سۋرەت: gov.kz
كونفەرەنتسيانىڭ اشىلۋىندا پرەزيدەنت كەڭسەسىنىڭ باسشىسى باقىتجان ساريەۆ مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدى.
«30 جىل ۋاقىت ارالىعىندا اكادەميا ەلىمىزدىڭ ءبىلىم جۇيەسىندەگى بەدەلدى وقۋ ورىندارىنىڭ بىرىنە اينالدى. مەملەكەتتىك قىزمەتشىلەردىڭ بىلىكتىلىگىن شىڭداۋ ءىسىن جەتىلدىرىپ, ونى جاڭا دەڭگەيگە كوتەردى. وزىق ويلى, وتانشىل ءارى كاسىبي ماماندار دايارلاۋدىڭ وزىندىك ءداستۇرىن قالىپتاستىردى. ەل مۇددەسىن بارىنەن بيىك قويىپ, ادىلەتتى قازاقستاندى قۇرۋعا اتسالىسۋ – ءاربىر مەملەكەتتىك قىزمەتشىنىڭ مىندەتى. ولاردىڭ ادال, جاڭاشىل ءارى جاسامپاز بولۋى اسا ماڭىزدى. اكادەميا وسى اسىل قاسيەتتەردى ءار تۇلەكتىڭ بويىنا ءسىڭىرىپ, مەملەكەتشىل مامانداردىڭ جاڭا بۋىنىن تاربيەلەۋگە زور ۇلەس قوسىپ كەلەدى. مۇنىڭ ءبارى وقىتۋشىلار قاۋىمىنىڭ ەسەلى ەڭبەگىنىڭ ناتيجەسى ەكەنى ءسوزسىز. ءبىلىم ورداسىنىڭ ۇجىمى الداعى ۋاقىتتا دا ەل يگىلىگىنە قىزمەت ەتە بەرەدى دەپ سەنەمىن», دەلىنگەن پرەزيدەنت قۇتتىقتاۋىندا.
كونفەرەنتسيانىڭ پلەنارلىق وتىرىسىندا ورتالىق سايلاۋ كوميسسياسىنىڭ توراعاسى نۇرلان ءابدىروۆ, قوعام قايراتكەرى جاقسىبەك قۇلەكەەۆ, استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ, مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, عىلىم جانە جوعارى ءبىلىم ءمينيسترى ساياسات نۇربەك, بريۋسسەل ديپلوماتيالىق اكادەمياسىنىڭ ديرەكتورى (بەلگيا) گيۋنتەر گوبلوم قۇتتىقتاۋلارىن جەتكىزدى.
«سەرۆيستىك جانە كليەنتكە باعدارلانعان مەملەكەتتىك قىزمەتتى قالىپتاستىرۋ» سەكتسياسىندا ازاماتتارمەن ءوزارا ءىس-قيمىلدىڭ سەرۆيستىك مودەلى, مەملەكەتتىك قىزمەتتەردى ازاماتتاردىڭ جەكە قاجەتتىلىكتەرىنە بەيىمدەۋ ماسەلەلەرى تالقىلاندى. ال اكادەميا رەكتورى ەرلان ءابىل وقۋ ورداسىنىڭ جەتىستىكتەرىنە قىسقاشا توقتالدى. ونىڭ ايتۋىنشا, اكادەميا ەلىمىز بويىنشا ۇلتتىق ستاندارتتارعا سايكەس ادامي رەسۋرستاردى باسقارۋ جانە جوبانى باسقارۋ بويىنشا پەرسونالدىڭ سايكەستىگىن راستايتىن جالعىز اككرەديتتەلگەن ورگان مارتەبەسىن يەلەنگەن.
سونداي-اق سەكتسياعا شەتەلدىك سەرىكتەستەر, مەملەكەتتىك باسقارۋ اكادەميالارىنىڭ رەكتورلارى, بۋرگاس ايماعىنىڭ گۋبەرناتورى (بولگاريا) ماريا نەيكوۆا, مۇحاممەد بەن راشيد اتىنداعى مەملەكەتتىك باسقارۋ مەكتەبىنىڭ اتقارۋشى پرەزيدەنتى ء(باا) الي بين سەباا ال-مارري, كل. وحريد اتىنداعى سوفيا ۋنيۆەرسيتەتىنىڭ رەكتورى (بولگاريا) گەورگي ۆلچەۆ, قىرعىز رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى المازبەك اقماتاليەۆ, ارمەنيا پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى حاچاتۋر كازەيان, تاجىكستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى سافارزودا داۆرون دجۋراحون, رەسەي فەدەراتسياسى پرەزيدەنتىنىڭ جانىنداعى حالىق شارۋاشىلىعى جانە مەملەكەتتىك قىزمەت اكادەمياسىنىڭ پرورەكتورى اندرەي مارگولين, ورال فەدەرالدى ۋنيۆەرسيتەتىنىڭ مەملەكەتتىك باسقارۋ جانە كاسىپكەرلىك مەكتەبىنىڭ ديرەكتورى (ەكاتەرينبۋرگ) الەكسەي كليۋەۆ, ميكولاس رومەريس ۋنيۆەرسيتەتىنىڭ مەملەكەتتىك باسقارۋ ينستيتۋتىنىڭ ديرەكتورى (ليتۆا) اندريۋس ستاسيۋكيناس قاتىستى.
كونفەرەنتسيانىڭ «مەملەكەتتىك باسقارۋداعى قازىرگى تەندەنتسيالار» سەكتسياسىنا مەملەكەتتىك باسقارۋدىڭ وزەكتى ماسەلەلەرى جانە ۇزدىك تاجىريبەلەرى تالقىلاندى. سەكتسيادا العاشقى بولىپ بۇۇ-نىڭ قازاقستانداعى دامۋ باعدارلاماسىنىڭ تۇراقتى وكىلى كاتارجينا ۆاۆەرنيا بايانداما جاسادى.
سونىمەن قاتار مەرەيتوي اياسىندا اكادەميا تۇلەكتەرىنىڭ فورۋمى ءوتتى. فورۋمعا وڭىرلەردەن اكادەميانىڭ 1996 جىلدان بەرگى ءار جىلعى تۇلەكتەرى كەلدى.
