«شىن مانىندە, بارلىق جەتىستىكتىڭ باستاۋى – ادال ەڭبەك. تابىسقا جەتۋدىڭ جالعىز جولى – ءوز كاسىبىنىڭ شەبەرى بولۋ جانە ەرىنبەي ەڭبەك ەتۋ. ماڭداي تەرىمەن تابىس تاپقان ادام ونى ماقساتسىز شاشىپ, ىسىراپ قىلمايدى. ۇنەمشىل, قاناعاتشىل ءارى ۇقىپتى بولادى. ولار – شىن مانىندە, باسەكەگە قابىلەتتى ەڭبەكقور ادامدار. جاستارىمىزدىڭ ساناسى سەرگەك, ەتى ءتىرى, شيراق بولۋى قاجەت», دەدى مەملەكەت باسشىسى.
جۋىردا قاسىم-جومارت توقاەۆ كوكتەمگى سۋ تاسقىنى كەزىندە ايانباي ەڭبەك ەتكەن ازاماتتارىمىزعا العىس جاريالاعان ەدى. ەلىمىزدىڭ ايماقتارىن قارعىن سۋ الىپ, حالقىمىزدىڭ باسىنا سىن ساعاتى تۋعاندا قول قۋسىرىپ وتىرماي, تابيعي اپاتپەن كۇرەستە ەرلىك تانىتقان سول جانداردىڭ اراسىندا ەلدى گازبەن جابدىقتاۋ سالاسىنىڭ قاراپايىم قىزمەتكەرى ءابىل تولەگەنوۆ تە بار. ول اتىراۋ وڭىرىندە سۋ تاسقىنىنا قارسى ءىس-شارالارعا بەلسەندى اتسالىسىپ, اپاتتىڭ الدىن الۋ مەن زاردابىن جويۋعا قوسقان ۇلەسى ءۇشىن پرەزيدەنتتىڭ قۇرمەت گراموتاسىمەن ماراپاتتالدى.
«بيىلعى كوكتەمدە جايىققا سۋدىڭ مول كەلۋىنە بايلانىستى وزەن ارناسىنان اسىپ, ەلدى مەكەندەردى سۋ باسۋ قاۋپى ءتوندى. ورال قالاسىنان باستاپ, چاپاەۆ, تايپاق اۋداندارى ارقىلى تومەن جوڭكىلگەن ەرىگەن قار سۋى يندەر اۋدانى مەن ماحامبەت اۋدانىنا جانە اتىراۋ قالاسىنا ۇلكەن قاۋىپ ءتوندىردى. كوپ جىلدان بەرى بولماعان وراسان تاسقىن كەزىندە گاز ماماندارى وزدەرىنە بەكىتىلگەن ۋچاسكەلەردى تاۋلىك بويى باقىلاپ, بوگەتتەر سالۋ مەن نىعايتۋ جۇمىستارىنا بەلسەنە قاتىستى. اتاپ ايتقاندا, ماحامبەت اۋدانىنداعى ماحامبەت, اقتوعاي, سارىتوعاي, جالعانساي, سارايشىق, بەيبارىس, تاڭداي, اققايىڭ, تالدىكول, ەڭبەكشىل, ورتاقشىل, ەسبول جانە اقجايىق اۋىلدارىنىڭ باستى گاز تاراتۋ قوندىرعىلارىن, جەراستى گاز قۇبىرلارىن امان ساقتاپ قالۋ ءۇشىن گاز ماماندارى قىزمەتتىك جانە ازاماتتىق بورىشىن وتەۋدە كۇش بىرىكتىرىپ, كۇن-ءتۇن دەمەي ەڭبەك ەتتى. ەلىمىزدى تەزىرەك اپاتتان قۇتقارۋ ءۇشىن جانتالاستىق. سونىڭ ارقاسىندا اۋدان بويىنشا بىردە-ءبىر ەلدى مەكەن كوگىلدىر وتىننان اجىراتىلعان جوق. سۋ تاسقىنىنان كەيىن كەيبىر اۋىلارالىق جەراستى گاز قۇبىرلارىن قالپىنا كەلتىرۋ جۇمىستارى جۇرگىزىلدى. قازىرگى تاڭدا جىلىتۋ ماۋسىمىنا وراي بارلىق اۋىل مەن ەلدى مەكەندەرگە كوگىلدىر وتىن ەش كەدەرگىسىز جەتكىزىلىپ وتىر. بۇل – ماحامبەت گاز شارۋاشىلىعى قىزمەتكەرلەرىنىڭ ادال ەڭبەگىنىڭ جەمىسى», دەيدى ءا.تولەگەنوۆ.
ماحامبەت اۋدانىنىڭ تۋماسى ءابىل قابدىعالي ۇلى – قازاق پوليتەحنيكالىق ينستيتۋتىنىڭ تۇلەگى. ول ءوزىنىڭ العاشقى ەڭبەك جولىن 1979 جىلى اۋداندىق اۋىلشارۋاشىلىق مەكەمەسىندە قاراپايىم جۇمىسشى بولىپ باستاعان. 2014 جىلعا دەيىن ءارتۇرلى سالادا قىزمەت ەتسە, كەيىنگى 10 جىلدان بەرى «QazaqGaz Aimaq» اق اتىراۋ وندىرىستىك فيليالىنىڭ ماحامبەت گاز شارۋاشىلىعىندا ينجەنەر.
وسى جىلداردا ايتىپ كەلمەيتىن تالاي تابيعي اپاتتا, اقتۇتەك بوراندا گاز قىسىمىنىڭ تومەن ءتۇسىپ كەتۋىنە بايلانىستى ءتۇرلى جاعدايلار باستان وتكەنىن ەسكە الادى كەيىپكەرىمىز.
«ارينە, ءار جۇمىستىڭ ءوز قيىنشىلىعى بار. سونىڭ ىشىندە گازبەن جابدىقتاۋ سالاسى وتە كۇردەلى ءارى قاۋىپتى. جوعارى تەحنولوگيالىق جابدىقتاردى باسقارۋدى, قاۋىپسىزدىك شارالارىن قاتاڭ ساقتاۋدى تالاپ ەتەدى. اۋا رايىنىڭ قولايسىزدىعىنان بولەك, تەحنيكالىق اقاۋ ءجيى بولىپ تۇرادى. مۇنداي كەزدە جوعارى بىلىكتىلىك پەن تاجىريبە قاجەت. كەز كەلگەن قاتەلىكتىڭ سوڭى اۋىر زارداپتارعا سوقتىرۋى مۇمكىن. كوگىلدىر وتىندى قاۋىپسىز پايدالانۋ, قاتەردىڭ الدىن الۋ شارالارىن ءتۇسىندىرۋ – ءبىزدىڭ جاۋاپكەرشىلىگىمىزدە», دەيدى گاز مامانى.
ول 2022 جىلى قىس قاتتى بولىپ, اپاتتى جاعداي جيىلەگەنىن ايتتى. ءبىر اۋىلدا اپات ورىن الىپ, زاقىمدالعان گاز قۇبىرىن جوندەۋگە كەتكەن بريگادا جولدا ساز بالشىققا باتىپ, تۇنىمەن بايلانىسسىز قالعان ەكەن.
«تەك تاڭەرتەڭ عانا ايدالادان, گاز قۇبىرى جانىندا توڭىپ قالعان ماماندارىمىزدى ارەڭ تاۋىپ, قۇتقارعان ەدىك. بۇعان قوسا كولىگىمەن جولدا قالىپ قويعان تاعى ءبىر وتباسىن ىزدەپ تاۋىپ, ماشينامەن اۋىلعا سۇيرەپ كەلگەنىم بار. حالىق اراسىندا جۇرگەن سوڭ, ءتۇرلى جاعداي بولىپ جاتادى. ءبىز 24/7 رەجىمىندە كۇنى-ءتۇنى ەل قىزمەتىندەمىز. «گاز ءوشتى» دەگەن نەمەسە باسقاداي حابارلاما تۇسسە بولدى, اۋا رايى نە باسقا جاعداي دەپ قاراپ تۇرماي, كەز كەلگەن تاۋەكەلگە بەل بۋىپ, اقاۋدى جوندەۋگە اتتانامىز. سوندىقتان ءوز ەڭبەگىمىزگە ادال پاتريوتپىز دەپ ايتا الامىن», دەيدى ينجەنەر.
ءيا, حالىقتى گازبەن جابدىقتاۋ سالاسى ماماندارىنىڭ قيىن دا جاۋاپتى جۇمىستارى كەيدە كوزگە كورىنبەي دە جاتاتىنى راس. الايدا قىستىڭ ۇسكىرىك ايازىنا, جازدىڭ اپتاپ ىستىعىنا قاراماستان ەلدى دەر كەزىندە كوگىلدىر وتىنمەن قامتاماسىز ەتۋ, سونداي-اق قاۋىپتىڭ وتىندە ءجۇرىپ, ءوز ءومىرىن قاتەرگە تىگە وتىرىپ, قىزمەت قىلۋ – ءوز ىسىنە بەرىك مامانداردىڭ قولىنان عانا كەلسە كەرەك.
«ادال ەڭبەك دەگەنىمىز – جاۋاپكەرشىلىكپەن, ۇقىپتىلىقپەن, شىنايىلىقپەن اتقارىلاتىن ءىس. كوكتەمگى سۋ تاسقىنى جۇمىستارىنا قوسقان ۇلەسىمدى باعالاپ, ماراپاتتاپ جاتقان پرەزيدەنتىمىز قاسىم-جومارت كەمەل ۇلىنا العىسىمدى بىلدىرەمىن جانە مۇنداي قۇرمەت ەڭبەك ادامىن قاناتتاندىراتىنىن ايتقىم كەلەدى», دەيدى كەيىپكەرىمىز.
مەملەكەت باسشىسى 2025 جىلدى «جۇمىسشى ماماندىقتارى جىلى» دەپ جاريالاعانى بەلگىلى. ەندەشە, الداعى جىلى قۇرىلىس, اۋىل شارۋاشىلىعى, ونەركاسىپ سياقتى كەز كەلگەن سالادا ايانباي ەڭبەك ەتىپ جۇرگەن جۇمىسشىلارعا ەرەكشە كوڭىل ءبولىنىپ, مارتەبەسى ارتاتىنى انىق. اسىرەسە, ارناۋلى كاسىپتىك ءبىلىمى بار جاستاردى مامانعا مۇقتاج ءتۇرلى سالاعا تارتسا, ەلىمىزدەگى جۇمىسسىزدىق ماسەلەسىنىڭ ءتۇيىنى شەشىلۋگە ءتيىس. ەڭ باستىسى, حالىققا پايداسىن تيگىزىپ جۇرگەن وسىنداي جانداردىڭ ەڭبەگى شىنايى ەلەنىپ-ەسكەرىلىپ, باعالانسا دەگەن يگى تىلەگىمىز بار.
