بيىل قازاقستاننان رەسەيدە ءبىلىم الۋعا بەرىلەتىن كۆوتا سانى 800 ورىنعا دەيىن كوبەيگەن. بۇل – رەسەيدە تەگىن ءبىلىم العىسى كەلەتىن جاستارعا ۇلكەن مۇمكىندىك. ايتا كەتەيىك, ءوتىنىش بەرۋ مەرزىمى 2024 جىلدىڭ 15 قاڭتارىنا دەيىن جالعاسادى. رەسەيدىڭ «روسسوترۋدنيچەستۆو» ۇيىمىنىڭ قازاقستانداعى وكىلدىگىنىڭ باسشىسى ولگا فيلونوۆا بۇل كۆوتالاردىڭ ماڭىزدىلىعىن اتاپ ءوتتى.
«كۆوتالىق باعدارلاما قازاقستاننان شىققان تالانتتى جاستاردىڭ رەسەيدە ساپالى ءبىلىم الۋىنا جول اشادى. جىل سايىن كورمەگە قاتىسۋشىلار سانى ارتىپ كەلەدى. بۇل تالاپكەرلەردىڭ رەسەيدەگى جوعارى وقۋ ورىندارىنا قىزىعۋشىلىعى ارتا تۇسكەنىن كورسەتەدى. رەسەي ۇكىمەتى كۆوتا سانىن كوبەيتۋ ارقىلى جاستاردىڭ ءبىلىم الۋىنا مول مۇمكىندىك بەرىپ وتىر», دەدى ول. ۋنيۆەرسيتەتتەردىڭ كوبى ستۋدەنتتەردى جاتاقحانامەن قامتاماسىز ەتەتىنىن ءارى قوسىمشا الەۋمەتتىك قولداۋ كورسەتىلەتىنىن جەتكىزدى. ولگا فيلونوۆانىڭ ايتۋىنشا, رەسەيدەگى ۋنيۆەرسيتەتتەرگە تۇسۋگە كۆوتادان بولەك تە مۇمكىندىك بار. «تالاپكەرلەر ۋنيۆەرسيتەتتەرگە ءوز بەتىمەن ءوتىنىم بەرە الادى. كوپتەگەن ۋنيۆەرسيتەتتە اقىلى وقۋعا بولادى. كەيبىرەۋلەرىندە وليمپيادا ناتيجەلەرى بويىنشا, ال كەيبىرەۋلەرىندە ىشكى ەمتيحان ناتيجەلەرى بويىنشا قابىلدايدى», دەدى ول.
كورمەگە قاتىسىپ جاتقان ۆ.ي.لەنين اتىنداعى يۆانوۆ مەملەكەتتىك ەنەرگەتيكا ۋنيۆەرسيتەتىنىڭ وكىلى ەۆا سەرگەەۆانىڭ ايتۋىنشا, كەلگەن جاستاردىڭ ماقساتى قازىر دە ايقىن. ولاردىڭ ارماندارىنا جەتۋ جولىنداعى تالپىنىسى ەرەكشە. «ەڭ الدىمەن, وسىنداي اۋقىمدى ءارى ماڭىزعا يە ءىس-شارانى ۇيىمداستىرعان رەسەي ۇلتتىق زەرتتەۋ ۋنيۆەرسيتەتىنە العىسىمىزدى بىلدىرەمىز. بارلىعى جوعارى دەڭگەيدە ءوتىپ جاتىر. بۇل كورمەگە ۇلكەن قۋانىشپەن كەلدىك. مۇندا بىلىمگە قۇشتار, بولاشاققا سەنىممەن قارايتىن تالاپكەرلەر كوپتەپ كەلىپ جاتىر. جاستاردىڭ وسىنداي ماقساتشىل بولۋى شىنىمەن دە قۋانتادى. ءبىز ولارعا كومەكتەسۋگە ءازىرمىز. ءبىزدىڭ ۋنيۆەرسيتەت تەحنيكالىق باعىتتارعا ماماندانعان. ءدال وسى باعىتتا سۇرانىس تا جوعارى», دەدى ەۆا.
استاناعا رەسەيدىڭ ءار وڭىرىنەن كەلگەن ۋنيۆەرسيتەت وكىلدەرى تالاپكەرلەرگە ءوز وقۋ ورىندارىنىڭ ەرەكشەلىكتەرى تۋرالى اقپارات بەرىپ, ولاردىڭ سۇراقتارىنا جاۋاپ بەردى. كورمەدە تەحنيكالىق, مەديتسينالىق, IT, ەكونوميكا, شىعارماشىلىق باعىتتاعى ماماندىقتارعا دەگەن قىزىعۋشىلىق جوعارى بولدى. مىسالى, كراسنويار مەملەكەتتىك اگرارلىق ۋنيۆەرسيتەتى وكىلى يۋليا ولەنتسوۆانىڭ ايتۋىنشا, تالاپكەرلەر اراسىندا ۆەتەرينار, بيوتەحنولوگيا, لاندشافتتىق ساۋلەت, اگروينجەنەريا, IT ماماندىقتارى كوپ سۇرانىستا بولعان. ال ماسكەۋدەگى ا.ن.كوسىگين اتىنداعى رەسەي مەملەكەتتىك ۋنيۆەرسيتەتىنىڭ وكىلى الەۆتينا زوزولەۆا تالاپكەرلەر شىعارماشىلىق ماماندىقتارعا دا قىزىعۋشىلىق تانىتقانىن اتاپ ءوتتى. بۇل ۋنيۆەرسيتەتتە IT تەحنولوگيالارى, كيىم كونسترۋكتسياسى, ديزاين, مۋزىكالىق شىعارماشىلىق, ۆوكال ونەرى بويىنشا گرانت نەگىزىندە ءبىلىم الۋعا بولادى.
رەسەي مەملەكەتتىك زياتكەرلىك مەنشىك اكادەمياسى وكىلى, پروفەسسور ناتاليا پانامارەۆانىڭ ايتۋىنشا, بۇل كورمە ەكى ەل اراسىنداعى ىنتىماقتاستىقتى ارتتىرىپ, ءبىلىم الۋشىلاردىڭ تاجىريبە الماسۋىنا ۇلكەن مۇمكىندىك بەرەدى.
ء«بىزدىڭ تۇلەكتەر – رەسەيدەگى ەڭ ۇزدىك زاڭگەرلەر قاتارىندا. بۇل كورسەتكىش بويىنشا ءبىز ممۋ-دى دا باسىپ وزدىق. ءبىزدىڭ تۇلەكتەردى رەسەيلىك كورپوراتسيالار مەن كوممەرتسيالىق قۇرىلىمدار قۋانا قابىلدايدى. زياتكەرلىك مەنشىك اكادەمياسى تالاپكەرلەردى كۆوتا نەگىزىندە ءارى وليمپيادا ناتيجەلەرى بويىنشا قابىلداۋعا دايىن. سونداي-اق ستۋدەنتتەردى جاقتاقحانامەن قامتاماسىز ەتەمىز. ايتا كەتەيىن, ءبىز قازاقستانداعى جوعارى وقۋ ورىندارىمەن تىعىز بايلانىستامىز. ۇنەمى تاجىريبە الماسىپ وتىرامىز», دەدى ول.
كورمەگە كەلگەن تالاپكەرلەردىڭ كوبى ءوز ماقساتى مەن باعىتىن ايقىنداپ ۇلگەرگەن. ماسەلەن, 11-سىنىپ وقۋشىسى نۇرلان يساەۆ ءوز باعىتىنا ساي ۋنيۆەرسيتەتتى تاڭداپ ۇلگەرگەن. «مەن ماسكەۋدىڭ يادرولىق فيزيكا جانە ينجەنەريا ينستيتۋتىنا قىزىعىپ وتىرمىن. وندا مەن وقىعىم كەلەتىن ماماندىق بار ەكەن. وسى كورمە ماعان ءوز شەشىمىمدى ناقتىلاۋعا كومەكتەسىپ جاتىر», دەدى ول.
«روسسوترۋدنيچەستۆو» وكىلى ولگا فيلونوۆانىڭ ايتۋىنشا, رەسەيدەگى جوعارى وقۋ ورىندارىندا شەتەلدىك ستۋدەنتتەرگە وتە جاقسى قولداۋ كورسەتىلەدى. «رەسەيدە قازاقستاندىق ستۋدەنتتەر ءۇشىن كوپتەگەن بيۋدجەتتىك ورىن قاراستىرىلعان. كەيبىر ۋنيۆەرسيتەتتەردە وليمپيادا جەڭىمپازدارىنا باسىمدىق بەرىلەدى. ءبىز ستۋدەنتتەرگە تەك ءبىلىم بەرىپ قانا قويماي, ولاردىڭ حالىقارالىق دەڭگەيدە تاجىريبە جيناۋىنا جاعداي جاسايمىز», دەدى و.فيلونوۆا.
