شاراعا ۋنيۆەرسيتەت باسشىلىعىنىڭ وكىلدەرى, عالىمدار, پروفەسسورلار, وقىتۋشىلار مەن ستۋدەنتتەر قاتىستى. گەرمانيا, قىتاي, پاكىستان جانە قازاقستاننىڭ جەتەكشى ۋنيۆەرسيتەتتەرىنىڭ عالىمدارى بايانداما جاسادى. ورتالىق ازيانىڭ ءارتۇرلى ەلدەرىنەن كەلگەن 60-تان استام ستۋدەنت جانە جاس عالىمدار وزدەرىنىڭ عىلىمي-زەرتتەۋ جۇمىستارى تۋرالى باياندامالارى مەن بۋكلەتتەرىن ۇسىندى.
پلەنارلىق وتىرىستا باسقارما مۇشەسى – عىلىمي-يننوۆاتسيالىق قىزمەت جونىندەگى پرورەكتور ءجاميلا ايتجانوۆا قازۇۋ-داعى ەكولوگيا جانە بيورەسۋرستاردىڭ تۇراقتىلىعى عىلىمي-زەرتتەۋ ينستيتۋتى, بيولوگيا جانە بيوتەحنولوگيا, گەوگرافيا جانە تابيعاتتى پايدالانۋ فاكۋلتەتتەرى ءبىلىم بەرۋ, عىلىمي-زەرتتەۋ, سەرىكتەستىك جانە الەۋمەتتىك باستامالار ارقىلى تۇراقتى دامۋعا ەلەۋلى ۇلەس قوسىپ وتىرعانىن اتاپ ءوتتى.
«قازۇۋ فاكۋلتەتتەرىنىڭ ءبىلىم بەرۋ باعدارلامالارى ەكولوگيالىق تازا ءونىم الۋدىڭ, اۋىل شارۋاشىلىعى مەن قورشاعان ورتاعا قاجەتتى شيكىزاتتى وڭدەۋدىڭ ماڭىزدىلىعىن تۇسىنەتىن مامانداردى دايارلاۋعا باعىتتالعان. عىلىمي زەرتتەۋلەر, دالالىق تاجىريبەلەر جانە حالىقارالىق ۇيىمدارمەن ىنتىماقتاستىق ارقىلى ءبىزدىڭ ستۋدەنتتەر مەن وقىتۋشىلار ەكولوگيالىق تۇراقتىلىق پەن بيورەسۋرستارعا باعدارلانعان سالانىڭ بولاشاعىن قالىپتاستىرۋدا», دەدى پرورەكتور.
پلەنارلىق وتىرىستا پروفەسسور يليا ديگەل-ااحەنسكي (قولدانبالى عىلىمدار ۋنيۆەرسيتەتى, گەرمانيا), پروفەسسور نۇرشات نۇراجي (جاڭارتىلاتىن ەنەرگيا كوزدەرى زەرتحاناسى, نازارباەۆ ۋنيۆەرسيتەتىنىڭ ينجەنەرلىك جانە تسيفرلىق عىلىمدار مەكتەبىنىڭ حيميا جانە ماتەريالتانۋ كافەدراسى (استانا), پروفەسسور, دوكتور زۋلفيحار الي-IOFS, پاكىستاننىڭ باعدارلامالار مەن جوبالار ءبولىمىنىڭ ديرەكتورى (پاكىستان) جانە باسقالار بايانداما جاسادى.
كونفەرەنتسيادا ازىق-ت ۇلىك جانە اۋىلشارۋاشىلىق بيوتەحنولوگياسىنداعى الدىڭعى قاتارلى جەتىستىكتەر, بيوارتۇرلىلىكتى ساقتاۋ ستراتەگيالارى جانە كومىر قالدىقتارىن وڭدەۋدەگى يننوۆاتسيالىق بيوتەحنولوگيالىق تاسىلدەر قاراستىرىلدى.
شارا اياسىندا قازاقستان-گەرمانيا-قىتاي سەرىكتەستىگى نەگىزىندە حالىقارالىق قولدانبالى ميكروبيولوگيا زەرتحاناسىنىڭ اشىلۋ سالتاناتى ءوتتى. وتاندىق جانە شەتەلدىك عالىمدار جينالعان جيىندا پروفەسسور يليا ديگەل-ااحەنسكي (قولدانبالى عىلىمدار ۋنيۆەرسيتەتى, گەرمانيا) «ەرەن ەڭبەگى ءۇشىن» مەدالىمەن ماراپاتتالدى. كونفەرەنتسيا بارىسىندا ۇزدىك دەپ تانىلعان 40 ماقالا Scopus عىلىمي دەرەكتەر بازاسىندا يندەكستەلگەن جۋرنالداردا جاريالاندى. قاتىسۋشىلارعا «ۇزدىك پوستەر» جانە «ۇزدىك بايانداما» نوميناتسيالارى بويىنشا عىلىمي زەرتتەۋلەرىن جالعاستىرۋ ماقساتىندا اقشالاي سىياقى بەرىلدى.
زەرتحانا قىزمەتى بيوتەحنولوگيا سالاسىنداعى عىلىمي زەرتتەۋلەردى حالىقارالىق دەڭگەيدە دامىتۋعا, يننوۆاتسيالىق بيوتەحنولوگيالاردى ەنگىزۋگە جانە قازاقستاننىڭ عىلىمي الەۋەتىن ارتتىرۋعا باعىتتالعان. عىلىمي ورتالىق ميكروبيولوگيانىڭ قولدانبالى سالالارى – اۋىل شارۋاشىلىعى, ەكولوگيا, مەديتسينا جانە ونەركاسىپكە ەرەكشە كوڭىل بولگەن قازاقستاندىق, نەمىس جانە قىتاي عالىمدارىنىڭ بىرلەسكەن جۇمىسىنىڭ ناتيجەسىندە قۇرىلدى. جوبا قازاقستان عىلىمىنىڭ باسەكەگە قابىلەتتىلىگىن ارتتىرۋعا جانە تۇراقتى دامۋ ماقساتتارىن جۇزەگە اسىرۋعا قوسقان ۇلكەن ۇلەسى بولماق.
