مۇنايلى ءوڭىر جۇرتشىلىعى تابىلدى دوسىموۆتىڭ شىعارماشىلىعىنا ارنالعان «سامالا سازدار ساعىمى» اتتى ءان بايقاۋىنا كۋا بولدى. بۇل بايقاۋعا اقتوبە, باتىس قازاقستان, ماڭعىستاۋ جانە اتىراۋ وبلىسىنان 19 ونەرپاز قاتىستى. ءتورت وڭىردەن جينالعان ونەرپازدار بايقاۋ شارتىنا سايكەس گيتارامەن ءان شىرقادى. بايقاۋدىڭ قورىتىندى كونتسەرتى ماحامبەت اتىنداعى اكادەميالىق قازاق دراما تەاترىندا ءوتتى. تەاتر زالى كورەرمەنگە لىق تولدى.
«ەلىنىڭ, ۇلتىنىڭ شىنايى پاتريوتى ەكەنىن ىسىمەن دە, اندەرىمەن دە دالەلدەگەن تابىلدى دوسىموۆتىڭ ارتىنا قالدىرعان مول مۇراسى – پوەزياسى مەن اندەرى. ونىڭ اندەرىن ناسيحاتتايتىن ءىزباسارلارى از ەمەس. بولاشاقتا شىعارمالارىن شىرقايتىن جاس ونەرپازدار كوبەيە تۇستەنىنە سەنەمىن. ويتكەنى ونىڭ اندەرىنىڭ استارىندا ومىرلىك ماقسات, فيلوسوفيالىق وي بار», دەدى وبلىس اكىمىنىڭ ورىنباسارى دارىن شامۇراتوۆ.
قازىلار القاسىنىڭ ۇيعارۋىمەن بايقاۋدىڭ ءبىرىنشى جۇلدەسىنە اتىراۋلىق ونەرپاز ءىزباسار ساميعوللاەۆ يە بولدى. ال ەكىنشى ورىنعا باتىس قازاقستان وبلىسىنىڭ وكىلى زيباتوللا ەشقاەۆ پەن جەرگىلىكتى ءانشى ورىنباسار جۇماحانوۆ لايىق دەپ تانىلدى. ءۇشىنشى جۇلدەنى اقتوبەدەن قاتىسقان باتىربەك امانقۇلوۆ پەن ماڭعىستاۋلىق سەرىكبول جەتىباەۆ, اتىراۋلىق ازامات جۇماعاليەۆ يەلەندى.
بايقاۋدىڭ قورىتىندى كونتسەرتىندە ۇلى ابىل اياش, ۇلتتىق ۇلان ءانسامبلىنىڭ ءانشىسى اسحات امىرعاليەۆ, بايقاۋ جۇلدەگەرلەرى مەن وزگە دە ونەرپازدار ءان شىرقادى. سونداي-اق تابىلدى دوسىموۆتىڭ ونەرى مەن شىعارماشىلىعى ارقاۋ ەتىلگەن «سامالا سازدار ساعىمى» كىتابى تانىستىرىلدى.
اتىراۋ وبلىسى
