فورۋمعا ءوز سالاسىندا تابىسقا جەتكەن بىلىكتى جاستار قاتىستى. جيىننىڭ العاشقى ءبولىمى جاس مامانداردى جىگەرلەندىرۋ, قاناتتاندىرۋ باعىتىنا ارنالدى. وندا ولار ءوز تاجىريبەلەرىمەن ءبولىسىپ, جەتىستىكتەرى تۋرالى اڭگىمەلەدى. ال ەكىنشى ءبولىم – مامانداردىڭ كاسىبي قۇزىرەتتىلىگىن ارتتىرۋعا باعىتتالعان شەبەرلىك ساباعىنا جالعاستى.
جيىندا جاس پەداگوگتەر ءبىلىم بەرۋ ۇدەرىسىنە يننوۆاتسيالىق ءادىس-تاسىلدەردى ەنگىزۋگە باعىتتالعان ترەنينگتەر مەن تاجىريبەلىك جۇمىستارعا ارالاستى. ساباق بارىسىندا وقىتۋ ادىستەمەسىن جەتىلدىرۋ, زاماناۋي تەحنولوگيالاردى ءتيىمدى قولدانۋ جانە وقۋشىلاردىڭ تانىمدىق قىزىعۋشىلىعىن ارتتىرۋ جولدارى تالقىلاندى. قاتىسۋشىلار ماتەماتيكالىق ستيلدەگى كرەاتيۆتى تاسىلدەردى, اعىلشىن ءتىلى ساباقتارىندا جاساندى ينتەللەكتىنى قولدانۋدىڭ تيىمدىلىگىن, ورتا سىنىپ وقۋشىلارىنا كوركەم شىعارمانى وقىتۋدا تسيفرلىق تەحنولوگيالاردى پايدالانۋ جولدارىن ساراپقا سالدى.
سونىمەن بىرگە ينكليۋزيۆتى ءبىلىم بەرۋ جاعدايىندا وقۋ ۇدەرىسىن بەيىمدەۋ, وقۋشىلاردى وليمپياداعا دايىنداۋ ستراتەگيالارى جانە STEAM نەگىزىندەگى ينجەنەريا مەن ديزاينداعى يننوۆاتسيالىق شەشىمدەردى ازىرلەۋ تاسىلدەرى بويىنشا تاجىريبە الماسىپ, كاسىبي بىلىكتىلىكتەرىن دامىتتى.
بيىل ءۇشىنشى رەت ءوتىپ وتىرعان ءىس-شاراعا وبلىستىق ءبىلىم مەكەمەلەرىنەن 200-گە جۋىق جاس پەداگوگ قاتىسىپ, بىلىگى مەن ءبىلىمىن تولىقتىردى. قاتىسۋشىلار فورۋمنان ءوز سالالارىنداعى جاڭا ءادىس-تاسىلدەردى مەڭگەرىپ, كاسىبي تاجىريبەلەرىن جەتىلدىرۋگە ارنالعان قۇندى اقپارات پەن يدەيالار الدى. فورۋم جاس مامانداردىڭ ءوزارا تاجىريبە الماسۋ الاڭىنا اينالىپ, پەداگوگيكالىق شەبەرلىكتەرىن دامىتۋعا سەرپىن بەردى.
اباي وبلىسى
