تۇرعىندار سانىنىڭ ارتۋىنا بايلانىستى اۋداندا ماڭىزدى الەۋمەتتىك نىساندار قۇرىلىسى دا قولعا الىنعان, سولاردىڭ ءبىرى – اۋدان ورتالىعى فورت-شەۆچەنكو قالاسىندا, باۋتين, اتاش ەلدى مەكەندەرىندە سالىنىپ جاتقان سۋ تۇششىتاتىن زاۋىتتار قۇرىلىسى. اتالعان اۋىلداردا سۋمەن قامتاماسىز ەتۋ ماقساتىندا تاۋلىگىنە 5000 تەكشە مەتر تەڭىز سۋىن تۇشىتاتىن زاۋىت سالىنىپ جاتىر. قازىرگى ۋاقىتتا زاۋىتتىڭ قۇرىلىسى 80%-عا اياقتالعان. بۇگىندە بۇل ەلدى مەكەندەرگە اششى سۋ قۇبىرلارى ارقىلى, ال تۇششى سۋ جەراستى كوزدەرىنەن ارنايى تاسىمالداۋشىلارمەن جەتكىزىلەدى. جىل سوڭىنا دەيىن زاۋىت تولىق ىسكە قوسىلىپ, قۇبىرلار ارقىلى تۇششىتىلعان سۋ تۇرعىندارعا بەرىلمەك.
اۋداننىڭ ينفراقۇرىلىمىن جاقسارتۋ باعىتىنداعى تاعى ءبىر ماڭىزدى جوبا – تاۋلىگىنە 1000 تەكشە مەتر كارىز سۋىن تازارتۋعا ارنالعان جاڭا تازارتۋ جۇيەسىنىڭ قۇرىلىسى. بۇل جوبانىڭ 95%-ى اياقتالىپ, جاقىن ارادا ىسكە قوسىلادى دەپ جوسپارلانعان.
اۋداندا الەۋمەتتىك نىساندار دا كوپتەپ بوي كوتەرىپ جاتىر. بيىل فورت-شەۆچەنكو قالاسىندا 100 ورىندىق جاتاقحانا مەن 260 ورىندىق ونەر مەكتەبى سالىنىپ جاتقانى كوڭىل قۋانتادى. قازىرگى تاڭدا قۇرىلىسى 95%-عا اياقتالعان جاتاقحانا جىل سوڭىنا دەيىن پايدالانۋعا بەرىلەدى. بۇل نىسان اۋدانداعى تاپشى مامانداردى قىزمەتتىك پاتەرلەرمەن قامتاماسىز ەتۋ ءۇشىن قاراستىرىلعان. سونداي-اق جالپى اۋماعى 1,6 گەكتاردى قۇرايتىن ونەر مەكتەبىنىڭ قۇرىلىسى 85%-عا دايىن. جىل سوڭىنا دەيىن اشىلۋى جوسپارلانعان مەكتەپتە بالالار مەن ەرەسەكتەرگە ارنالعان مادەنيەت, ونەر سەكتسيالارى جۇمىس ىستەيتىن بولادى.
ءۇش اۋىسىمدى وقىتۋدى جويۋ, وقۋ ورىندارىنىڭ تاپشىلىعىن ازايتۋ ماقساتىندا سايىن شاپاعاتوۆ اۋىلدىق وكرۋگىندە 1200 ورىندىق, ءۇش قاباتتى زاماناۋي مەكتەپ قۇرىلىسى قارقىندى ءجۇرىپ جاتىر. جوسپارعا سايكەس, ءبىلىم ورداسى 2025 جىلى پايدالانۋعا بەرىلەدى.
ماڭعىستاۋ وبلىسى,
تۇپقاراعان اۋدانى
