– ەرلان قۋانىش ۇلى, مەملەكەتتىك باسقارۋ اكادەمياسى مەملەكەتتىك قىزمەتشىلەردىڭ بىلىكتىلىگىن ارتتىرۋدا قانداي ستراتەگيالىق باعىتتاردى نەگىزگە الادى؟
– مەملەكەتتىك قىزمەت ىستەرى اگەنتتىگىنىڭ ۆەدومستۆولىق باعىنىستى ۇيىمى رەتىندە اكادەميا مەملەكەتتىك قىزمەتتى دامىتۋعا جانە مەملەكەتتىك اپپاراتتا ادامي كاپيتالدى ارتتىرۋعا بارىنشا ۇلەس قوسىپ كەلەدى. پرەزيدەنت قاسىم-جومارت توقاەۆ مەملەكەتتىك قىزمەت ىستەرى سالاسىندا جۇيەلى تۇردە جۇزەگە اسىرۋعا تيەسىلى بىرقاتار تاپسىرما جۇكتەدى. اسىرەسە «ادىلەتتى قازاقستان – ادال ازامات» قاعيداتىن ىلگەرىلەتۋدە مەملەكەتتىك قىزمەتشىلەردىڭ بويىندا ادىلدىك, ادالدىق, مەملەكەتشىلدىك سەكىلدى قاسيەتتەردى ورنىقتىرۋ ءىسىن ەرەكشە اتاپ ءوتتى. مەملەكەتتىك باسقارۋ اكادەمياسى ءدال وسى تاپسىرمالار نەگىزىندە وقۋ باعدارلامالارىن جۇيەلەيدى.
اكادەميا جەكە ادامعا دەگەن قۇرمەت, ادەپتىلىك, اشىقتىق, كاسىپقويلىق, جاڭاشىلدىق سياقتى قۇندىلىقتاردى العا تارتادى. سونداي-اق مەملەكەتتىك قىزمەتشىلەردىڭ بويىندا «ادال ازامات» يدەالىنا ساي كەلەتىن كاسىبي جانە تۇلعالىق قاسيەتتەردى قالىپتاستىرۋ جولىندا ءبىلىم الۋشىلارمەن جان-جاقتى جۇمىس جۇرگىزەدى. وقۋ بارىسىندا جالپىۇلتتىق قۇندىلىقتاردى باسشىلىققا الامىز جانە مەملەكەتتىك قىزمەتشىلەردىڭ ادەپ قاعيدالارىن ۇستانۋىنا كوڭىل بولەمىز.
پاتريوتيزم, ادىلەتتىلىك جانە كاسىبيلىك تۋرالى ايتىپ قانا قويماي, وسى قاعيداتتاردى ءىس جۇزىندە قولدانۋ ماڭىزدى. اكادەميادا وقىپ جۇرگەندە مەملەكەتتىك قىزمەتشىلەر وسى قۇندىلىقتار ساقتالاتىن ورتاعا تۇسەدى. ۇجىمدىق مادەنيەتىمىزدى سەزىنگەن تىڭداۋشىلار ءبىلىم مەن قۇزىرەتتىلىگىن دامىتىپ, كەيىن قۇندىلىقتارىمىزدى ءوز ۇجىمىنا تاراتاتىنى قۋانتادى.
بۇگىندە مەملەكەتتىك قىزمەتشىلەر اقپاراتتىق تەحنولوگيانى جەتىك مەڭگەرىپ, مەملەكەت پەن قوعام مۇددەسىن قورعاۋدا جانە حالىققا قىزمەت كورسەتۋدە كاسىبيلىگىن كورسەتە بىلۋگە ءتيىس. سايكەسىنشە قاجەت قۇندىلىقتار مەن قاعيداتتاردى بەلگىلى ءبىر ۋاقىت شەڭبەرىندە قايتا قاراۋ, مەملەكەتتىك مىندەتتەردى قوعام كۇتەتىن تالاپ-تىلەكتەرگە ساي جۇزەگە اسىرۋ بيلىك پەن قوعام اراسىنداعى ءوزارا سەنىمدى ارتتىرادى. بۇل – مەملەكەتتىك باسقارۋدىڭ «ادامعا باعدارلانعان» مودەلىن قالىپتاستىرۋ ءۇردىسى.
– اكادەمياعا ۇمىتكەرلەردى ىرىكتەۋ قالاي جۇرگىزىلەدى؟ جىل سايىن قانشا گرانت بولىنەدى؟
– جان-جاقتى دامىعان, باسەكەگە قابىلەتتى, قاجەتتى قۇزىرەتتەرى بار, ويى تەرەڭ, ستراتەگيالىق جانە سىني ويلاۋدى مەڭگەرگەن مامانداردى مەملەكەتتىك قىزمەتكە تارتۋ – مەملەكەتتىك باسقارۋ اكادەمياسىنىڭ باستى ماقساتتارىنىڭ ءبىرى. اكادەميا مەملەكەتتىك قىزمەتشىلەردى وقىتۋدا 14 قۇزىرەتتىلىكتى باسشىلىققا الادى. قازىر اكادەميا مەملەكەتتىك اپپاراتتى كاسىبيلەندىرۋ ماقساتىندا ۇلگىلىك بىلىكتىلىك تالاپتارىندا كورسەتىلگەن قۇزىرەتتەر بويىنشا 100-دەن اسا بىلىكتىلىكتى ارتتىرۋ كۋرستارىن ۇسىنادى. 8 ماگيسترلىك جانە 3 دوكتورلىق ءبىلىم بەرۋ باعدارلاماسىن جۇزەگە اسىرادى. جىل سايىن ۇكىمەت قاۋلىسىمەن مەملەكەتتىك تاپسىرىس نەگىزىندە 132 گرانت بەرىلەدى, ونىڭ 120-سى – ماگيستراتۋرا, 12-ءسى – دوكتورانتۋرا.
مەملەكەتتىك قىزمەتتى كاسىبيلەندىرۋ ماقساتىندا قابىلداۋ ەرەجەلەرىن زامان تالابىنا ساي جاڭارتىپ وتىرامىز. ۇمىتكەرلەرگە نەگىزىنەن ءۇش تالاپ قويىلادى. بىرىنشىدەن, مەملەكەتتىك تاپسىرىس نەگىزىندە تەك قاتارداعى مەملەكەتتىك قىزمەتشىلەر كونكۋرسقا قاتىسا الادى جانە ولاردىڭ مەملەكەتتىك قىزمەتتەگى ەڭبەك ءوتىلى كەمىندە ەكى جىلدان تومەن بولماۋى كەرەك. كەي ماماندىقتار ءۇشىن كەمىندە بەس جىلدىق تاجىريبە جانە باسشىلىق لاۋازىمدا بولۋى سۇرالادى. ەكىنشىدەن, مەملەكەتتىك ءتىلدى ءبىلۋ دەڭگەيى كەم دەگەندە ۆ1-دەن تومەن بولماۋى قاجەت. بۇل تالاپتى 2021 جىلدان بەرى ۇستانىپ كەلەمىز. ۇشىنشىدەن, مەملەكەتتىك ورگاننان مىندەتتى تۇردە مەملەكەتتىك قىزمەتشىنى وقۋعا جىبەرگەنى جونىندە جولدامانىڭ بولۋى شارت.
ماگيستراتۋراعا تۇسەم دەگەن ۇمىتكەرلەر ءۇشىن ىرىكتەۋ كەزەڭدەرى ەكى كەزەڭنەن تۇرادى – بەلگىلەنگەن ۋاقىت ىشىندە تالاپتارعا ساي اناليتيكالىق جازبا جازۋ جانە ساراپشىلاردىڭ الدىندا سۇحباتتاسۋدان ءوتۋ. دوكتورانتۋراعا باعدارلامالارىنا قوسىمشا زەرتتەۋ تاقىرىبىنىڭ نەگىزدەمەسى تالاپ ەتىلەدى.
بيىل ماگيستراتۋراعا تۇسكەندەردىڭ ورتا جاسى – 34, ال دوكتورانتۋرادا – 39. ورتاشا مەملەكەتتىك قىزمەتتەگى ەڭبەك ءوتىلى – 10 جىل. قابىلدانعانداردىڭ كوپشىلىگى – باسشىلىق لاۋازىمداعى تۇلعالار, 60%-عا جۋىعى – وڭىردەن كەلگەندەر.
بۇعان قوسا مەملەكەتتىك بيۋدجەت ەسەبىنەن قارجىلاندىرىلاتىن ۆەدومستۆولىق باعىنىستى ۇيىمداردان, كۆازيمەملەكەتتىك سەكتوردان, ءماسليحاتتاردان, مەملەكەتتىك ەمەس ۇيىمداردان وقۋعا تۇسۋگە ۇسىنىستار جىل سايىن ارتىپ كەلەدى. اۋديتوريادا مەملەكەتتىك قىزمەتشىلەرمەن بىرگە بيزنەسپەن اينالىساتىن, مەملەكەتتىك ەمەس ۇيىمدا, كۆازيمەملەكەتتىك سەكتوردا قىزمەت ەتەتىن تاجىريبەسى بار ماماندار ءبىلىم العانى دۇرىس دەپ ەسەپتەيمىز. وقۋ بارىسىنداعى پىكىرتالاستار بيلىك تارماقتارىندا قىزمەت ەتەتىن ازاماتتاردىڭ كوزقاراسىنا وڭ اسەر ەتەدى.
جىلدىڭ اياعىندا جانە ورتاسىندا «مەملەكەتتىك باسقارۋ» جانە «وڭىرلىك دامۋ» مودۋلدىك باعدارلامالار بويىنشا قوسىمشا وقۋعا قابىلداۋ جۇرگىزىلەدى. مودۋلدىك وقىتۋ نەگىزگى جۇمىستان قول ۇزبەي ءوز قۇزىرەتتەرىن ارتتىرعىسى كەلەتىن ازاماتتارعا ارنالعان. وقۋ جىلى 6 مودۋلدەن تۇرادى. ءاربىر مودۋلدە وفلاين جانە قاشىقتان وقىتۋ فورماتتارى قاراستىرىلعان. مۇنداي ءتاسىل ءبىلىم الۋشىلارعا وقۋ ماتەريالدارىن ارنايى كەستە بويىنشا ىڭعايلى تۇردە يگەرۋگە مۇمكىندىك بەرەدى. مودۋلدىك ماگيستراتۋراعا مەملەكەتتىك قىزمەتشىلەر, مەملەكەتتىك بيۋدجەت ەسەبىنەن قارجىلاندىرىلاتىن ۆەدومستۆولىق باعىنىستى ۇيىمداردىڭ وكىلدەرى, كۆازيمەملەكەتتىك سەكتور ماماندارى, سونداي-اق ءماسليحات دەپۋتاتتارى قۇجاتتارىن تاپسىرىپ, كونكۋرسقا قاتىسا الادى.
– مەملەكەتتىك قىزمەتشىلەردىڭ تۇلعالىق بولمىسىن جەتىلدىرۋدە قانداي تاريحي تۇلعالاردىڭ ەڭبەكتەرىنە باسا ءمان بەرەسىزدەر؟
– مەملەكەتتىك ورگانداردا قىزمەت ەتەتىن ازاماتتاردىڭ تۇلعالىق بولمىسىن جەتىلدىرۋگە قاتىستى الەمدىك تاجىريبە نە بارشاعا ورتاق قابىلدانعان ستاندارت جوق. ماسەلەن, ءبىر مەملەكەتتىڭ قۇندىلىعى, بولمىسى, ۇستانىمى سىندى مودەل نە كونتسەپتسيالار وزگە ءبىر ەلدىڭ باسقارۋ جۇيەسىنە كەلمەۋى مۇمكىن. دەمەك مەملەكەتتىك قىزمەتتىڭ ءبىرتۇتاس جانە وڭتايلى نەگىزىن جاساۋدا ءار ۇلتتىڭ تاريحى, مادەنيەتى, وزىندىك ەرەكشەلىكتەرى ەسكەرىلەدى.
ەل تاريحىندا حالىقتىڭ بولاشاعى ءۇشىن ايانباي ەڭبەك ەتىپ, قوعامعا قىزمەت ەتۋدىڭ تاماشا ۇلگىسىنە اينالعان تۇلعالار از ەمەس. كەيىنگى جىلدارى «مەملەكەتتىك باسقارۋ» پانىندە ۇلى دالا تاريحىندا بيلىك قۇرعان كوشباسشىلاردىڭ باسقارۋ جۇيەسى, ءداستۇرى, مادەني, الەۋمەتتىك-تاريحي فاكتورلار, ۇلتتىق قۇندىلىقتار وقىتىلىپ ءجۇر. وقۋ باعدارلاماسىندا تۇلعالىق بولمىستىڭ ادامگەرشىلىك, اردان اتتاماۋ, ادىلەتتىلىك قىرىن اشۋدا دانىشپان ويشىل ءابۋ ناسىر ءال-ءفارابيدىڭ ەڭبەكتەرىنە يەك ارتامىز. كۇنى بۇگىنگە دەيىن عۇلامانىڭ كەمەل تۋىندىلارىنىڭ ءبىرى «قايىرىمدى قالا تۇرعىندارىنىڭ كوزقاراستارى جونىندەگى تراكتاتى» وزەكتىلىگىن جويعان جوق. ونىڭ ايتقان يدەيالارى رۋحاني تازالىق پەن ادىلدىككە, وسكەلەڭ ۇرپاقتى تاربيەلەۋدە بولاشاقتا دا قۇندى قۇرال بولاتىنى انىق.
سونداي-اق اكادەميا تىڭداۋشىلاردىڭ بويىنان اباي قۇنانباي ۇلى بەينەلەگەن «ىستىق قايرات, نۇرلى اقىل, جىلى جۇرەك» كورىنىس تابۋى قاجەت دەپ ەسەپتەيدى. بۇل قاسيەتتەر مەملەكەتتىك قىزمەتشىلەردىڭ ءاردايىم ەلدىك مۇراتتى بيىك قويا بىلۋگە تاربيەلەيدى. اسىرەسە اقىننىڭ مەملەكەت باسشىسى ماقالالارىندا ەرەكشە اتاپ وتكەن «تولىق ادام» كونتسەپتسياسى تۇلعالىق بولمىستى جەتىلدىرۋدە نەگىزگى باعدارعا اينالدى.
مەملەكەتشىل تۇلعالاردى قالىپتاستىرۋدا كورنەكتى الاش قايراتكەرلەردىڭ ەڭبەك جولدارى, ۇستانىمدارى مەملەكەتتىك قىزمەتشىلەردىڭ سانالى تۇرعىدان جاڭعىرۋىنا سەپتىگىن تيگىزەدى.
– جەمقورلىق تۋرالى دارىستەر قانشالىقتى ءجيى وقىتىلادى؟
– ەلىمىزدەگى كۇردەلى ماسەلەلەردىڭ ءبىرى سىبايلاس جەمقورلىقپەن كۇرەس بەلسەندى جۇرگىزىلىپ جاتىر. بۇل باعىتتا مەملەكەتتىك قىزمەت ىستەر اگەنتتىگى جانە سىبايلاس جەمقورلىققا قارسى اگەنتتىكپەن بىرلەسە جۇمىس اتقارىپ كەلەمىز. تاۋەكەلدەردى باسقارۋ مەن ۇجىمنىڭ ىشكى ۇردىستەرىن تسيفرلاندىرۋ ارقىلى سىبايلاس جەمقورلىقتى بولدىرماۋ ءۇشىن ارنايى ءىس-شارالار جوسپارىن جاساقتادىق. وقۋ بارىسىندا مەملەكەتتىك قىزمەتشىلەرگە ادەپ كودەكسىن ۇستانۋدى, كەلەڭسىز جاعدايلاردى بولدىرماۋ ءۇشىن ونىڭ ەرەجەلەرىن ۇنەمى نەگىزگە الۋدى ءجىتى ءتۇسىندىرىپ, ايتىپ ءجۇرمىز. سىبايلاس جەمقورلىققا قارسى ءىس-قيمىل تۋرالى زاڭناماسى شەڭبەرىندە اكادەميا كۆازيمەملەكەتتىك سەكتور سۋبەكتىلەرىنە «تسيفرلىق كومپلاەنس» اقپاراتتىق جۇيەسىن قولدانۋ ارقىلى «قر ست ISO 37001 پاراقورلىقپەن كۇرەس مەنەدجمەنت جۇيەسى» ستاندارتىن ۇيىمدارعا ەنگىزۋ بويىنشا قىزمەت كورسەتەمىز.
مەملەكەتتىك قىزمەتشىنىڭ سانالى جاڭعىرۋىنداعى باستى ۇستانىمنىڭ ءبىرى – اشىقتىق. بۇل بيۋروكراتياعا, سوزبۇيداعا جول بەرمەۋ ءارى ولقىلىق بولعان جاعدايدا شىنايى بولۋعا تاربيەلەيدى. اكادەمياداعى وقۋ باعدارلامالارى ازاماتتارعا وسى قاعيداتتى ءوز مادەنيەتىمەن, ءجۇرىس-تۇرىسىمەن كورسەتۋگە ۇگىتتەيدى. كەز كەلگەن دۇنيەنى اشىق تۇردە شەشۋ دە سىبايلاس جەمقورلىقتىڭ الدىن الادى.
– مەملەكەتتىك قىزمەتكەرلەر اراسىندا ءالى كۇنگە دەيىن باق وكىلدەرىمەن, قوعاممەن دۇرىس كوممۋنيكاتسيا ورناتا الماي جۇرگەندەر بار. بۇل ماسەلەنى شەشۋدە اكادەميا قانداي ءىس-شارالاردى قولعا الدى؟
– «حالىق ۇنىنە قۇلاق اساتىن مەملەكەت» تۇجىرىمداماسى حالىقپەن ەتەنە بايلانىستا جۇمىس ىستەۋدى تالاپ ەتەدى. ەلىمىز نەگىزگە الىپ, جۇرگىزىپ وتىرعان ساياساتتى جەتكىزۋشى – مەملەكەتتىك قىزمەتشىلەر. ياعني بيلىك جۇيەسىندە ەڭبەك ەتەتىن ازاماتتارعا جاۋاپكەرشىلىكتىڭ سالماعى ارتىپ كەلەدى.
اكادەميادا مەملەكەتتىك قىزمەت ىستەرى اگەنتتىگى قولداۋىمەن مەملەكەتتىك قىزمەتشىلەردىڭ كوممۋنيكاتيۆتىك داعدىلارىن ارتتىرۋ, باق-قا سۇحبات بەرۋ, بەينەكامەرا الدىندا ءوزىن ەركىن ۇستاۋ سياقتى داعدىلارىن ارتتىرۋ ماقساتىندا ارنايى مەديا-ستۋديا اشىلدى. قازىرگى تاڭدا ستۋديادا كاسىبي جۋرناليستەر, كوممۋنيكاتسيا ماماندارى مەملەكەتتىك قىزمەتشىلەرگە پراكتيكالىق ساباقتار وتكىزىپ ءجۇر.
بۇل ءۇردىس تەك ەلوردادا ەمەس, وبلىستاعى فيليالدارىمىزدا دا بار. وڭىرلەردە پراكتيكالىق ساباقتار كوشپەلى فورماتتا تەلەارنالاردىڭ ايماقتاعى فيليالدارىندا وتكىزىلەدى. بايقاعانىمىز, بۇعان مەملەكەتتىك قىزمەتشىلەر تاراپىنان دا قىزىعۋشىلىق كوپ. ولاردىڭ كوپشىلىك الدىندا سويلەۋ مادەنيەتىن, كوممۋنيكاتسيا نەگىزدەرىن مەڭگەرسەك دەگەن تالپىنىسى وتە جوعارى.
– اكادەميادا شەتەلدىك ساراپشىلاردىڭ قاتىسۋىمەن سەمينار-ترەنينگتەر وتكىزىلە مە؟
– قازىرگى كەزدە 100-دەن اسا سەمينار-ترەنينگ وقۋ باعدارلامالارى جاساقتالدى. بىلىكتىلىكتى ارتتىرۋ مەملەكەتتىك تاپسىرىس, ۇيىمدىق تاپسىرىس جانە حالىقارالىق ارىپتەستەردىڭ ۇسىنىسى بويىنشا ۇيىمداستىرىلادى. كوپ جاعدايدا سەمينار-ترەنينگتەر, ۆوركشوپتارعا وتاندىق ساراپشىلاردى تارتامىز. قازىرگى ۋاقىتتا اكادەميادا عالىمدارمەن قاتار پارلامەنت دەپۋتاتتارى, مەملەكەتتىك ورگاندار مەن ولاردىڭ قۇرىلىمدىق بولىمشەلەرىنىڭ باسشىلارى, قوعام قايراتكەرلەرى مەن ساراپشىلار, پراكتيك ماماندار ءدارىس وقيدى. ەگەر مەملەكەتتىك ورگانداردان تاقىرىپ اياسىندا شەتەلدىك ساراپشىلاردى دا شاقىرۋ ۇسىنىسى بولسا, ونى دا قاراستىرامىز.
جالپى, جىلىنا اكادەميا مەن فيليالدارىمىزدا 23 مىڭعا جۋىق مەملەكەتتىك قىزمەتشى قىسقامەرزىمدى سەمينار-ترەنينگتەردەن وتەدى. ولار ءبىر كۇننەن ءۇش اپتاعا دەيىن سوزىلادى. شەتەلدىك ساراپشىلاردى شاقىرۋ بويىنشا ارنايى قاراجات بار. سونىڭ اياسىندا جىل سايىن 3-5 كۇندىك 10 سەمينار وتكىزەمىز. تاقىرىپتارى مەملەكەتتىك ورگانداردىڭ ۇسىنىسى نەگىزىندە جاسالادى.
ەۋروپا وداعىنىڭ ساراپشىلارى ءجيى كەلەدى. جاقىندا سينگاپۋردان, وڭتۇستىك كورەيادان ماماندار سەمينار وتكىزدى. وندا تسيفرلاندىرۋ, جاساندى ينتەللەكت, توپپەن جۇمىس ىستەۋ, ايەل كوشباسشىلىعى تاقىرىپتارى بويىنشا وقىتۋلار وتكىزىلدى. جاقىندا سۋ رەسۋرستارى جانە يرريگاتسيا مينيسترلىگى جانە نيدەرلاند ەلشىلىگىمەن بىرلەسە وتىرىپ ءبىر جەتىلىك ترەنينگ-سەمينار ۇيىمداستىردىق.
اكادەميا وقۋ ۇردىسىندە مەملەكەتتىك تىلگە باسا نازار اۋدارىپ كەلەدى. اۋديتورياداعى جۇمىستىڭ 50%-ى قازاق, ال اعىلشىن جانە ورىس تىلدەرىندە 25%-دان وتەدى.
– جىلىنا اكادەميادا قانشا مەملەكەتتىك قىزمەتشى ديپلوم الادى؟
– 30 جىلدا مەملەكەتتىك باسقارۋ اكادەمياسى 3 مىڭنان اسا مەملەكەتتىك قىزمەتشىنى ماگيستراتۋرا جانە دوكتورانتۋرا بويىنشا وقىتتى. بۇگىندە ولاردىڭ كوپشىلىگى – جوعارى ساياسي, اتقارۋشى جانە زاڭ شىعارۋشى ورگانداردا قىزمەتتە. كەيبىر تۇلەكتەرىمىز مەملەكەتتىك ەمەس ۇيىمداردا, كۆازيمەملەكەتتىك سەكتوردا جۇمىسىن جالعاستىرىپ جاتىر.
وقۋ ورداسى وسى جىلدار ارالىعىندا مەملەكەتتىك اپپاراتتى كاسىبيلەندىرۋ جانە باسەكەگە قابىلەتىن ارتتىرۋ جولىندا اۋقىمدى جۇمىس اتقاردى. پرەزيدەنتتىك جاستار كادرلىق رەزەرۆىندە 34-ءى اكادەميا تۇلەگى بولسا, وڭىرلىك كادرلىق رەزەرۆتە 31 تۇلەگى بار.
– مەملەكەتتىك باسقارۋ اكادەمياسىنىڭ تاعى قانداي جاڭاشىلدىقتارى بار؟
– مەملەكەتتىك باسقارۋداعى وزىق تاجىريبەلەردى ەنگىزۋ مەن دامىتۋ جولىندا ءبىز ارقاشان ىزدەنە بەرەمىز. ءبىلىم باعدارلامالارىمىز حالىقارالىق اككرەديتتەۋدەن ءوتىپ, ءبىلىم الۋشىلاردىڭ شەتەلدە جەتەكشى جوعارى وقۋ ورىندارىندا تاعىلىمدامادان ءوتۋى, شەتەلدىك سەرىكتەستەرمەن عىلىمي-زەرتتەۋ جوبالارىن جۇزەگە اسىرۋىمىز – اكادەميانىڭ حالىقارالىق ارەناداعى ءرولىن نىعايتتى. «بولاشاق» باعدارلاماسى بويىنشا اكادەميانىڭ قىزمەتكەرلەرى اقش-تا جانە ەۋروپا ەلدەرىندە تاعىلىمدامادان ءوتتى. 2024 جىلى اكادەميادا ادامي رەسۋرستاردى باسقارۋ ينستيتۋتى قۇرىلدى. وسى جىلى «Qazaq Resmi Test» ونلاين-تەستىلەۋ جۇيەسى «بولاشاق» ستيپەندياسى ءۇشىن قولجەتىمدى بولدى.
مەملەكەتتىك ورگانداردىڭ سۇرانىسى بويىنشا ءبىز جوبالىق باسقارۋدى ەنگىزۋ, بيزنەس-پروتسەستەردى وڭتايلاندىرۋ جانە رەينجينيرينگ, سىبايلاس جەمقورلىققا قارسى ستاندارتتى ەنگىزۋ, پەرسونالدىڭ HR سەرتيفيكاتى جانە ت.ب. بويىنشا كونسالتينگتىك قىزمەتتەر كورسەتەمىز. اكادەميا ەلىمىز بويىنشا ۇلتتىق ستاندارتتارعا سايكەس ادامي رەسۋرستاردى باسقارۋ جانە جوبانى باسقارۋ بويىنشا پەرسونالدىڭ سايكەستىگىن راستايتىن جالعىز اككرەديتتەلگەن ورگان مارتەبەسىنە يە بولدى. سونداي-اق بىزدە PRINCE2 جوبالارىن باسقارۋدىڭ بريتاندىق ءادىسى بويىنشا وقىتۋ جانە سەرتيفيكاتتاۋعا دايىندىق بويىنشا اككرەديتاتسيا بار.
اكادەميا كۆازيمەملەكەتتىك جانە جەكە سەكتور ۇيىمدارىنىڭ كومپلاەنس قىزمەتتەرى ءۇشىن ادىستەمەلىك ۇسىنىمدار ازىرلەدى. 20-دان اسا ۇيىمعا ISO 37001 حالىقارالىق ستاندارتى بويىنشا ءاۋديتتى ەنگىزۋ جانە ءوتۋ بويىنشا ادىستەمەلىك قولداۋ كورسەتتىك. كەلەشەكتە سىبايلاس جەمقورلىققا قارسى ستاندارتتىڭ ۇلتتىق سەرتيفيكاتى بويىنشا قۇقىق الۋدى جوسپارلاپ وتىرمىز.
الداعى ۋاقىتتا دا اكادەميامىز مەملەكەتتىڭ دامۋى مەن حالىقتىڭ يگىلىگى جولىندا قىزمەت ەتە بەرەتىنىنە سەنىمىم مول. اكادەميانىڭ الداعى قىزمەتى مەملەكەتتىك قىزمەتتى دامىتۋدىڭ 2029 جىلعا دەيىنگى تۇجىرىمدامانى ىسكە اسىرۋعا باعىتتالادى.
– اڭگىمەڭىزگە راحمەت.
اڭگىمەلەسكەن –
زەيىن ەرعالي,
«Egemen Qazaqstan»
