مەملەكەت باسشىسى رەسەي پرەزيدەنتى ۆلاديمير ءپۋتيننىڭ مەملەكەتتىك ساپارىن ەكى ەل قارىم-قاتىناسىنىڭ دامۋىنداعى ماڭىزدى كەزەڭگە جول اشاتىن تاريحي وقيعا دەپ اتادى.
– رەسەي – قازاقستاننىڭ ستراتەگيالىق سەرىكتەسى ءارى سەنىمدى وداقتاسى. ءبىزدى مىزعىماس دوستىق بايلانىستار, عاسىرلارعا ۇلاسقان تاتۋ كورشىلىك قاتىناس جانە ورتاق تاريح بىرىكتىرەدى. مەملەكەتتەرىمىز وسىناۋ ماڭگىلىك قۇندىلىقتارعا ارقا سۇيەي وتىرىپ, كەلەشەكتى كوزدەگەن مازمۇندى ىقپالداستىقتى جولعا قويدى. بۇگىندە قازاقستان مەن رەسەيدىڭ ىنتىماقتاستىعى بارلىق سالانى قامتىپ, بۇرىن-سوڭدى بولماعان جاڭا دەڭگەيگە كوتەرىلدى. ساياسي ديالوگ نىعايىپ, ساۋدا-ەكونوميكالىق جانە مادەني-گۋمانيتارلىق بايلانىستار جاندانا ءتۇستى. بۇگىنگى شاعىن جانە كەڭەيتىلگەن قۇرامدا وتكەن كەزدەسۋلەر مەن كەلىسسوزدەر اشىق, ىسكەرلىك سيپاتىمەن ەرەكشەلەندى ءارى شىن مانىندە ناتيجەلى بولدى, – دەدى مەملەكەت باسشىسى.
پرەزيدەنت قاسىم-جومارت توقاەۆ ۆلاديمير پۋتينمەن ەگجەي-تەگجەيلى كەلىسسوزدەر بارىسىندا ەكىجاقتى كۇن تارتىبىندەگى وزەكتى ماسەلەلەر كەڭىنەن تالقىلانىپ, قازاقستان مەن رەسەيدىڭ ستراتەگيالىق سەرىكتەستىگىنىڭ پەرسپەكتيۆتى باعىتتارى بەلگىلەنگەنىن جەتكىزدى.
– كۇردەلى گەوساياسي احۋالعا قاراماستان, ەكىجاقتى قارىم-قاتىناسىمىز قارقىندى دامىپ كەلەدى دەگەن ورتاق ۇيعارىم جاسادىق. كەلىسسوزدەر بارىسىندا ەكونوميكا ماسەلەسىنە باسا ءمان بەرىلدى. ستراتەگيالىق سالالارداعى ىنتىماقتاستىقتى تەرەڭدەتۋ جانە ءوزارا تاۋار اينالىمىن ودان ءارى ارتتىرۋ نەگىزگى مىندەت رەتىندە ايقىندالدى. وسى ماقساتتا بىرقاتار ۇكىمەتارالىق قۇجات قابىلداندى. ولاردىڭ قاتارىندا 2021-2025 جىلدارعا ارنالعان كەشەندى ەكونوميكالىق ىنتىماقتاستىق باعدارلاماسى, 2024-2026 جىلدارعا ارنالعان بىرلەسكەن ءىس-قيمىل جوسپارى بار. سونىمەن قاتار وڭىرارالىق ىنتىماقتاستىق فورۋمى اياسىندا ەكى ەلدىڭ ايماقتارى اراسىنداعى جانە شەكارا ماڭىنداعى ىنتىماقتاستىعى جونىندە جاڭارتىلعان ۇكىمەتارالىق باعدارلاماعا قول قويىلدى, – دەدى پرەزيدەنت.
