فوتو: وقۋ-اعارتۋ مينيسترلىگى
ءمينيستردىڭ مامانداردى دايارلايتىن بىرەگەي وقۋ ورتالىعى – لۋ بان شەبەرحاناسىنا بارۋى جۇمىس ساپارى بارىسىنداعى ماڭىزدى ءىس-شارالاردىڭ ءبىرى بولدى. كەشەن ستۋدەنتتەردىڭ جاڭا وندىرىستىك جانە تسيفرلىق تەحنولوگيالاردى, ينجەنەرلىك جوبالاۋدى مەڭگەرۋىنە مۇمكىندىك بەرەتىن زاماناۋي قۇرال-جابدىقتارمەن جانە وقۋ ماتەريالدارىمەن جاراقتاندىرىلعان. بۇل تاجىريبەنى قازاقستاندا ۇلتتىق قۇزىرەتتىلىك ورتالىعىن اشۋ كەزىندە قولدانۋ جوسپارلانعان, ول تەحنيكالىق جانە كاسىپتىك جۇيە ستۋدەنتتەرى ءۇشىن جاڭا مۇمكىندىكتەرگە جول اشادى.
تيانتسزيندە مينيستر قىتايدىڭ جەتەكشى كوللەدجدەرىنىڭ وكىلدەرىمەن بىرنەشە كەلىسسوز وتكىزدى. تاراپتار ەكىجاقتى ىنتىماقتاستىقتى دامىتۋ جانە جۇمىسشى مامانداردى دايارلاۋدا تاجىريبە الماسۋ ماسەلەلەرىن تالقىلادى.
عاني بەيسەمباەۆ سونداي-اق 48 مەملەكەتتىڭ سالالىق مينيسترلەرىنىڭ قاتىسۋىمەن وتكەن دۇنيەجۇزىلىك كاسىپتىك جانە تەحنيكالىق ءبىلىم بەرۋدى دامىتۋ جونىندەگى كونفەرەنتسياعا قاتىستى. وتىرىستىڭ پلەنارلىق سەسسياسىندا ءسوز سويلەگەن مينيستر قازاقستاندا كاسىپتىك-تەحنيكالىق ءبىلىم بەرۋ جۇيەسىن دامىتۋدىڭ ماڭىزدىلىعىنا توقتالىپ ءوتتى.
«قازاقستان پرەزيدەنتى جاريالاعان جۇمىسشى ماماندىقتار جىلىنىڭ اياسىندا تەحنيكالىق جانە كاسىپتىك ءبىلىم بەرۋ جۇيەسىن ترانسفورماتسيالاۋ جۇرگىزىلىپ جاتىر. اسىرەسە, كۇردەلى وندىرىستىك ماسەلەلەردى شەشۋ ءۇشىن قاجەت ەموتسيونالدىق ينتەللەكت جانە ينجەنەرلىك ويلاۋ سياقتى جۇمساق داعدىلاردى دامىتۋعا ەرەكشە نازار اۋدارىلىپ وتىر. حالىقارالىق تاجىريبەنى ەسكەرە وتىرىپ, زاڭنامالىق نورمالاردى جەتىلدىرۋگە جانە كوللەدجدەردى باسقارۋ جۇيەسىن كۇشەيتۋگە باسىمدىق بەرىلەدى. قازاقستان ءوز ستۋدەنتتەرىنىڭ باسەكەگە قابىلەتتىلىگىن ارتتىرۋ ءۇشىن مامان دايارلاۋ ۇردىسىنە الەمدىك كاسىبي قاۋىمداستىق پەن الدىڭعى قاتارلى ءبىلىم بەرۋ تەحنولوگيالارىن ەنگىزۋگە ۇمتىلىپ جاتىر», دەدى عاني بەيسەمباەۆ.
سونداي-اق مينيستر قحر-نىڭ ءبىلىم ءمينيسترى حۋاي تسزينپەنمەن ەكىجاقتى كەزدەسۋ وتكىزدى. تاراپتار ءبىلىم سالاسىندا قازاقستان-قىتاي ىنتىماقتاستىعىن ارتتىرۋ, تەحنيكالىق جانە كاسىپتىك ءبىلىم بەرۋدە ەكى ەلدىڭ تاجىريبە الماسۋى ماسەلەسىن تالقىلادى.
