بۇل رەتتە قاسىم-جومارت توقاەۆ ەكىجاقتى قاتىناستار تاريحىندا قازاقستان دا تۇڭعىش رەت رەسەيدىڭ بەس ءىرى ساۋدا سەرىكتەسىنىڭ ساناتىنا قوسىلعانىن مالىمدەدى. بۇل ەكى ەلدىڭ ىنتىماقتاستىق الەۋەتى جوعارى ءارى بەرىك ەكەنىن اڭعارتادى.
– وسى وڭ ديناميكا ساقتالسا, ءبىر-ەكى جىلدا ءوزارا ساۋدا-ساتتىق 30 ميللياردتىق مەجەگە جەتەتىنىنە سەنىمدىمىن. قازاقستان ەكونوميكاسىنا رەسەيدەن كەلگەن تىكەلەي ينۆەستيتسيا كولەمى 24 ميلليارد دوللاردان استى. سوڭعى ەكى جىلدىڭ وزىندە 4,5 ميلليارد دوللاردان استام قارجى قۇيىلدى. قازاقستان دا رەسەي ەكونوميكاسىنا قوماقتى قارجى سالدى. بۇگىندە ونىڭ كولەمى 8,5 ميلليارد دوللارعا جەتتى. بۇدان بولەك, قازاقستاندا رەسەيلىكتەردىڭ قاتىسى بار 24 مىڭعا جۋىق كومپانيا جۇمىس ىستەيدى. بۇل – ەلىمىزدەگى شەتەل كاپيتالىنىڭ ۇلەسى بار جالپى كاسىپورىن سانىنىڭ جارتىسىنا جۋىعى. اتالعان كورسەتكىشتەر ستراتەگيالىق قاتىناستاردى ودان ءارى نىعايتۋعا قوس تاراپ تا اسا مۇددەلى جانە ءبىر-بىرىنە سەنىمى جوعارى ەكەنىن راستايدى, – دەدى قازاقستان پرەزيدەنتى.
قاسىم-جومارت توقاەۆ ونەركاسىپتىك كووپەراتسيادا ايتارلىقتاي تابىسقا قول جەتكىزىلگەنىنە نازار اۋداردى. جالپى سوماسى 18 ميلليارد دوللاردان اساتىن 93 بىرلەسكەن جوبا ىسكە قوسىلدى. قازىرگى كەزدە جالپى ينۆەستيتسيا كولەمى شامامەن 30 ميلليارد دوللاردى قۇرايتىن تاعى دا 49 جوبا جۇزەگە اسىرىلىپ جاتىر.
– قازاقستاننىڭ بىرقاتار ايماعىنا كوگىلدىر وتىن جەتكىزۋ, رەسەي ەنەرگيا رەسۋرستارىنىڭ وڭتۇستىك جانە شىعىس باعىتتاعى تاسىمال كولەمىن ۇلعايتۋ, ەلىمىزدەگى ءىرى ەنەرگەتيكالىق نىسانداردى سالۋ جانە جاڭعىرتۋ جۇمىستارىن اۋقىمدى باستامالار رەتىندە قاراستىرۋعا بولادى. الدىمىزدا نەگىزگى كۇرەجولداردى دامىتۋ ارقىلى ترانزيت الەۋەتىن بارىنشا پايدالانۋ مىندەتى تۇر. سونىمەن قاتار ءبىز جاڭا جوبالاردى جۇزەگە اسىرۋ پەرسپەكتيۆاسىن, اسىرەسە, موڭعولياعا دەيىن اۆتوكولىك جولىن سالۋ جانە ترانساۋعان كولىك ءدالىزىن بەلسەندى قولدانۋ ماسەلەلەرىن تالقىلادىق. «سولتۇستىك – وڭتۇستىك» باعىتىنداعى اتالعان بارلىق باستامالاردى ىسكە اسىرۋ دوستاس حالىقتاردىڭ تۇپكىلىكتى مۇددەسىنە تولىق ساي كەلەتىنىنە كامىل سەنەمىن, – دەدى مەملەكەت باسشىسى.
پرەزيدەنت ەكونوميكالىق كۇن تارتىبىندە قازاقستان مەن رەسەيدىڭ وڭىرارالىق ىنتىماقتاستىق فورۋمى ايرىقشا ورىنعا يە ەكەنىنە ەرەكشە توقتالدى. بۇل ورايدا مەملەكەت باسشىسى الداعى ۋاقىتتا اقتاۋدا رەسەي فەدەراتسياسىنىڭ باس كونسۋلدىعىن اشۋدىڭ ماڭىزى زور ەكەنىن اتاپ ءوتتى.
