فوتو:ت.تانىباەۆ
وتىرىستا بايانداما جاساعان تسيفرلىق دامۋ, يننوۆاتسيالار جانە اەروعارىش ونەركاسىبى ءبىرىنشى ۆيتسە-ءمينيسترى قانىش تولەۋشين «Astana Hub» IT-ستارتاپتار حالىقارالىق تەحنوپاركى مەن «يننوۆاتسيالىق تەحنولوگيالار پاركى» اۆتونومدى كلاستەرلىك قورىن بىرىكتىرۋدى زاڭنامالىق تۇرعىدان رەتتەۋ ۇسىنىلىپ وتىرعانىن اتاپ ءوتتى.
«بۇل شارالاردىڭ نەگىزگى ماقساتى – يننوۆاتسيالىق جانە اقپاراتتىق-كوممۋنيكاتسيالىق تەحنولوگيالاردىڭ ەكوجۇيەسىن دامىتۋ ءۇشىن سينەرگيانى كۇشەيتۋ. وسى بلوك شەڭبەرىندە «يننوۆاتسيالىق تەحنولوگيالار پاركى» بىرىڭعاي دەربەس كلاستەرلىك قورىندا وكىلەتتىكتەردى بىرىكتىرۋ, فۋنكتسيالاردى ناقتىلاۋ, نەگىزگى ۇعىمداردى تۇزەتۋ جانە باسقارۋدى وڭتايلاندىرۋ كوزدەلگەن. بارلىق وزگەرىس زاڭنامانى جاڭا قۇرىلىمنىڭ قاجەتتىلىكتەرىنە سايكەس كەلتىرۋگە باعىتتالعان. وسى بلوكتى ىسكە اسىرۋ قولداۋ قۇرالدارىن شوعىرلاندىرۋدى, قايتالاناتىن فۋنكتسيالاردى جويۋدى, 2025 جىلعا قاراي تيىمدىلىكتىڭ نەگىزگى كورسەتكىشتەرىنە قول جەتكىزۋدى قامتاماسىز ەتەدى جانە اقپاراتتىق تەحنولوگيالار سالاسىنداعى «Astana Hub» تابىستى تاجىريبەلەرىنىڭ شەڭبەرىن باسقا يننوۆاتسيالىق باعىتتارعا دەيىن كەڭەيتۋگە مۇمكىندىك بەرەدى», دەدى ق تولەۋشين.
ۆيتسە-ءمينيستردىڭ ايتۋىنشا, مەملەكەتتىك تاپسىرمانى ورىنداۋ ءۇشىن رەسپۋبليكالىق بيۋدجەتتەن بولىنگەن قاراجات پەن تەحنوپارك قاتىسۋشىلارىنان تۇسكەن الىمدار «Astana Hub»-تى قارجىلاندىرۋدىڭ نەگىزگى كوزدەرى بولىپ سانالادى. قور كوممەرتسيالىق ەمەس ۇيىم بولعاندىقتان, زاڭ جوباسى «الىمدار مەن تولەمدەر» تەرمينىن ولاردىڭ ناقتى ماقساتىن كورسەتەتىن «مۇشەلىك جارنالارعا» اۋىستىرۋدى ۇسىنادى. بۇل وزگەرىستەر ەلدىڭ مەملەكەتتىك تاپسىرماعا ارنالعان شىعىستارىن قىسقارتۋعا جانە «Astana Hub»-تىڭ ءوزىن-ءوزى اقتاۋىن قامتاماسىز ەتۋگە مۇمكىندىك بەرەدى. بۇل قاتىسۋشىلارعا تۇراقتى قولداۋ كورسەتۋگە جانە ەلدىڭ ەكوجۇيەسىن دامىتۋعا جول اشادى.
زاڭ جوباسىنىڭ تاعى ءبىر بولىگى اقپاراتقا جانە قولداۋ شارالارىنا ورتالىقتاندىرىلعان قولجەتىمدىلىكتى قامتاماسىز ەتۋگە, عالىمدار, يننوۆاتورلار, مەملەكەتتىك ورگاندار, بيزنەس, جەر قويناۋىن پايدالانۋشىلار جانە حالىقارالىق سەرىكتەستەر اراسىنداعى ءوزارا ءىس-ارەكەتتى كۇشەيتۋگە باعىتتالعان.
وتىرىستا ۆەنچۋرلىق كاپيتال نارىعىن ودان ءارى دامىتۋعا قاتىستى زاڭنامالىق باستامالار دا قاراستىرىلدى. ۆەنچۋرلىق قورلاردى بىرلەسىپ قارجىلاندىرۋ تيىمدىلىگىن ولاردىڭ اكتيۆتەرىنىڭ تابىستىلىعىنا, ياعني جوبالار پورتفەلىنە نەگىزدەلگەن باعالاۋ ماڭىزدى نورما رەتىندە ەنگىزىلمەك. بۇل وتاندىق يننوۆاتسيالىق ساياساتتى دامىعان ەكونوميكالاردىڭ تاجىريبەلەرىمەن سالىستىرۋعا, ونىڭ كۇشتى جانە ءالسىز جاقتارىن انىقتاۋعا, ستارتاپتار مەن يننوۆاتسيالاردى قولداۋدى كۇشەيتۋگە جانە جوعارى تەحنولوگيالىق سالالارعا قوسىمشا ينۆەستيتسيا تارتۋعا مۇمكىندىك بەرەدى.
تالقىلاۋ بارىسىندا دەپۋتاتتار وتاندىق جانە حالىقارالىق IT-كومپانيالار ءۇشىن «Astana Hub» رەزيدەنتتەرىنە ارنالعان سالىق جەڭىلدىكتەرى, ۆەنچۋرلىق قورلاردى دامىتۋ, تەحنوپاركتىڭ تيىمدىلىگى جانە باسقا دا ماسەلەلەرگە نازار اۋداردى.
وتىرىس بارىسىندا «Astana Hub» تەحنوپاركى قىزمەتىنىڭ اشىقتىعىنا قاتىستى بىرقاتار ەسكەرتۋ ايتىلدى. دەپۋتات اناس باققوجاەۆتىڭ ايتۋىنشا, تەحنوپارك شامامەن 10 جىل بۇرىن قۇرىلعانىمەن, وسى ۋاقىت ىشىندە قويىلعان مىندەتتەر ورىندالماعان. بۇل سۇراققا جاۋاپ بەرگەن قانىش تولەۋشين قازىرگى ۋاقىتتا «Astana Hub»-تا 1,5 مىڭ رەزيدەنت جۇمىس ىستەيتىنىن, ونىڭ 400-ءى شەتەلدىك كومپانيالار ەكەنىنە توقتالدى. تەحنوپاركتى قولداۋعا جىل سايىن شامامەن 4 ميلليارد تەڭگە بولىنەدى, ونىڭ جارتىسى جالعا الۋ اقىسىن وتەۋگە جۇمسالادى.
«ەگەر ءبىز جۇمىس ورىندارىن قۇرۋ, الەۋمەتتىك سالىقتاردى تولەۋ, IT سالاعا ينۆەستيتسيالار تارتۋ, ەكسپورت سياقتى قىزمەت ناتيجەلەرىنە قاراساق, قازاقستان وڭ ناتيجە كورسەتىپ وتىر», دەدى ق. تولەۋشين.
جيىن بارىسىندا ايتىلعان ۇسىنىستار دەپۋتات ايتۋار قوشمامبەتوۆ جەتەكشىلىك ەتەتىن جۇمىس توبىندا قارالادى.
