بيىلعى «Digital Media Trends» زەرتتەۋىندە تۇتىنۋشىلاردىڭ تسيفرلىق مەديا مەن ويىن-ساۋىق سالاسىنان قانداي قۇندىلىق كۇتەتىنى جانە مۇنداعى ۇرپاقتار اراسىنداعى ايىرماشىلىق پەن ۇرپاقتار الماسۋىنىڭ ءرولى تالدانعان. بۇگىندە 41 جاستان كىشى امەريكالىقتار اقش حالقىنىڭ جارتىسىنان كوبىن قۇرايدى. ميللەنيال ۇرپاق وكىلدەرى قىرىق جاسقا تولعانىن ەسكەرسەك, قازىردە الەۋمەتتىك مەديانى تەك «جاس بۋىن» قولدانبايدى جانە مەدياعا قاتىستى ماسەلەلەر «جاستار ماسەلەسى بولۋىن» توقتاتتى.
ەسەپكە سۇيەنسەك, گەنەراتيۆتى جاساندى ينتەللەكت مەديا سالاسىنىڭ ستاندارتتارىنا كەڭىنەن ىقپال ەتىپ وتىر. ماسەلەن, رەسپوندەنتتەردىڭ 70%-ى گەنەراتيۆتى جي جازىپ شىعارعان تەلەشوۋدى نەمەسە ءفيلمدى كورگەننەن گورى ادام ەڭبەگىن ۇناتاتىنىن مالىمدەگەنىمەن, رەسپوندەنتتەردىڭ 42%-نىڭ ەسەپتەۋىنشە, گەنەراتيۆتى جي دە, ادامدار دا كوڭىل كوتەرۋگە ارنالعان كونتەنتتى دايىنداي الادى. ال ساۋالناما قاتىسۋشىلارىنىڭ 22%-ى گەنەراتيۆتى جي ءتىپتى ادامدارعا قاراعاندا قىزىعىراق تەلەسەريالدار مەن فيلمدەردىڭ ستسەناريىن جازا الادى دەپ ەسەپتەيدى. Z ۇرپاعى وكىلدەرى مەن ميللەنيالداردىڭ 18%-ى سۋرەتتەردى دايىنداۋ ءۇشىن گەنەراتيۆتى جي قولداناتىنى بەلگىلى بولدى, ال ساۋالناماعا قاتىسۋشىلاردىڭ 25%-ى جاساندى ينتەللەكتتى ءماتىن جازۋ ءۇشىن قولدانادى. بۇل تۇرعىدان اعا ۇرپاقتىڭ كورسەتكىشى – الدەقايدا تومەن دەڭگەيدە.
ەسەپ دەرەكتەرىنە جۇگىنسەك, 2024 جىلى اقش وتباسىلارى «Netflix» سياقتى پلاتفورمالارعا جازىلۋعا كوبىرەك اقشا جۇمساعان, بىراق بۇل كورسەتكىش ءوز شەگىنە جەتتى دەپ پايىمداۋعا بولادى. تۇتىنۋشىلاردى تەلەديدار نەمەسە ۆيدەوپلاتفورمالارداعى جارنامالار قىزىقتىرمايتىنى انىق. بۇل – اسىرەسە جاس ۇرپاققا قاتىستى تۇجىرىم. ماسەلەن, 41 جاسقا تولماعان ساۋالناما قاتىسۋشىلارىنىڭ 18%-ى عانا ولاردىڭ ساتىپ الۋ شەشىمدەرىنە ۆيدەوپلاتفورماداعى جارنامانىڭ اسەر ەتەتىنىن مويىنداسا, رەسپوندەنتتەردىڭ 54%-ى الەۋمەتتىك مەديانىڭ ىقپالى الدەقايدا كوبىرەك ەكەنىن مالىمدەگەن. ولاردىڭ ايتۋىنشا, بۇعان ۆيدەوپلاتفورمالارداعى جارنامالاردىڭ قايتالاناتىنى جانە كورەرمەندەرگە جەكەلەندىرۋ قىزمەتىنىڭ جوقتىعى سەبەپكەر.
بۇل دەرەكتەر «Netflix» سياقتى پلاتفورمالاردىڭ تانىمالدىلىعى تومەندەيتىنىنە كەپىل ەمەس, ويتكەنى ونداعى كونتەنت فورماسى وزگەرگەن ءارى جارناما سالاسىنا يننوۆاتسيا ەنگىزىلگەن جاعدايدا رەسپوندەنتتەر مۇنداي پلاتفورمالارعا جازىلۋدى جالعاستىرماق. رەسپوندەنتتەردىڭ 50%-عا جۋىعى پلاتفورمادا كونتەنتتى ىزدەۋ وڭايىراق بولعان جاعدايدا ۆيدەوقىزمەتتەرگە كوبىرەك ۋاقىت جۇمساي الاتىنىن ايتقان. Z ۇرپاعى وكىلدەرى مەن ميللەنيالداردىڭ شامامەن 75%-ى پلاتفورمالاردا كونتەنت ىزدەۋدى جەڭىلدەتەتىن توپتامالار قۇرىلعانىن قالايدى. ءتىپتى ساۋالناماعا قاتىسۋشىلارىنىڭ 42%-ى ءوز قىزىعۋشىلىقتارىنا ساي كەلەتىن جارنامالاردى كورۋگە قارسى ەمەس ەكەنىن اتاپ ءوتۋى كەرەك.
الەۋمەتتىك مەدياعا كەلەتىن بولساق, Z ۇرپاعى وكىلدەرىنىڭ جارتىسى (47%) جانە ميللەنيالداردىڭ ۇشتەن ءبىرى ءۇشىن سۇيىكتى ۆيدەوكونتەنتتىڭ ءتۇرى – الەۋمەتتىك مەدياداعى ۆيدەولار اعىنى مەن تىكەلەي ەفيرلەر. بىراق ساۋالناما قاتىسۋشىلارىنىڭ 50%-عا جۋىعى اعىندىق كونتەنتتى ىزدەۋگە تىم كوپ ۋاقىت جۇمسايتىنىن ايتقان. سوعان قاراماستان, Z ۇرپاعى وكىلدەرى مەن ميللەنيالداردىڭ جارتىسىنان كوبى (54%-ى) ۆيدەوپلاتفورمالاردىڭ وزىنە قاراعاندا تەلەسەريالدار مەن فيلمدەر بويىنشا جاقسى ۇسىنىستاردى الەۋمەتتىك مەديادان كورگەنىن مالىمدەگەن. زەرتتەۋ دەرەكتەرى بۇل كينوتەاترداعى فيلمدەرگە دە قاتىستى ەكەنىن كورسەتەدى.
كومپيۋتەرلىك ويىنداردىڭ دا جالپى وسى سالاعا جاتاتىنىن ەسكەرسەك, Z بۋىنىنا جاتاتىن گەيمەرلەردىڭ 63%-ى جاڭا ويىندار تۋرالى الەۋمەتتىك جەلىدەگى تىكەلەي ەفيرلەر مەن كونتەنت جاساۋشى تۇلعالاردان بىلەدى. رەسپوندەنتتەردىڭ 56%-ىنا سۇيەنسەك, ويىندار تۋرالى كونتەنتتى جاسايتىن بلوگەر قانداي دا ءبىر ويىندى ۇسىنعان بولسا, گەيمەرلەر ۆيدەوويىننىڭ وندىرۋشىسىنە سەنىم ارتۋعا بەيىم بولادى.
تالداۋ دەرەكتەرىنە سايكەس تۇتىنۋشىلاردىڭ 70%-عا جۋىعى ءوز مادەنيەتىنەن وزگەشە مادەنيەتتەر تۋرالى اقپارات ۇسىناتىن تەلەسەريالداردى جانە فيلمدەردى ۇناتادى. رەسپوندەنتتەردىڭ جارتىسىنا جۋىعى بۇل اسپەكتىنىڭ تەلەسەريالدار مەن فيلمدەردە قامتىلۋىن كۇتەدى. بۇعان تەك ناسىلدىك, ەتنوستىق, گەندەرلىك بەلگىلەر عانا ەمەس, فيزيكالىق ساۋلىق بويىنشا ارتۇرلىلىك (ينكليۋزيا) تە كىرەدى.
زەرتتەۋ دەرەكتەرىنە جۇگىنسەك, جاس تۇتىنۋشىلاردىڭ شامامەن 30%-ى گەنەراتيۆتى جي جاساپ شىعارعان كونتەنت ادام جازعان كونتەنتكە قاراعاندا قىزىعىراق بولۋى مۇمكىن دەگەن پىكىرمەن كەلىسەدى. تومەندەگى سۋرەتتە اتالعان مالىمدەمەمەن كەلىسەتىن تۇتىنۋشىلاردىڭ پايىزدىق ۇلەسى بەرىلگەن:
دەرەككوز: 2024 جىلعى Deloitte-ءنىڭ تسيفرلىق مەديا ترەندتەر تۋرالى ەسەبى
قورىتا العاندا, «Deloitte»-ءنىڭ تسيفرلىق مەديا ترەندتەر تۋرالى ەسەبى جي پەن تەحنولوگيانىڭ قارقىندى دامۋى ادامزات ومىرىنە قانشالىقتى اسەر ەتەتىنىن تالداعان عىلىمي تۇجىرىمدارىمەن, دەرەكتەر قورىنا سۇيەنە وتىرىپ جاسالعان ماماندار قورىتىندىلارىمەن تاقىرىپقا قىزىعۋشى قاۋىمعا قوسىمشا كومەكشى قۇرال بولا الادى.
ايدانا امالبەكوۆا,
قازاقستان قوعامدىق دامۋ ينستيتۋتىنىڭ ساراپشىسى
