فوتو اقوردا
ەكونوميكانى ءارتاراپتاندىرۋ – ول ۇكىمەتتىڭ الدىندا تۇرعان ەڭ ماڭىزدى مىندەتتەردىڭ ءبىرى دەپ ايتۋعا بولادى. مەملەكەت باسشىسى دا وسى ماسەلەگە ۇنەمى نازار اۋدارادى. سوندىقتان ۇكىمەت جانە قۇزىرلى ورگاندار وسى باعىتتا بەلسەندى جۇمىس جاساپ جاتىر. پرەمەر-ءمينيستردىڭ ايتۋىنشا وڭدەۋ ونەركاسىبىنىڭ ۇلەسى 47%-دى قۇراسا, شيكىزات سەكتورىنىڭ ۇلەسى 45%-دى قۇراعان.
«وسى باعىتتا ءارى قاراي دا بەلسەندى جۇمىس اتقارۋ كەرەك. قابىلدانعان شەشىمدەردىڭ ارقاسىندا, وزدەرىڭىز بىلەتىندەي, ءبىز قازىر ءبىرىنشى كەزەكتە شيكىزاتتى ەكسپورتقا ەمەس, ىشكى نارىققا جىبەرىپ جاتىرمىز. وسى شارالاردىڭ ناتيجەسىندە ءبىز قازىر اليۋميني مەن مىس بويىنشا وڭدەۋ كورسەتكىشتەرىن ەكى ەسەگە ۇلعايتتىق. بۇل – دۇرىس ناتيجە.
جالپى ەكونوميكانى ءارتاراپتاندىرۋ باعىتىندا وتە ماڭىزدى ماسەلە – ول وتاندىق وندىرۋشىلەردى قولداۋ. مىسالى, مەملەكەتتىك ساتىپ الۋ شەڭبەرىندە. وسى باعىتتا دا ءتيىستى شارالار قابىلدانىپ جاتىر. ءبىز قازىر تەك قازاقستاندىق تاۋار وندىرۋشىلەردەن ساتىپ الىناتىن تاۋارلاردىڭ تىزبەسىن 1,5 مىڭنان 4,5 مىڭعا دەيىن تاۋارلىق پوزيتسياعا جەتكىزدىك. ول دەگەن ۇلكەن قولداۋ. ياعني, كەز كەلگەن مەملەكەتتىك ورگان نەمەسە كۆازيمەملەكەتتىك كومپانيا وسى ءتورت جارىم مىڭ تاۋارلىق پوزيتسيا بويىنشا ەشقانداي يمپورتتىق تاۋارلاردى ساتىپ الا المايدى, تەك قازاقستاندا جاسالعان تاۋارلاردى ساتىپ الا الادى.
وسى شارانىڭ ناتيجەسىندە بيىلدىڭ وزىندە قازاقستاندىق تاۋار وندىرۋشىلەرمەن جاسالعان كەلىسىمشارتتاردىڭ سانى 55%-عا ءوستى, ياعني وسى كەلىسىمشارتتاردىڭ جالپى سوماسى 350 ملرد تەڭگەگە دەيىن جەتتى», دەدى ولجاس بەكتەنوۆ.
ۇكىمەت باسشىسى تاعى ءبىر ماڭىزدى قادام – ول وتاندىق وندىرۋشىلەرمەن وفتەيك-كەلىسىمشارتتاردى جاساۋ ەكەنىن اتاپ ءوتتى.
«وسى باعىتتا دا قازىر ۇكىمەت جانە سامۇرىق-قازىنا قورى بەلسەندى جۇمىس جاساپ جاتىر. بيىل وفتەيك-كەلىسىمشارتتاردىڭ جالپى سوماسى 134 ملرد تەڭگەگە دەيىن جەتتى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 14 ەسەگە جوعارى.
سونىمەن قاتار ەلىمىزدىڭ بارلىق وڭىرلەرىندە ءىرى-ءىرى وندىرىستىك جوبالار ىسكە اسىرىلىپ جاتىر. مىسالى اتىراۋ وبلىسىندا پوليپروپيلەن شىعاراتىن زاۋىت اشىلدى. ونىڭ جىلدىق وندىرىستىك قۋاتتىلىعى 1 ملن توننا پوليپروپيلەن. سالىستىراتىن بولساق, ورتالىق ازيا جانە وڭتۇستىك كاۆكازداعى بارلىق مۇناي-گاز حيميا زاۋىتتارىن الاتىن بولساق, ءبىزدىڭ اتىراۋداعى زاۋىتتىڭ قۋاتتىلىعىنا جەتپەيدى. وتە ءىرى جانە زاماناۋي ءوندىرىس.
قوستاناي قالاسىندا Kia كومپانياسى قازىر وزدەرىنىڭ تولىققاندى تسيكل بويىنشا اۆتوموبيل شىعاراتىن زاۋىتىن سالىپ جاتىر. كەلەسى جىلى ىسكە قوسىلاتىن بولادى. الماتىدا مۋلتيبرەند اۆتوموبيل شىعاراتىن زاۋىت اشىلادى.
ساران قالاسىندا اۆتوموبيل شينالارىن شىعاراتىن زاۋىت اشىلدى. وتە ءىرى, زاماناۋي ءوندىرىس. وسىنى جالعاستىرۋعا بولادى. مەن ايتىپ وتكەندەي, ءاربىر وڭىردە وسىنداي ءىرى جوبالار بار.
قابىلدانىپ جاتقان شارالاردىڭ ناتيجەسىندە وڭدەلگەن ءونىم ەكسپورتى 6,4%-عا ءوسىپ جاتىر, كەرىسىنشە دايىن ءونىم يمپورتى 7,2%-عا تومەندەدى. بىراق, ارينە ءبىز ۇكىمەت, قۇزىرلى ورگاندار وسى باعىتتا ءارى قاراي دا بەلسەندى جۇمىس اتقارۋدى جالعاستىرامىز», دەدى پرەمەر مينيستر.
