اكادەميانىڭ قالىپتاسۋ جانە دامۋ تاريحى مەملەكەتىمىزدىڭ تاريحىمەن تىعىز بايلانىستى. اكادەميا مەملەكەتتىك اپپاراتتا ادامي كاپيتالدى ارتتىرۋعا بارىنشا ۇلەس قوسىپ كەلەدى. رەكتور بۇگىنگى ءىس-شارا وقۋ ورداسى ءۇشىن تاريحي ءارى وتە ماڭىزدى ەكەنىن ايتتى.
«مەرەيتويلىق پوشتا ماركاسىن شىعارۋ – ءبىز ءۇشىن ەرەكشە ءارى العاش رەت بولىپ وتىر. بۇل اكادەميا ءۇشىن عانا ەمەس, ەلىمىزدىڭ مەملەكەتتىك باسقارۋ سالاسى ءۇشىن دە تاريحي وقيعا. اكادەميانىڭ مەملەكەتتىك باسقارۋ جۇيەسىندەگى ءرولى ەرەكشە. ءبىز تەك مەملەكەتتىك ورگاندارمەن عانا ەمەس, سونداي-اق ۇلتتىق كومپانيالارمەن, كۆازيمەملەكەتتىك ۇيىمدارمەن دە تىعىز بايلانىستامىز. ماقساتىمىز – پرەزيدەنتتىڭ الدىمىزعا قويعان ماقسات-مىندەتتەرىن ورىنداۋ, حالىقتىڭ ءال-اۋقاتىن جاقسارتۋ بويىنشا جۇمىس جۇرگىزۋ. سەرىكتەستىك اياسىندا اكادەميانىڭ اسسەسسمەنت-ورتالىعى وسى جىلى «قازپوشتا» قىزمەتكەرلەرىنىڭ قۇزىرەتتىلىكتەرىن انىقتادى. ارىپتەستىگىمىز ودان ءارى جالعاسادى دەگەن سەنىمدەمىن», دەدى ەرلان قۋانىش ۇلى.
«قازپوشتا» باسقارما توراعاسى اسەل جاناسوۆا اكادەميانى مەرەيتويىمەن قۇتتىقتاپ, ءىس-شارانىڭ ماڭىزدىلىعىن اتاپ ءوتتى.
«اكادەميا ەلىمىزدىڭ بولاشاعىنا, جاڭا فورماتسياداعى بەدەلدى كادرلاردى دايارلاۋداعى ۇلكەن قىزمەتتەرىڭىزدى باعالايمىز. بيىل ءبىز «قازپوشتا» قىزمەتكەرلەرىنىڭ بىلىكتىلىگىن ارتتىرۋدى باستادىق. اكادەميا ۇلكەن جەتىستىكتەرگە جەتە بەرسىن. پوشتا ماركاسى – تاريحتا قالاتىن دۇنيە. كەلەشەك ۇرپاق وسى پوشتا ماركالارى ارقىلى تاريحتى ەسكە الىپ وتىرادى. اكادەميانى بۇگىنگى تاريحي مەرەكەسىمەن قۇتتىقتايمىن. بولاشاقتا جەتىستىكتەرگە بىرگە جەتە بەرەيىك», دەدى اسەل جۇبانىشقىزى.
قولدانىسقا ەنگىزىلگەن ماركادا اكادەميا عيماراتى جانە كوك ءتۇستى 30 جىلدىق مەرەيتوي لوگوتيپى بەينەلەنگەن. ءبىر پاراعىندا 4 ماركاسى بار ەستەلىك پوشتا ماركاسى ءتورت بوياۋلى وفسەتتى باسپادا جاسالعان, پەرفوراتسياسى – جوتالى. ماركانىڭ نومينالى – 500 تەڭگە, تارالىمى – 5000 دانا. اكادەميانىڭ 30 جىلدىعىنا ارنالعان پوشتا ماركاسىن قولدانىسقا ەنگىزۋ راسىمىندە ەكى مەكەمە باسشىسى ارنايى پوشتالىق شتەمپەلمەن كونۆەرتكە ءمور باسىپ, قولىن قويدى.
