براكونەرلەرگە بۇعاۋ بولماي تۇر

ماسەلەن, شەكارا قىزمەتىنىڭ مالىمە­تىنە سۇيەنسەك, قازان ايىندا بەس مەملەكەتكە ورتاق تەڭىز اكۆاتورياسىندا 57 براكونەرلىك دەرەك انىقتالىپتى. ەل شەبىن كىرپىك قاقپاي قورعايتىن شەكاراشىلار قۇقىق بۇزۋشىلاردان 31 ءجۇزۋ قۇرالىن, بالىق اۋلاۋعا ارنالعان 70 شاقىرىم تور, 1 765 كگ بەكىرە تۇقىم­داس 299 بالىقتى تاركىلەدى. ال وزگە تۇقىم­داسقا جاتاتىن 904 دانا بالىقتىڭ سالماعى – 2 165 كگ. براكونەرلەر تورىنا 13 يتبالىق تۇسكەنى انىقتالىپ وتىر. سۋىق قولدىلاردىڭ جىمىسقى ارەكەتىنىڭ الدىن الىنعان زالال سوماسى شامامەن 671 ملن تەڭگەنى قۇرادى.

ال جايىق-كاسپي سۋ باسسەينىندە جىل سايىن «بەكىرە» كەڭ اۋقىمدى بالىق قورعاۋ اكتسياسى ءوتىپ ءجۇر. بالىق شارۋاشىلىعى كوميتەتى توراعاسىنىڭ ورىنباسارى ايان باحيانوۆتىڭ ايتۋىنشا, اتالعان اكتسيانىڭ كوكتەمگى كەزەڭىنە اتىراۋ, باتىس قازاقستان جانە ماڭعىستاۋ وبلىس­تارىنان 1 177 قىز­مەتكەر قاتىسقان. ونىڭ ىشىندە 374 قىز­مەتكەر – اتىراۋ وبلىسىندا, 254 قىزمەتكەر – باتىس قازاقستان وبلىسىندا, ال 549 مامان مەن اسكەري قىزمەتشىلەر ماڭعىستاۋ وبلىسىنىڭ اۋماعىندا اكتسيانىڭ ءساتتى وتۋىنە اتسالىس­تى. ولار 80 قايىقپەن, شاعىن كولەمدى ءجۇزۋ قۇرالدارىمەن, 254 اۆتوكولىك جانە كۆاد­راتسيكلمەن, 6 درونمەن قامتىلدى.

كوكتەمگى اكتسيانىڭ قورىتىندىسىمەن 694 ادام اكىمشىلىك جاۋاپكەرشىلىككە تارتىلدى. براكونەرلىك دەرەگىنە, سيرەك كەزدەسەتىن جانە قۇرىپ كەتۋ قاۋپى تونگەن بالىق تۇرلەرىن زاڭسىز اۋلاۋعا قاتىستى 71 قىلمىستىق ءىس قوزعالدى. قۇقىق بۇزۋ­شى­لارعا 19 ملن تەڭگە ايىپپۇل سالىندى.

«زاڭسىز اينالىمنان 11 توننا 308 كگ بالىق الىندى. ونىڭ ىشىندە 2 توننا 229,5 كگ بەكىرە, 8 كگ بەكىرە بالىقتارىنىڭ ۋىلدىرىعى, 162 بالىق اۋلاۋ قۇرالى مەن 44 سۋ كولىگى بار. وزەن ارناسى مەن تەڭىز اكۆاتورياسىن كۇن سايىن تراۋلاۋ ناتيجەسىندە جالپى ۇزىندىعى 300 شاقىرىمنان اساتىن 1 416 زاڭسىز بالىق اۋلاۋ قۇرالى تابىلدى», دەيدى ايان باحيانوۆ.

سۋ ايدىندارىندا اكىمشىلىك قۇقىق بۇزۋشىلىق تۋرالى 848 حاتتاما تولتىرىلىپ, 134 ماتەريال سوت ورگاندارىنا جىبەرىلدى. بالىق اۋلاۋ ەرەجەلەرىن ورەسكەل بۇزعانى ءۇشىن 5 جەكە تۇلعاعا قاتىستى 4 ماتەريال قىلمىستىق ءىس قوزعاۋ ءۇشىن قۇقىق قورعاۋ ورگاندارىنا جولداندى. ال مەملەكەت كىرىسىنە 2 784 توننا زاڭسىز اۋلانعان بالىق, 286 اۋلاۋ قۇرالى, سونداي-اق 16 ءجۇزۋ قۇرالى تاركىلەندى.

براكونەرلەر اۋلاعان بالىعىن جىل سايىن قامىس اراسىنا جاسىرادى ەكەن. بيىل «جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ قىزمەتكەرلەرى ساۋىردە جايىق وزەنىنىڭ جاعاسىنان كوپ مولشەردەگى بەكىرەنى تاۋىپ الدى. براكونەرلەر 14 قاپقا سالىنعان باعالى بالىقتى قامىس اراسىنا جاسىرىپ كەتكەن.

بالىق شارۋاشىلىعى كوميتەتى ءباسپاسوز قىزمەتىنىڭ اقپاراتىنا قاراعاندا, پوليتسيا جانە ماماندان­دىرىلعان تابيعات قورعاۋ پروكۋراتۋراسىمەن بىرلەسكەن رەيد كەزىندە دامبى اۋىلىنىڭ ماڭىنداعى 2 وزەك تەكسەرىلدى. سۋ ايدىنىنىڭ جاعاسىنداعى قامىس اراسىنان 14 قاپقا سالىنعان جالپى سالماعى 313,3 كگ بەكىرە تۇقىمداس بالىق تابىلدى. زاڭسىز اۋلانعان سۋ مارجانىنان بالىق قورىنا كەلتىرىلگەن زالال مولشەرى 173 ملن 505 مىڭ تەڭگەنى قۇرادى.

پوليتسيا قىزمەتكەرلەرى «بەكىرە» اكتسياسىنىڭ كۇزگى كەزەڭىندە بالىق اۋلاۋ زاڭدىلىعىن بۇزعان 59 دەرەكتى انىقتادى. قۇقىق بۇزعان تۇرعىننىڭ بىرىنەن بەكىرە تاركىلەندى.

«بۇل ءىس-شارانىڭ ماقساتى – بەكىرە جانە باسقا دا بالىق تۇرلەرىن زاڭسىز اۋلاۋدىڭ جولىن كەسۋ. بالىق قورىنا قىلمىستىق قول سۇعۋشىلىققا قارسى كۇرەس ءبولىمىنىڭ قىزمەتكەرلەرى بالىقتى زاڭسىز اۋلاعان 25 ادامعا قاتىستى اكىمشىلىك حاتتاما تولتىردى. جەدەل ىزدەستىرۋ ءىس-شارالارىن جۇرگىزۋ كەزىندە قۇرمانعازى اۋدانىنىڭ ازىق-ت ۇلىك دۇكەندەرىنىڭ بىرىندە زاڭسىز بالىق اۋلاۋمەن اينالىسقان 1995 جىلعى ەر ادام ۇستالدى. تەكسەرۋ كەزىندە سالماعى 27 كگ 620 گرامم بولاتىن بەكىرە تۇقىمداس بالىق ونىمدەرى تاركىلەندى. اتالعان دەرەككە قاتىستى قىلمىستىق كودەكستىڭ 339-بابىمەن (وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سوتقا دەيىنگى تەرگەپ-تەكسەرۋ جۇرگىزۋ باستالدى», دەپ حابارلادى دەپارتامەنتتىڭ ءباسپاسوز قىزمەتى.

كەيىن ءتارتىپ ساقشىلارى زاڭسىز بالىق اۋلاپ جۇرگەن براكونەرلەردەن 356 بالىق تاركىلەندى. ونىڭ 270 كيلوسى – بەكىرە تۇقىمداس بالىق. قۇقىق بۇزۋشىلارعا قاتىستى 3 قىلمىسقا قاتىستى سوتقا دەيىنگى تەرگەپ-تەكسەرۋ امالدارى جۇرگىزىلدى. انىقتالعان قۇقىق بۇزۋشىلىق بويىنشا ايعاق زات رەتىندە 2 اۆتوكولىك, بالىق اۋلاۋعا ارنالعان 21 قۇرال الىندى.

مۇنايلى وڭىردە باعالى بەكىرە تۇقىمداس بالىقتى اۋلاۋعا قاتىستى زاڭسىز دەرەكتەردىڭ ءبىر پاراسى – وسىنداي. الايدا براكونەرلەردى تولىق بۇعاۋلايتىن قادام بولماي تۇر.

اتىراۋ وبلىسى