فوتو: الماتى قالاسىنىڭ اكىمدىگى
ايتا كەتەيىك, بىرىڭعاي ۆيدەومونيتورينگ جۇيەسىنىڭ جوباسى 2022 جىلى ىسكە قوسىلدى جانە بۇگىندە جۇيە 45 مىڭ قالالىق كامەرانى بىرىكتىرەدى. كەلەسى جىلدىڭ سوڭىنا قاراي ولاردىڭ سانى 70 مىڭعا دەيىن وسەدى.
وسى جۇيەنىڭ ارقاسىندا وتكەن جىلى اۋىر قىلمىس جاسادى دەپ كۇدىكتەلگەن, سونداي-اق ىزدەۋدە جۇرگەن ونداعان ادام تابىلىپ, ۇستالدى. جۇيە ىزدەۋدە جۇرگەن ادامدار تۋرالى 13 مىڭنان استام جازبادان تۇراتىن قۇقىق قورعاۋ ورگاندارىنىڭ دەرەكتەر بازاسىمەن بىرىكتىرىلگەن.
«جۇيە ىزدەۋدە جۇرگەن ادامدى انىقتاعان كەزدە جاعداي ورتالىعى مەن پوليتسيا بولىمشەلەرىنە ناقتى كوورديناتتاردى جىبەرۋ ارقىلى بىردەن حابارلايدى. بۇل ارەكەت ەتۋ ۋاقىتىن ەداۋىر قىسقارتادى جانە پوليتسيا جۇمىسىنىڭ تيىمدىلىگىن ارتتىرادى», دەدى الماتى قالاسىنىڭ تسيفرلاندىرۋ باسقارماسى.
سونداي-اق, جاساندى ينتەللەكت الگوريتمدەرى: ادامدار توبىن انىقتاۋعا جانە ولاردىڭ مىنەز-قۇلقىن تالداۋعا, كۇدىكتى زاتتاردى انىقتاۋعا, قوعامدىق ورىندارداعى قارۋ-جاراق ۇلگىلەرىن تانۋعا, ادامداردى/كولىكتەردى كەسكىن نەمەسە فوتوسۋرەت بويىنشا ىزدەۋگە, جول قوزعالىسى ەرەجەلەرىن بۇزۋدى تىركەۋگە, وت پەن ءتۇتىندى انىقتاۋعا مۇمكىندىك بەرەدى.
قولجەتكەندەرمەن توقتاپ قالماي, قالادا جەرگىلىكتى قىزمەتتەردىڭ جۇمىسىن جاقسارتاتىن ۆيدەوساراپتامانىڭ جاڭا تۇرلەرى سىنالىپ, ەنگىزىلىپ جاتىر: قوقىس جينالاتىن ورىنداردى, تولىپ جاتقان ۋرنالار مەن كونتەينەرلەردى, قاڭعىباس جانۋارلاردى انىقتاۋ, قوعامدىق كولىكتەردەگى ۆيدەو اعىندارىن زەرتتەۋ, قاتتى دىبىستاردى تىركەۋگە ارنالعان اۋديوساراپتامانى قولدانۋ.
«بۇگىنگى تاڭدا «كەشەندى قاۋىپسىزدىك جۇيەسى» جوباسىمەن 400-دەن استام مەملەكەتتىك مەكتەپتەر مەن بالاباقشالار قامتىلعان, ولاردىڭ بارلىعى تسيفرلىق ۆيدەوباقىلاۋ كامەرالارىمەن, ۆيدەودوموفوندارمەن, بەتتى تانۋ فۋنكتسياسى بار تۋرنيكەتتەرمەن, دابىل تۇيمەلەرىمەن جانە قالالىق شۇعىل ارەكەت ەتۋ قىزمەتتەرىنە قوسىلعان ءورت دابىلى داتچيكتەرىمەن جابدىقتالعان», دەلىنگەن حابارلامادا.
قازىر جەكە ءبىلىم بەرۋ مەكەمەلەرىن ۆيدەوكامەرالار جۇيەسىنە بەلسەندى قوسۋ ءجۇرىپ جاتىر. بيىلعى جىلدىڭ سوڭىنا دەيىن بارلىق مەملەكەتتىك مەديتسينالىق مەكەمەلەردە وسىنداي قاۋىپسىزدىك جۇيەسىن ەنگىزۋ جوسپارلانعان.
