فوتو: استانا قالاسىنىڭ اكىمدىگى
پوليتسەيلەر اۋداندىق اكىمدىكتەردىڭ, ءبىلىم باسقارماسىنىڭ قىزمەتكەرلەرىمەن جانە استانا قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ مۇشەلەرىمەن بىرلەسىپ, كامەلەتكە تولماعانداردىڭ قوعامدىق ورىنداردا زاڭدى وكىلدەرىنىڭ ەرىپ ءجۇرۋىنسىز كەشكى نەمەسە تۇنگى ۋاقىتتا بولۋ جاعدايلارىن انىقتاۋ ماقساتىندا كوشەلەر مەن ويىن-ساۋىق ورىندارىن تەكسەرەدى.
«سارىارقا استانالىق اۋدانىنداعى رەيد بارىسىندا ءموبيلدى توپ اكىمشىلىك قۇقىق بۇزۋشىلىق تۋرالى 17 حاتتاما تولتىرىپ, 6 كامەلەتكە تولماعان ءجاسوسپىرىم ارناۋلى الەۋمەتتىك قىزمەتتەرگە مۇقتاج بالالاردى قولداۋ ورتالىعىنا ورنالاستىرىلدى», دەلىنگەن حابارلامادا.
سونىمەن قاتار ەسىل اۋدانىندا مونيتورينگتىك توپتىڭ قىزمەتكەرلەرى قر اقبتك 442-بابى بويىنشا ءۇش ايلىق ەسەپتىك كورسەتكىش مولشەرىندە زاڭدى وكىلدەرىنە ايىپپۇل تۇرىندە تارتىلعان 62 كامەلەتكە تولماعان ءجاسوسپىرىمدى انىقتاعان.
ەستەرىڭىزگە سالا كەتەيىك, اكىمشىلىك جازا قولدانىلعاننان كەيىن ءبىر جىل ىشىندە قايتالاما قۇقىق بۇزۋشىلىق جاساعانى ءۇشىن (اقبتك 442-بابىنىڭ 3-بولىگى) 2 001 ادامعا 30 274 003 تەڭگە سوماسىندا ايىپپۇل سالىنادى. ايىپپۇل جەتى ايلىق ەسەپتىك كورسەتكىشتى قۇرايدى.
ال, بايقوڭىر اۋدانىندا جەدەل-پروفيلاكتيكالىق ءىس-شارالار بارىسىندا 57 كامەلەتكە تولماعان ءجاسوسپىرىم انىقتالىپ, جەرگىلىكتى پوليتسيا باسقارمالارىنا جەتكىزىلگەن بۇل بالالاردىڭ زاڭدى وكىلدەرى اكىمشىلىك جاۋاپكەرشىلىككە تاپ بولدى. سونداي-اق ويىن-ساۋىق مەكەمەلەرىنىڭ يەلەرى قر اكىمشىلىك قۇقىق بۇزۋشىلىق تۋرالى كودەكسىنىڭ 132-بابىنا سايكەس كامەلەتكە تولماعانداردى ءوز مەكەمەلەرىنە جىبەرگەنى ءۇشىن اكىمشىلىك جاۋاپكەرشىلىككە تارتىلعان.
«نۇرا اۋدانىنىڭ اۋماعى بويىنشا رەيدتىك ءىس-شارالار كەزىندە مىناداي قۇقىق بۇزۋشىلىقتار انىقتالدى: 48 ءجاسوسپىرىم ساعات 23.00-دەن كەيىن اتا-اناسىنىڭ نەمەسە زاڭدى وكىلدەرىنىڭ سۇيەمەلدەۋىنسىز جۇرگەن, بۇل 442-باپ بويىنشا اكىمشىلىك ايىپپۇل سالۋعا اكەپ سوقتىردى; 437-باپ بويىنشا تۇنگى ۋاقىتتا تىنىشتىقتى بۇزعانى ءۇشىن 437-باپ بويىنشا اكىمشىلىك حاتتاما جاسالدى; 2 اتا-انا 127-باپ جانە 10 اەك مولشەرىندە ايىپپۇل سالىندى. رەيد بارىسىندا الماتى اۋدانىندا ءموبيلدى توپ كامەلەتكە تولماعان جاسوسپىرىمدەردىڭ ەرەسەكتەردىڭ ەرىپ ءجۇرۋىنسىز تۇنگى ۋاقىتتا بولعان 6 جاعدايدى انىقتادى. ونىڭ قورىتىندىسى بويىنشا اتا-انالارعا حاتتاما تولتىرىلىپ, اكىمشىلىك ايىپپۇل سالىندى», دەپ حابارلادى قالا اكىمدىگىنىڭ ءباسپاسوز قىزمەتى.
ەستەرىڭىزگە سالا كەتەيىك, قر اكىمشىلىك قۇقىق بۇزۋشىلىق تۋرالى كودەكستىڭ 442-بابى بويىنشا 22.00-دەن 6.00-گە دەيىن كامەلەتكە تولماعانداردىڭ ويىن-ساۋىق ورىندارىندا زاڭدى وكىلدەرىنىڭ ەرىپ ءجۇرۋىنسىز جۇرۋگە, سونداي-اق ساعات 23.00-دەن 6.00-گە دەيىن كامەلەتكە تولماعاندارعا زاڭدى وكىلدەرىنىڭ ەرىپ ءجۇرۋىنسىز تۇرعىن ۇيدەن تىس جەردە بولۋىنا تىيىم سالىنادى.
ايتا كەتەيىك, «زاڭ مەن ءتارتىپ» قوعامدىق اكتسياسى اياسىندا استانا قالاسى پروكۋراتۋراسىنىڭ, قۇقىق قورعاۋ جانە مەملەكەتتىك ورگانداردىڭ ۇيلەستىرۋىمەن, استانا قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرىمەن جانە اۋداندىق اكىمدىكتەرمەن بىرلەسىپ, تۇنگى ۋاقىتتا قالا كوشەلەرىندە جانە ويىن-ساۋىق ورىندارىندا كامەلەتكە تولماعانداردى انىقتاۋ بويىنشا رەيدتەر جالعاسىپ جاتىر.
