ونەرپاز ەل ىشىنەن بولەك رەسەي, يتاليا قالالارىندا شىعارماشىلىق كەشتەرىن بەردى. سانكت-پەتەربۋرگتەگى يۋري تەميركانوۆ باسقارعان سيمفونيالىق وركەسترمەن, فلورەنتسياداعى «Pergola» تەاترىنىڭ سيمفونيالىق وركەسترىمەن (ديريجەرى الەسساندرو پينساۋتي) جانە استانا فيلارمونياسىنىڭ سيمفونيالىق وركەسترىمەن (ديريجەرى بەرىك باتىرحان) سوليست رەتىندە ونەر كورسەتتى. سايدا قالىقوۆا وسى كۇنگە دەيىن 80-نەن اسا ونەر كەشىن ۇسىنىپ, سونداي-اق الەمنىڭ تۇكپىر-تۇكپىرىندە وتكەن قايىرىمدىلىق كونتسەرتتەرگە دە قاتىسادى.
25 جىلدىق شىعارماشىلىق مەرەيتويىنا وراي سايدا قالىقوۆا ايگىلى كومپوزيتورلاردىڭ فورتەپيانولىق شىعارمالارىن ورىندادى. دج. ءفيلدتىڭ «نوكتيۋرن №1», ف.شوپەننىڭ «Berceuse», سونىمەن قاتار يسپان كومپوزيتورى ە.گرانادوستىڭ «كونتسەرتتىك اللەگروسى» ورىندالدى. سونداي-اق ونەر يەسى ءوزىنىڭ اۆتورلىق شىعارمالارىنىڭ تۇساۋكەسەرلەرىن – «وسەنني ۆالس», «لۋننىي تسۆەتوك», «دىحانيە سيرەني», «وسكولكي گرۋستي», باسقا دا تۋىندىلارىن ۇسىندى. بۇل شىعارمالاردىڭ يدەيالارى كومپوزيتوردىڭ جەكە سەزىمدەرىنەن تۋىنداعان, سوندىقتان جاڭا باعدارلاماسىن «اروماتى جيزني» دەپ اتاعان.
اتالعان كەشكە مەملەكەتتىك سىيلىقتىڭ لاۋرەاتى سۇندەت بايعوجين (باريتون), مادەنيەت سالاسىنىڭ ۇزدىگى روزا شوتكاليەۆا (فورتەپيانو) قاتىستى. ال كونتسەرتتىڭ قۇرمەتتى قوناعى – مادريد كورولدىك كونسەرۆاتورياسىنىڭ پروفەسسورى, پيانيست-كومپوزيتور اندرەاس كارلوس مانچادو لوپەس. بۇل وقيعا قازاقستان مەن يسپانيا اراسىنداعى مادەني بايلانىستاردىڭ ەرەكشە ماڭىزدىلىعىن كورسەتكەنى انىق.
