مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا 2025 جىلدى «جۇمىسشى ماماندىقتار جىلى» دەپ جاريالاپ, ءوندىرىس, اۋىل شارۋاشىلىعى جانە باسقا دا سالالاردا جۇمىسشى ماماندىقتاردى قولداۋ قاجەتتىگىن ايتتى. بۇل قادام جۇمىسشى ماماندىقتارىنىڭ بەدەلىن ارتتىرىپ, ەلدىڭ ەكونوميكالىق تۇراقتىلىعىن نىعايتۋدى كوزدەيدى. وسى ماقساتتا وتكىزىلگەن جيىنعا وڭىردەگى وندىرىستىك, كولىك-لوگيستيكالىق, مۇناي-گاز كومپانيالارىنىڭ 100-گە جۋىق قىزمەتكەرى, بيزنەسمەندەر, ۇلتتىق كومپانيالار مەن كاسىپوداقتار وكىلدەرى قاتىستى.
«جاستار – مەملەكەتتىڭ قوزعاۋشى كۇشى. دەمەك ولارعا ءاردايىم قولداۋ كورسەتۋ, باعىت-باعدار بەرۋ ماڭىزدى. مۇنايلى وڭىردە مادەني, سپورتتىق, ينتەللەكتۋالدىق جيىندارعا بەلسەندى قاتىسىپ جۇرگەن, جاسى 35-كە دەيىنگى وتانداستارىمىز از ەمەس. ءتىپتى كەشەگى كوكتەمگى سۋ تاسقىنى كەزىندە دە اسكەريلەرمەن بىرگە ەرىكتىلەر ساپىن تولتىرىپ, يگى ىستەن قالىس قالمادى. بۇعان العىسىمىز شەكسىز», دەدى ىشكى ساياسات باسقارماسى باسشىسىنىڭ ورىنباسارى الىشەر جانعاليەۆ.
سلەت اياسىندا ءوندىرىس سالاسىندا تابىسقا جەتكەن جاندارمەن جانە كومپانيا باسشىلارىمەن موتيۆاتسيالىق كەزدەسۋ ءوتتى. جاستار وزەكتى تاقىرىپتار توڭىرەگىندە پىكىر الماسىپ, جەكە باستامالارىن جۇزەگە اسىرۋعا قاجەتتى اقپارات الدى. سونىمەن قاتار قاتىسۋشىلارعا ارنالعان ستراتەگيالىق سەسسيا ۇيىمداستىرىلدى.
«ەلدە جۇمىسشى ماماندىقتارىنا تاپشىلىق وتە جوعارى. وعان جاستاردىڭ باسىم بولىگى قىزىعۋشىلىق تانىتپايدى. كۇنى كەشە عانا ەڭبەك جانە حالىقتى الەۋمەتتىك قورعاۋ مينيسترلىگى 2030 جىلعا قاراي 400 مىڭنان اسا جۇمىسشى مامان قاجەت بولادى دەگەن ستاتيستيكالىق ەسەپتى جاريالادى. سوندىقتان وندىرىستەگى كومپانيا وكىلدەرى مۇنداي كەزدەسۋلەرگە قاتىسىپ, جاس بۋىنمەن تانىسىپ, سويلەسۋ ارقىلى ولاردىڭ سۇرانىسىن بىلە الادى», دەدى قاتىسۋشى نايل حاكيموۆ.
