فوتو: www.gov.kz
«مەملەكەتتىك ساپار الدىندا قازاقستاننىڭ رەسپۋبليكالىق باسىلىمدارىنىڭ ءبىرى - «كازاحستانسكايا پراۆدا» گازەتى ارقىلى ەكى ەل اراسىنداعى تىعىز قارىم-قاتىناس پەن ىنتىماقتاستىق دەڭگەيى تۋرالى ءوز ويىمدى ءبولىسۋدىڭ ءساتى تۋىپ وتىر. مەملەكەتارالىق بايلانىستىڭ جوعارى دەڭگەيىن قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆپەن بىرلەسكەن جۇمىس جىلدارىندا قالىپتاسقان تىعىز جانە مەيىرىمدى جەكە قاتىناستار كۋالاندىرادى. ءبىز ۇنەمى قوڭىراۋ شالىپ, ءارتۇرلى فورماتتاردا كەزدەسەمىز. ەكىجاقتى وزەكتى ماسەلەلەردى تالقىلاپ, كۇن تارتىبىندە تۇرعان وڭىرلىك جانە جاھاندىق پروبلەمالار تۋرالى پىكىر الماسامىز, كەلەشەككە جاڭا جوسپارلاردى دا بەلگىلەيمىز. ەڭ باستىسى - قازاقستان پرەزيدەنتىمەن ارقاشان ناقتى ناتيجەگە باعدار قويامىز. رەسەي-قازاقستان ىنتىماقتاستىعىنىڭ ودان ءارى سەنىمدى دامۋى, ەلدەرىمىزدىڭ وركەندەۋى, ازاماتتاردىڭ ءومىر ءسۇرۋ ساپاسىن ارتتىرۋ ءۇشىن بارىنشا قولايلى جاعدايلاردى قامتاماسىز ەتۋ ءۇشىن قولدان كەلگەننىڭ ءبارىن جاساۋعا تىرىسامىز», دەپ جازدى رەسەي فەدەراتسياسىنىڭ پرەزيدەنتى.
ۆلاديمير پۋتين ناقتىلاعانداي, بۇگىندە رەسەي - قازاقستاننىڭ ءىرى ەكونوميكالىق سەرىكتەستەرىنىڭ ءبىرى. ال ىنتىماعى جاراسقان قازاقستان مەن رەسەي - ەۋرازيالىق ەكونوميكالىق ينتەگراتسيانىڭ بەلسەندى جاقتاۋشىلارى.
ء«بىزدىڭ مەملەكەتتەرىمىز ەۋرازيالىق ەكونوميكالىق وداق قۇرۋدىڭ باستاۋىندا تۇردى. ونىڭ شەڭبەرىندە ءبىز تاۋارلاردىڭ, كورسەتىلەتىن قىزمەتتەردىڭ ساپاسىن ارتتىرىپ, كاپيتالدىڭ ورتاق نارىعىن دامىتىپ وتىرمىز, رەتتەۋشىلىك جانە ساۋدا كەدەرگىلەرىن جويۋ بويىنشا اۋقىمدى جۇمىس اتقارىپ كەلەمىز. ورتاق كولىكتىك-لوگيستيكالىق ينفراقۇرىلىمدى دامىتۋ ءىسىن دە قولعا الدىق. مۇنىڭ ءبارى ەكونوميكانىڭ ءتۇرلى سالالارى بويىنشا ءتيىمدى ىنتىماقتاستىق ورناتۋعا مۇمكىندىك بەرەدى جانە ءبىزدىڭ ەلدەرىمىزگە ەلەۋلى پايدا اكەلەدى», دەلىنگەن رەسەي پرەزيدەنتىنىڭ ماقالاسىندا.
