سۋرەت: gov.kz
ەڭ ءىرى ەكونوميكالىق سەرىكتەس
ەكى ەل بارلىق سالادا, سونىڭ قاتارىندا ەكونوميكاداعى قارىم-قاتىناستى جان-جاقتى دامىتىپ كەلە جاتىر. بىلتىر ەكى ەل اراسىنداعى تاۋار اينالىمى رەكوردتىق كورسەتكىشكە جەتىپ, 27 ميلليارد دوللاردى قۇراعان ەدى. سولتۇستىك كورشىدەن تارتىلعان تىكەلەي ينۆەستيتسيا كولەمى 20 ميلليارد دوللاردان اسىپ جىعىلدى.
«بۇگىندە رەسەيدىڭ 76 سۋبەكتىسى ءبىزدىڭ ەلدىڭ اكىمدىكتەرىمەن ارىپتەستىك قارىم-قاتىناستى دامىتىپ جاتىر. دوستىق قاتىناستاعى ەكپىن ساۋدادان ونەركاسىپتىك كووپەراتسياعا جانە يمپورتتى الماستىراتىن بىرلەسكەن جوبالارعا اۋىسىپ كەلەدى. ونى ءبىزدىڭ ەلدە بىرلەسىپ جۇزەگە اسىرىپ جاتقان بىرقاتار ءىرى جوبالاردان كورۋگە بولادى», دەيدى ەكونوميست ساراپشى الپامىس سەگىزباي ۇلى.
وتكەن جىلدىڭ قاراشا ايىندا رەسەي پرەزيدەنتى ۆلاديمير پۋتين قازاقستانعا كەلىپ, مەملەكەت باسشىسى قاسىم-جومارت توقاەۆپەن كەزدەستى. قوستانايدا وتكەن وڭىرارالىق ىنتىماقتاستىق فورۋمىنا دا بىرگە قاتىستى. بۇرناعى جىلى ەلدەر اراسىنداعى تاۋار اينالىمى 26,1 ميلليارد دوللاردى قۇراعان ەدى.
«ال بىلتىرعى العاشقى سەگىز ايدا بۇل كورسەتكىش 17 ميلليارد دوللارعا جەتتى. بۇل بۇرناعى جىلدىڭ سايكەس كەزەڭىمەن سالىستىرعاندا 1,1%-عا ارتىق بولدى. بۇل رەتتە ءبىزدىڭ ەلدىڭ رەسەيگە ەكسپورتى 5,2 ميلليارد دوللاردان 6,3 ميلليارد دوللارعا دەيىن ۇلعايدى», دەدى ەكونوميكا عىلىمدارىنىڭ كانديداتى ساپارباي جوباەۆ.
«سولتۇستىك – وڭتۇستىك» ءدالىزىن دامىتۋ اسا ماڭىزدى
سوڭعى جىلدارى كولىك-لوگيستيكا سەكتورى الەمدىك ساۋداداعى وزگەرىستەر جاعدايىندا ەرەكشە مانگە يە بولدى. ال ءبىزدىڭ ەلدە ەكونوميكانىڭ دامۋىنداعى نەگىزگى باسىمدىققا اينالىپ ۇلگەردى. سولتۇستىك كورشىمەن جانە ەاەو سەرىكتەستەرىمەن ىنتىماقتاستىقتى ستراتەگيالىق نىعايتۋ ەلىمىزدىڭ سولتۇستىك-وڭتۇستىك جانە شىعىس-باتىس باعىتتارىندا ماڭىزدى كولىك حابىنا اينالۋ امبيتسيالارىن قولدايتىنى انىق.
«وسى كۇندە ءبىزدىڭ ەل ارقىلى جۇك تاسىمالداۋ كولەمىنىڭ 50 پايىزدان استامى رەسەيدەن كەلەدى. بىلتىرعى جىلى ەكى ەل سولتۇستىك-وڭتۇستىك ءدالىزى بويىنشا كولىك جانە ترانزيت سالاسىنداعى ىنتىماقتاستىق تۋرالى مەموراندۋمعا قول قويىپ, ەكى تاراپقا دا ءتيىمدى كەلىسىمگە كەلدى», دەيدى ا.سەگىزباي ۇلى.
بۇگىندە ەلىمىز ەاەو-نىڭ سىرتقى شەكاراسىنداعى وتكىزۋ پۋنكتتەرىن جاڭعىرتىپ جاتىر. سونىمەن قاتار 2026 جىلعا قاراي كورشىلەس شەكارالاردا جانە كاسپي تەڭىزىنىڭ جاعالاۋىندا ساۋدا-لوگيستيكالىق ورتالىقتار سالۋ جوسپارلادى.
ەكسپورت كولەمى ارتتى
وتكەن جىلى قازاقستان ەۋرازيالىق وداقتاعى پوزيتسياسىن نىعايتقانىن ايتقان س.جوباەۆ, ەكونوميكالىق ىقپالداستىققا قاتىسۋشى ەلدەردىڭ ىشكى جالپى ءونىمىنىڭ وسۋىنە ايتارلىقتاي ۇلەس قوسىلعانىن ەۋرازيالىق ەكونوميكالىق كوميسسيا راستاعانىن ايتتى. ەل ۇكىمەتىنىڭ مالىمەتىنشە, 2015 جىلدان بەرى قازاقستاننىڭ ەاەو ەلدەرىنە ەكسپورتى 90%-عا وسكەن. ءبىزدىڭ ەل مەن رەسەي پوستكەڭەستىك كەڭىستىكتەگى ىقپالداستىق ۇدەرىستەردىڭ ناقتى لوكوموتيۆتەرى بولىپ وتىر.
پرەمەر-ءمينيستردىڭ ورىنباسارى سەرىك جۇمانعاريننىڭ ايتۋىنشا, ەاەو مۇشەلىگى كوپتەگەن ناقتى ەكونوميكالىق ماسەلەنى شەشۋگە مۇمكىندىك جاسايدى. «Eۆرازيا.ەكسپەرت» تىلشىسىنە بەرگەن سۇحباتىندا يننوۆاتسيالىق ەكونوميكا ينستيتۋتىنىڭ ساراپشىسى, قازۇۋ پروفەسسورى ماعبات سپانوۆ ەلىمىزدىڭ 2023 جىلعى ەۋرازيالىق ەكونوميكالىق وداق اياسىنداعى بىرقاتار جەتىستىكتەرىن ساراپتاپ بەردى.
ونەركاسىپ كووپەراتسياسىنىڭ ءورىسى كەڭ
كورشى ەلمەن ونەركاسىپتىك كووپەراتسيا ەلىمىزدە جاڭا جۇمىس ورىندارىن اشۋعا, جاڭا ءوندىرىس ورىندارىن سالىپ, ەسكىلەرىن جاڭعىرتۋعا مۇمكىندىك بەرەدى. «قازاقستان ەاەو-داعى ەكونوميكالىق ينتەگراتسيانى, اسىرەسە, ونەركاسىپتىك كووپەراتسيا مەن لوگيستيكانى دامىتۋعا مۇددەلى. مەملەكەت باسشىسى قاسىم-جومارت توقاەۆ ەكى ەلدىڭ وڭدەۋ ونەركاسىبىندەگى تابىستى ىنتىماقتاستىعى تۋرالى ايتىپ ءجۇر», دەدى س.جوباەۆ.
رەسەيدىڭ رەسپۋبليكاداعى ساۋدا وكىلى انتون لوگينوۆتىڭ ايتۋىنشا, ءبىر جىلدا ەلىمىزدىڭ رەسەيلىك كاپيتالدىڭ قاتىسۋىمەن كومپانيالار سانى 70 پايىزعا ارتقان. دەمەك قازاقستان مەن رەسەي اراسىنداعى جانە ەاەو اياسىنداعى ىنتىماقتاستىقتى دامىتۋ ءالى دە تەرەڭدەي بەرەدى.
