا ەندى. قازىرگى تاڭدا حالىقارالىق جاعدايدا كوپ ماسەلەنى ورتا دەرجاۆالار شەشىپ جاتىر. ءبىز دە بۇگىندە الپاۋىت مەملەكەتتەر مەن شاعىن ەلدەر اراسىندا التىن كوپىر بولىپ, قاۋىپسىزدىك شارتتارىنىڭ قابىلدانۋىنا سەپتىگىمىزدى تيگىزىپ كەلەمىز.
بيىل ەلىمىزدىڭ ۇيىمعا توراعالىق ەتۋى كەزىندە ۇيىمنىڭ جارعىلىق ورگاندارىنىڭ وتىرىستارى, اسكەري وقۋ-جاتتىعۋ جيىندارى جانە الدىن الۋ وپەراتسيالارى جوسپارلى تۇردە ۇيىمداستىرىلىپ, قاۋىپسىزدىك كەڭەسى حاتشىلارى مەن پارلامەنت سپيكەرلەرىنىڭ دەڭگەيىندە كەزدەسۋلەر ءوتتى. ۇيىمنىڭ قوسىمشا جانە جۇمىس ورگاندارىنىڭ كەڭەستەرى وتكىزىلدى. بىرقاتار ماڭىزدى قۇجات قابىلداندى. ولار حالىقارالىق ىنتىماقتاستىق, قورعانىس سالاسىنداعى ىقپالداستىق, سونداي-اق ۇجىمدىق قاۋىپسىزدىكتىڭ وزەكتى سىن-قاتەرلەرى مەن قاۋىپتەرىنە قارسى ءىس-قيمىل ماسەلەلەرىن قامتىدى.
ءبىز استانادا وتكەن جيىن ارقىلى كەز كەلگەن قاۋىپ-قاتەرگە تىزە قوسىپ قارسى تۇرا الاتىنىمىزدى تاعى ءبىر دالەلدەدىك. جيىن قورىتىندىسى بويىنشا مەملەكەت باسشىلارى ۇجىمدىق قاۋىپسىزدىك كەڭەسىنىڭ دەكلاراتسياسىن قابىلداپ, بىرقاتار قۇجاتقا قول قويعانى بەلگىلى. اتاپ ايتقاندا, تاجىك-اۋعان شەكاراسىن نىعايتۋ جونىندەگى ۇقشۇ-نىڭ ماقساتتى مەملەكەتارالىق باعدارلاماسى, ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا بايلانىستى مالىمدەمە قابىلداندى. كەلەسى جىلى وسى ايتۋلى داتاعا وراي ۇيىمداستىرىلاتىن مەرەكەلىك ءىس-شارالاردىڭ جوسپارى بەكىتىلدى.
قابىلدانعان قۇجاتتار ۇيىم مەن ۇجىمدىق قاۋىپسىزدىك جۇيەسىن بارلىق مۇشە مەملەكەتتەردىڭ مۇددەسىنە ساي كەشەندى تۇردە دامىتۋعا باعىتتالعان. تاعى قايتالاپ ايتسام, سونىڭ ىشىندە ەلىمىزدىڭ تاۋەلسىزدىگىن نىعايتۋعا باعىتتالىپ وتىر. ەل باسىنا كۇن تۋسا, جانىڭنان تابىلار جاقتاستارىڭ بولعانى ءجون ەكەنىن ۋاقىتتىڭ ءوزى دالەلدەپ تۇرعانى – اقيقات.
عالياسقار سارىباەۆ,
سەنات دەپۋتاتى
