فوتولار: كورپوراتيۆتىك كوممۋنيكاتسيالار دەپارتامەنتى
شىمكەنت-الماتى باعىتى بويىنشا DV707 رەيسىمەن ۇشىپ كەلگەن شولپان سادىقوۆا 10 ميلليونىنشى جولاۋشى اتاندى.
ايتا كەتسەك, سەرۆيستىك كومپانيالارى ارقىلى 33 ەلدەگى 110 اۋەجايدا قىزمەتتەردىڭ كەڭ سپەكترىن ۇسىناتىن الەمدەگى جەتەكشى اۋەجاي باسقارۋ كومپانيالارىنىڭ ءبىرى - Tav Airports Holding كومپانياسى باسقاراتىن جانە قىزمەت كورسەتەتىن الماتى حالىقارالىق اۋەجايى ءۇشىن 2024 جىل جەتىستىكتەرگە تولى بولدى, جولاۋشىلار اعىنى 9 ميلليون ادامعا جەتتى.
اتالعان اۋەجايدىڭ كورپوراتيۆتىك كوممۋنيكاتسيالار دەپارتامەنتىنىڭ ءمالىم ەتۋىنشە, اۋە ايلاقتى 2021 جىلدان بەرى باسقاراتىن TAV Airports كومپانياسى سوڭعى 3 جىلدا اۋە ايلاققا 200 ميلليون دوللاردان استام ينۆەستيتسيا سالعان جانە كەلەر ۋاقىتتا دا ينۆەستيتسيالاۋدى جالعاستىرۋدى جوسپارلاپ وتىر. 3 جىل ىشىندە باعىتتار سانى 2 ەسە جانە ALA-عا ۇشاتىن اۆياكومپانيالار سانى 24-تەن 37-گە دەيىن وسكەن. 2024 جىلدىڭ 9 ايىندا جولاۋشىلار اعىنى 8,5 ميلليون ادامعا جەتكەن, بۇل 2023 جىلمەن سالىستىرعاندا 21%-عا ارتىق.
كومپانيا جولاۋشىلاردىڭ قاۋىپسىزدىگى مەن جايلىلىعىن ارتتىرۋعا باعىتتالعان جوبالارعا ينۆەستيتسيا سالۋدى جوسپارلاپ وتىر, وعان سول جاق ۇشۋ-قونۋ جولاعىن تولىق قايتا قۇرۋ, پەررونداردى جانە كوكتايعاققا قارسى الاڭدى جاڭارتۋ, اەرودروم جابدىقتارى پاركىن جاڭارتۋ جانە ت.ب. جاتادى. بۇگىندە ىشكى رەيستەر تەرمينالى (ت1) تولىق جاڭعىرتىلىپ جاتىر. تەرمينالدى تولىق قايتا قۇرۋ جۇمىستارىن 2025 جىلدىڭ سوڭىندا اياقتاۋ جوسپارلانىپ وتىر.
الماتى حالىقارالىق اۋەجايىن كەڭەيتۋ بويىنشا اۋقىمدى جوبا جولاۋشىلار تەرمينالى مەن جالپى اۆياتسيا عيماراتتارىنىڭ قۇرىلىسىن, سونداي-اق ەستاكادا, ورتالىق ينجەنەرلىك قوندىرعى, اەرودروم جانە ۆوكزال ماڭى اۋماعىن قايتا جوندەۋدى قامتيدى.
ايتا كەتەيىك, 10 ميلليونىنشى جولاۋشى اتانعان الماتىلىق شولپان سادىقوۆا اتا-اناسىن سارىاعاشتان ەمدەتىپ, الىپ كەلە جاتقان ەدى. اۋەجايدىڭ اتىنان «جۇلدىزدى جولاۋشىعا» گرۋزياعا 2 جولداما بەرىلدى.
